މާލޭގައި ދިރިއުޅެން އެކަށީގެންނުވާ ތަންތަނުގައި 17،000 ށްވުރެ ގިނަ އާއިލާ ދިރިއުޅެމުންދާ ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

ހޯމަ ދުވަހުގެ ޖަލްސާގައި މާލެ ސަރަހައްދުގެ ބޯހިޔާވަހިކަމާއި ގުޅޭ ކަރުދާހެއް މިނިސްޓަރ ވަނީ ހުށަައަޅުއްވާފައެވެ.

މިނިސްޓަރ ވިދާޅުވީ މާލޭގެ އާބާދީއަކީ 252،768 (ދެ ލައްކަ ފަންސާސް ދެހާސް ހަތް ސަތޭކަ ފަސްދޮޅަސް އަށެއް) މީހުން ކަމަށެވެ. އަދި މި އާބާދީގެ ތެރެއިން 76،556 (ހަތްދިހަ ހަ ހާސް ފަސް ސަތޭކަ ފަންސާސް ހަ) މީހުންނަކީ މާލެއަށް އުފަން ނުވަތަ މާލޭގެ ދަފްތަރުގައި ޖެހިފައިވާ މީހުން ކަމަށާއި، 170،212 (އެއް ލައްކަ ހަތްދިހަ ހާސް ދުއިސައްތަ ބާރަ) މީހުންނަކީ ރަށްރަށުން މާލެއިން ހިޖުރަކޮށް، ދިރިއުޅެމުންގެންދާ މީހުން ކަމަށެވެ.

އަސްލަމް ވަނީ މާލޭގެ ހައުސިންގް ނީޑް ދެނެގަތުމަށްޓަކައި ދެ ގޮތެއް (މެތަޑޮލޮޖީ) ބޭނުންކުރި ކަމަށް ވިދާޅުވެފައެވެ.

ފުރަތަމަ ބޭނުންކުރި މެތޮޑޮލޮޖީއިން ދެނެގަނެވުނީ މާލޭގައި ދިރިއުޅޭ ރައްޔިތުން ދިރިއުޅެމުންދާ ގެދޮރަކީ އެކަށީގެންވާ ތަނެއްތޯ ނުވަތަ ނޫންތޯއާއި މިފަދަ ތަންތަނުގައި ކިތައް އާއިލާ އުޅެމުންދޭތޯވެ. މި މެތޮޑޮލޮޖީގައި ބަލާފައިވަނީ މާލޭގައި ރަޖިސްޓްރީ ކޮށްފައިވާ ބިންތަކުގެ ތެރެއިން 600 އަކަފޫޓަށް ވުރެ ކުޑަ ތަންކޮޅެއްގައި ދިރިއުޅެމުންދާ ކޮންމެ އާއިލާއަކީ ދިރިއުޅެން އެކަށީގެންނުވާ ތަންތަނުގައި އުޅެމުންދާ މީހުންގެ ގޮތުގައެވެ.

މިނިސްޓަރ ވިދާޅުވީ 600 އަކަ ފޫޓަށް ވުރެ ކުޑަ 5691 ޕްލޮޓު އޮތްއިރު މި މެތަޑޮލޮޖީގައި ބަލާފައިވަނީ އެތަންތަނުގައި އެވްރެޖް ބިލްޑިންގް ހައިޓަކީ ތިން ފަންގިފިލާ ކަމަށެވެ. އަދި 600 އަކަ ފޫޓަށް ވުރެ ބޮޑު ބިންތަކުގައި އެވްރެޖްގޮތެއްގައި 6 ފަންގިފިލާ ކަމަށެވެ.

މަޖިލީހަށް ކަރުދާސް ހުށައަޅުއްވަމުން އަސްލަމް ވިދާޅުވީ ދިރިއުޅެން އެކަށީގެންނުވާ ތަންތަނުގައި 17،073 (ސަތާރަ ހާސް ހަތް ދިހަ ތިން) އާއިލާ ދިރިއުޅެމުންދާކަމަށް އަންދާޒަ ކުރެވޭ ކަމަށެވެ.

އަސްލަމް ވިދާޅުވީ އެންމެ ފަހުން ސަރުކާރުން އިއުލާނު ކުރި ހިޔާ މަޝްރޫއުއަށް 23،064 ފަރާތަކުން ކުރިމަތި ލާފައިވާކަމަށެވެ. އަދި އޭގެ ތެރެއިން އެއް ކޮޓަރީގެ ފްލެޓުތަކަށްވެސް ބަޔަކު ކުރިމަތިލި ކަމަށާއި ބޮޑަށް ގަބޫލުކުރެވޭ ގޮތުގައި އެ ފްލެޓުތަކަށް ކުރިމަތިލާފައިވަނީ އަދި އާއިލާއެއް އުފެއްދިފައިނުވާ މީހުން ކަމަށެވެ. އަސްލަމް ވިދާޅުވީ އެމީހުން އުނިކުރުމަށްފަހު އެ އެޕާާޓްމެންޓްތަކަށް 21،021 ފަރާތަކުން ކުރިމަތިލާފައިވާ ކަމަށެވެ. އަދި ހެދުނު އިވޭލުއޭޝަނުން 19،402 މީހަކު މި ހައުސިންގް ޔުނިޓުތަކަށް ފެތޭ ކަމަށް ވިދާޅުވިއެވެ.

ފުރަތމަ މެތޮޑޮލޮޖީއިން މާލޭގައި ދިރިއުޅެން އެކަށީގެންނުވާ ތަންތަނުގައި 17،073 (ސަތާރަ ހާސް ހަތް ދިހަ ތިން) ށްވުރެ ގިނަ އާއިލާ އުޅެމުންދާ ކަމަށް ދެއްކިއުރު ދެވަނަ މެތޮޑޮލޮޖީއިން އެނގުނު ގޮތުގައި 19،402 (ނާވަރަ ހާސް ހަތަރު ސަތޭކަ ދުއިސައްތަ ދެ) އާއިލާ ދިރިއުޅެމުންދަނީ ދިރިއުޅެން އެކަށީގެންނުވާ ތަންތަނުގައެވެ. މީގެ އެވްރެޖެއް ނަގާކަމަށް ވާނަމަ އެއީ 17،173 (ސަތާރަ ހާސް އެއް ސަތޭކަ ހަތް ދިހަ ތިން) އާއިލާއެވެ. އެއީ މާލެއަށް އުފަން، މާލޭގެ ދަފްތަރުގައި ރަޖިސްޓްރީ ވެފައިވާ 6414 އާއިލާ އާއި ރަށްރަށުން ހިޖުރަކޮށްގެން މާލޭގައި ދިރިއުޅެމުންދާ 10759 (ދިހަ ހާސް ހަތް ސަތޭކަ ފަންސާސް ނުވަ) އާއިލާއެވެ.