"ގާޑިއޯލާ އަނބުރާ ބާސާއަށް ބަދަލުވުމަކީ ނުވާނެ ކަމެއް"

މެންޗެސްޓާ ސިޓީގެ ކޯޗު ޕެޕް ގާޑިއޯލާ އޭނާގެ ކުރީގެ ކުލަބު ބާސެލޯނާއާ އަލުން ހަވާލުވުމަކީ ނުވާނެ ކަމެއް ކަމަށާއި އަންނަ ސީޒަނުގައިވެސް ގާޑިއޯލާ ފެންނާނީ ސިޓީން ކަމަށް އޭނާގެ އޭޖެންޓް ޖޯސެޕް މަރީއާ ބުނެފިއެވެ.

ބާސާގެ ކޯޗުގެ މަގާމުން ކިކޭ ސެޓިއިން ދުރުކުރަން ނިންމާފައިވާއިރު، ގާޑިއޯލާ އަކީ ބާސާއިން ފާރަލަމުން އަންނަ އެއް ކޯޗެވެ.

އެކަމަކު ގާޑިއޯލާގެ އޭޖެންޓް ބުނީ ސިޓީ އާއެކު ގާޑިއޯލާ އެއްބަސްވުމެއް ހަދާފައިވާ ކަމަށާއި، ސިޓީ އާއެކު އިތުރު ކާމިޔާބު ހޯދުމަށް ގާޑިއޯލާ ބޭނުންވާ ކަމަށެވެ. އަދި ބާސާއަކީ މާޒީ ކަމަށާއި، ގާޑިއޯލާ އަކީ އަބަދުވެސް އައު ޗެލެންޖްތައް ނަގަން ބޭނުންވާ ކޯޗެއް ކަމަށްވެސް ބުންޏެވެ.

ސިޓީ އާއެކު މި ސީޒަނުގައި ގާޑިއޯލާއަށް ކާމިޔާބީއެއް ހޯދިފައިނުވާއިރު، ޔުއެފާ ޗެމްޕިއަންސް ލީގުގެ ކުއާޓާ ފައިނަލުން ސިޓީ ވަނީ ލިޔޯން އަތުން ބަލިވެ ކަޓާފައެވެ. އަދި މި ސީޒަނުގެ ޕްރިމިއާ ލީގު ސިޓީން ނިންމާލީ ތާވަލުގެ ދެވަނައިގައި އޮވެގެންނެވެ.

ލިޔޯން އަތުން ބަލިވި މެޗަށްފަހު ވާހަކަދައްކަމުން ގާޑިއޯލާ ބުނީ ސިޓީއަށް ބަދަލުތަކެއް ބޭނުންވާ ކަމަށާއި، އެކަން ކުރަން ތައްޔާރަށް ހުރި ކަމަށެވެ. އަދި ސިޓީން އަންނަ ސީޒަނާއި ކުރިމަތިލާނީ ބަދަލުތަކަކާއެކު ކާމިޔާބު ހޯދުމަށް ކަމަށާއި، އެކަން ސިޓީއަށް ކުރެވޭނެ ކަމަށްވެސް ގާޑިއޯލާ ބުންޏެވެ.

ބާސެލޯނާއިން ގާޑިއޯލާ ހޯދުމަށް މަސައްކަތް ކުރަމުން އަންނައިރު، ސިޓީން އަންނަނީ ބާސާގެ ކެޕްޓަން ލިއޮނަލް މެސީ ހޯދުމަށް މަސައްކަތް ކުރަމުންނެވެ. ރިޕޯޓުތައް ބުނާގޮތުން މި ސީޒަނަށްފަހު ބާސާ ދޫކޮށްލަން މެސީ ބޭނުންވެއެވެ. އަދި ރިޕޯޓުތައް ބުނާ ގޮތުން މެސީ ހޯދުމަށް ކިތަންމެ ބޮޑު ޚަރަދެއް ކުރަން ޖެހުނަސް އެކަން ކުރަން ސިޓީ އޮތީ ތައްޔާރަށެވެ.

އަންނަ ސީޒަނަށް ސިޓީން އެޓީމުގެ ސްކޮޑު ވަރުގަދަ ކުރުމުގެ މަސައްކަތް ކުރަމުން އަންނައިރު، ސިޓީން ވަނީ ވެލެންސިއާގެ ޒުވާން ފޯވާޑް ފެރާން ޓޮރޭސް އާއި ބޯންމަތުގެ ޑިފެންޑަރު ނޭތަން އަކޭގެ ސޮއި މިހާތަނަށް ހޯދާފައެވެ.