ހައިކޯޓުގެ އިސް ފަނޑިޔާރު ޝުޖާއު އުސްމާން އިސްތިއުފާ ދެއްވައިފި
17 އޯގަސްޓު 2020 | ހޯމަ 17:44އިސްތިއުފާ ދެއްވީ އޭނާ މަގާމުން ވަކިކުރަން ޖޭއެސްސީން ރައްޔިތުންގެ މަޖިލީހަށް ފޮނުވާފައި ވަނިކޮށް
ޝުޖާއު އުސްމާން
ހައި ކޯޓުގެ އިސް ފަނޑިޔާރު ޝުޖާއު އުސްމާން އިސްތިއުފާ ދެއްވައިފިއެވެ.
ފަނޑިޔާރުކަމުގެ މަގާމުން ޝުޖާއު އިސްތިއުފާ ދެއްވާފައިވަނީ ހޯމަ ދުވަހުއެވެ. އިސްތިއުފާ ދެއްވަމުން އާއްމުކޮށްފައިވާ ބަޔާނެއްގައި ޝުޖާއު ވިދާޅުވީ، ޖުޑިޝަލް ސަރވިސް ކޮމިޝަން (ޖޭއެސްސީ) އިން ފަނޑިޔާރުން އައްޔަން ކުރުމާއި ވަކިކުރުމުގެ މަސައްކަތް މިހާރު ކުރަމުން ގެންދަނީ ސިޔާސީ ބޭފުޅުން ބޭނުން ކުރާ ސިޔާސީ ކުޅިބައެއްގެ ގޮތުގައި ކަމަށެވެ.
އަދި ޝަރުއީ ދާއިރާގައި ވަކި ފިކުރެއް ކުރިއެރުވުމަށްޓަކައި ކުރަމުންދާ ހީލަތްތެރި މަކަރުވެރި މަސައްކަތުގެ ސަބަބުން ފަނޑިޔާރުގެ އަދުލު އިންސާފުން ބޭރުވެ ރާއްޖޭގެ ޖުމްހޫރިއްޔާގެ ގާނޫނޫ އަސާސީ ގައި ބާރުކަނޑުވާލައި ދައުލަތުގެ މުޅި ނިޒާމު ގަޑުބަޑު ވެގެންދާކަމީ ހިތާމަހުރި ކަމެއް ކަމަށް އޭނާ ވިދާޅުވިއެވެ. ޝުޖާއު މަގާމުން އިސްތިއުފާ ދެއްވާފައި މިވަނީ އޭނާ މަގާމުން ވަކިކުރަން ޖޭއެސްސީން ރައްޔިތުންގެ މަޖިލީހަށް ފޮނުވާފައި ވަނިކޮށެވެ.
ޝުޖާއު އުސްމާނުގެ މައްޗަށް އެ ކޮމިޝަނުން ތަހްގީގް ކުރަމުންދާ މައްސަލަ އަކީ، 2018 ވަނަ އަހަރު ރާއްޖޭގައި ބޭއްވި ރިޔާސީ އިންތިޚާބުގެ ކެމްޕެއިން ތެރޭގައި ގއ. ގެމަނަފުއްޓަށް ނުރަސްމީ ދަތުރެއްކޮށް، ރިޔާސީ ކެންޑިޑޭޓަކަށް ވޯޓު ހޯދުމަށް މަސައްކަތް ކުރި ކަމަށާއި، ކްރިމިނަލް ކޯޓުގެ އަމުރެއްގެ ދަށުން ބަންދުކޮށްފައި ހުރި މީހެއްގެ އާއިލާގެ މީހުންނާ ބައްދަލުކޮށް، އެމީހުންގެ ވޯޓު ލިބިއްޖެ ކަމުގައިވާނަމަ ބަންދުގައި ހުރިމީހާ މިނިވަން ކުރާނެކަމުގެ މަޝްވަރާ ކޮށްފައިވާ ކަމަށް ހުށަހެޅިފައިވާ މައްސަލައެވެ. ޖޭއެސްސީގައި ފަނޑިޔާރު ޝުޖާއު އުސްމާންގެ މައްޗަށް ތުހުމަތު ކުރެވޭ އެތައް މައްސަލައެއް ހުށަހެޅިފައިވާ ކަމަށް ވެއެވެ.
ޝުޖާއު އަކީ ކުރީގެ ރައީސް އަބްދުﷲ ޔާމީންއަށް މިދިއަ ރިޔާސީ އިންތިހާބުގައި ފާޅުގައި ކެމްޕެއިން ކުރައްވަމުން ގެންދެވި ފަނޑިޔާރެކެވެ.
ޝަރުއީ ދާއިރާއިން ޑިގްރީއާއި މާސްޓަރ ޑިގްރީ ހާސިލްކުރައްވާފައިވާ ޝުޖާއު އުސްމާން ޝަރުއީ ދާއިރާގައި މަސައްކަތް ކުރައްވަން ފެއްޓެވީ 1996 ވަނަ އަހަރުގެ ޑިސެމްބަރު މަހުގެ 19 ވަނަ ދުވަހުން ފެށިގެންނެވެ. ހައިކޯޓުގެ އިސް ފަނޑިޔާރުކަމުގެ މަގާމަށް ވަޑައިގެންނެވުމުގެ ކުރިން ޝުޖާއު އުސްމާން ވަނީ ހައިކޯޓުގެ ފަނޑިޔާރުކަމާއި، އެ ކޯޓުގެ އުތުރު ގޮފީގެ ފަނޑިޔާރުކަމުގެ މަގާމު އަދާކުރައްވާފައެވެ. އޭގެ ކުރިން އޭނާ ވަނީ ހުވަދުއަތޮޅު އުތުރުބުރީ ވިލިނގިލި ކޯޓުގެ މެޖިސްޓްރޭޓްކަމާއި، އެ އަތޮޅުގެ އިސް މެޖިސްޓްރޭޓްކަމާއި، އދ. އަތޮޅުގެ އިސް މެޖިސްޓްރޭޓް ކަމުގެ އިތުރުން، ކްރިމިނަލް ކޯޓުގެ ގާޒީ ކަމުގެ މަގާމު ވެސް އަދާކުރައްވާފައެވެ.
