ފަނޑިޔާރު ޝުޖާއު އުޘްމާނު މަޤާމުން ވަކިކުރުގެ މައްސަލަ ކޮމިޓީއަށް ފޮނުވައިފި
17 އޯގަސްޓު 2020 | ހޯމަ 09:14ފަނޑިޔާރު ޝުޖާއު އުސްމާން މިހާރުވެސް ހުންނެވީ ދެ މަސް ދުވަހުގެ ސަސްޕެންޝަނުގައި
ހައިކޯޓުގެ އިސްފަނޑިޔާރު ޝުޖާއު އުސްމާން
ނުފޫޒު ބޭނުންކޮށްގެން އެތައް ކަމެއް ކުރިކަމުގެ ތުހުމަތު ކުރެވިފައިވާ ހައިކޯޓުގެ އިސް ފަނޑިޔާރު ޝުޖާޢު އުޘްމާނު، ފަނޑިޔާރު ކަމުގެ މަގާމުން ވަކިކުރަން، ޖުޑީޝަލް ސަރވިސް ކޮމިޝަން (ޖޭއެސްސީ)އިން ރައްޔިތުންގެ މަޖިލީހަށް ފޮނުވި މައްސަލަ ދިރާސާކުރަން މަޖިލީހުގެ ޖުޑީޝަރީ ކޮމެޓީއަށް ފޮނުވައިފި އެވެ.
ފަނޑިޔާރު ޝުޖާއު މިހާރުވެސް ހުންނެވީ، ދެމަސް ދުވަހަށް ސަސްޕެންޑް ކޮށްފައެވެެ.
ޖޭއެސްސީން މިދިއަ ޖުލައި މަހުގެ 22 ވަނަ ދުވަހު ނެރުނު ނޫސްބަޔާނެއްގައި ބުނެފައިވަނީ، ހައިކޯޓުގެ އިސްފަނޑިޔާރު ޝުޖާޢު އުޘްމާނުގެ މައްޗަށް އެ ކޮމިޝަނުން ތަޙްޤީޤު ކުރަންމުންދާ މައްސަލަ އަކީ، 2018 ވަނަ އަހަރު ރާއްޖޭގައި ބޭއްވި ރިޔާސީ އިންތިޚާބުގެ ކެމްޕެއިން ތެރޭގައި ގއ. ގެމަނަފުއްޓަށް ނުރަސްމީ ދަތުރެއްކޮށް، ރިޔާސީ ކެންޑިޑޭޓަކަށް ވޯޓު ހޯދުމަށް މަސައްކަތް ކުރި ކަމަށާއި، ކްރިމިނަލް ކޯޓުގެ އަމުރެއްގެ ދަށުން ބަންދުކޮށްފައި ހުރި މީހެއްގެ އާއިލާގެ މީހުންނާ ބައްދަލުކޮށް، އެމީހުންގެ ވޯޓު ލިބިއްޖެ ކަމުގައިވާނަމަ ބަންދުގައި ހުރިމީހާ މިނިވަން ކުރާނެކަމުގެ މަޝްވަރާ ކޮށްފައިވާކަމަށް ހުށަހެޅިފައިވާ މައްސަލައެވެ.
މި މައްސަލައަކީ މައްސަލައިގެ ތަޙްޤީޤު ނިންމުމަށްފަހު، ތަޙުޤީޤު ރިޕޯޓުގައިވާ ކަންކަމަށް ޖަވާބުދާރީވުމަށް 7 ދުވަހުގެ ފުރުސަތާއެކު މިދިއަ ޖުލައި މަހުގެ 20 ވަނަ ދުވަހު ތަޙުޤީޤު ރިޕޯޓު ހައިކޯޓުގެ އިސްފަނޑިޔާރު ޝުޖާޢު އުޘްމާންއާ ޙަވާލުކޮށްފައިވާ މައްސަލައެކެވެ. މީގެ އިތުރުން ވެސް ޖޭއެސްސީގައި ފަނޑިޔާރު ޝުޖާއު އުސްމާންގެ މައްޗަށް ތުހުމަތު ކުރެވޭ އެތައް މައްސަލައެއް ހުށަހެޅިފައިވާ ކަމަށް ވެއެވެ.
ޝުޖާއުއަކީ ކުރީގެ ރައީސް އަބްދުﷲ ޔާމީންއަށް މިދިއަ ރިޔާސީ އިންތިހާބުގައި ފާޅުގައި ކެމްޕެއިން ކުރައްވަމުން ގެންދެވި ފަނޑިޔާރެކެވެ. ފަނޑިޔާރަކު މަގާމުން ވަކިކުރުމުގެ މައްސަލައެއް ޖޭއެސްސީން، ރައްޔިތުންގެ މަޖިލީހަށް ހުށަހެޅުމުން، އެމައްސަލަ މަޖިލީހުގެ ޖުޑީޝަރީ ކޮމެޓީން ދިރާސާ ކުރުމަށްފަހު، އެކޮމެޓީން ނިންމި ގޮތުގެ ރިޕޯޓަށް ވޯޓަށް އަހައި ފާސްކުރާނީ ރައްޔިތުންގެ މަޖިލީހުގެ ޖަލްސާއިންނެވެ.
