ކ. ގުރައިދޫއަށް ދިމާވެފައިވާ ބިމުގެ ދަތިކަން ހައްލުކުރުމަށް އެ ރަށުގެ ބިން ހިއްކުމުގެ މަސައްކަތަށް ރައްޔިތުންގެ ކުންފުނި، އެމްޓީސީސީން ތައްޔާރުވެއްޖެ އެވެ.
އެމްޓީސީސީން ބުނީ ކ. ގުރައިދޫ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫޢުގެ އަމަލީ މަސައްކަތް ފެށުމައްޓަކައި 15 އޯގަސްޓް 2020 ގައި ޕްރޮޖެކްޓް ސައިޓް މޮބިލައިޒްކޮށްފައިވާކަމަށެވެ. މި މަޝްރޫޢަށް ބޭނުންވާ އީއައިއޭ ހުއްދަ ލިބިފައިވަނީ 13 އޯގަސްޓް 2020 ގައިކަމަށް އެ ކުންފުނިން ބުންޏެވެ.
އެމްޓީސީސީން ބުނީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެ ކުންފުންޏާއި ހަވާލުކޮށްގެން ކުރިއަށްގެންދާ މި މަޝްރޫޢުއަށް 85.9 މިލިއަން ރުފިޔާ ޙަރަދުވާނެ ކަމަށްލަފާ ކުރެވޭކަމަށެވެ.
މި މަޝްރޫޢު ހަވާލުކޮށްފައިވަނީ 27 އޯގަސްޓް 2019 ގައެވެ.
ކ. ގުރައިދޫ ބިން ހިއްކުމަކީ ރައީސް އިބްރާހިމް މުހައްމަދު ސޯލިހް ވެވަޑައިގެންނެވި ވައުދެކެވެ. އެގޮތުން އެމަނިކުފާނު ވަނީ ނިމުނު މަޖިލިސް އިންތިހާބުގެ ކެމްޕޭނުގައިވެސް އެ ވައުދު ތަކުރާރުކުރައްވާފަ އެވެ.
