ކޮވިޑް- 19 އާ ގުޅޭ އޮޑިޓް ރިޕޯޓް މާލިއްޔަތު ކޮމިޓީން ދިރާސާ ކުރަނީ
17 އޯގަސްޓު 2020 | ހޯމަ 04:24ރިޕޯޓްގައި ކަންބޮޑުވާ ކަންކަން ފާހަގަ ކުރެވިފައިވާކަމަށް ވިދާޅުވި
މާލިއްޔަތު ކޮމިޓީގެ ބައްދަލުވުން ކުރިއަށްދަނީ
ކޮވިޑް-19 އާ ގުޅިގެން މިނިސްޓްރީ އޮފް ޓޫރިޒަމް އާއި މިނިސްޓްރީ އޮފް ހެލްތުން ކޮށްފައިވާ ހަރަދުތަކާއި ގުޅިގެން އޮޑިޓް އޮފީހުން ތައްޔާރުކޮށްފައިވާ ރިޕޯޓް ރައްޔިތުންގެ މަޖިލީހުގެ މާލިއްޔަތު ކޮމިޓީން ދިރާސާކުރުމަށް ނިންމައިފިއެވެ.
މާލިއްޔަތު ކޮމިޓީގެ މުޤައްރިރު އަދި ކިނބިދޫ ދާއިރާގެ މެންބަރު މުހައްމަދު ނާޝިޒު އާދިއްތަ ދުވަހުގެ ކުރައްވާފައިވާ ޓްވީޓެއްގައި ވަނީ ޓޫރިޒަމް މިނިސްޓްރީ އާއި ހެލްތް މިނިސްޓްރީގެ ކޮވިޑް-19 ކޮމްޕްލިއަންސް އޮޑިޓް ރިޕޯޓްގައި ކަންބޮޑުވާ ބައެއް ކަންކަން ފާހަގަ ކުރެވިފައިވާތީ ހޯމަ ދުވަހުގެ މާލިއްޔަތު ކޮމިޓީގެ ބައްދަލުވުމުގައި ދެ ރިޕޯޓް ދިރާސާ ކުރުމަށް ހަމަޖެހިފައިވާ ކަމަށެވެ.
ކޮވިޑް19އާ ގުޅިގެން ޓޫރިޒަމް މިނިސްޓްރީން ކުރި ހަރަދުތަކުގެ 99 ޕަސަންޓަކީ މިނިސްޓްރީގެ ޒިންމާއާ ނުގުޅޭ ޚަރަދުތަކެއް ކަމަށް އޮޑިޓް ރިޕޯޓްގައި ބުނެފައި ވެއެވެ.
މިދިޔަ ޖެނުއަރީ އެކަކުން ޖޫން 30 އަށް ކުރި ހަރަދުތަކުގެ އެ އޮޑިޓްގައިވާ ގޮތުން 26 މިލިއަން ރުފިޔާ މިނިސްޓްރީން ވަނީ ކޮވިޑްގެ އެކި ކަންކަމަށް ހޭދަކޮށްފައެވެ. އެގޮތުން ރާއްޖޭގެ ތިން އެއާޕޯޓެއްގައި ތާމަލް ކެމެރާތައް ބެހެއްޓުމަށާއި ކަރަންޓީން/އައިސޮލޭޝަން ފެސިލީޓީތައް ގައިމުކުރުމަށާއި ސިއްހީ ވަސީލަތައްތައް ބޭރުން ގެނައުމަށް އަދި ސިއްހީ މާހިރުން ބޭރުން ގެނައުމަށް އެ ފަންޑުން ވަނީ ހަރަދު ކޮށްފައެވެ. މި ކަންކަން ކޮށްފައިވަނީ ޓްރަސްޓް ފަންޑު ހިންގާ ކޮމިޓީން ފާސް ކޮށްގެން މިނިސްޓްރީން ކޮވިޑާ ގުޅިގެން ކުރަން ޖެހޭ ކޮންމެ ކަމެއް ކުރުމަށް ޓްރަސްޓް ފަންޑު ކޮމިޓީން ހުއްދަ ދީގެން ކުރި ކަންތަކެވެ. ނަމަވެސް ރިޕޯޓުގައި ބުނަނީ ވަކި ވަކި ކަންކަމަށް ހުއްދަ ހޯދާފައި ނުވާ ކަމަށެވެ.
ހެލްތް މިނިސްޓްރީގެ އޮޑިޓް ރިޕޯޓުގައި ކޮވިޑުގެ ބަލި މީހުންނަށް ފަރުވާ ދޭން ރާއްޖެއަށް ބޭނުންވާ 75 ވެންޓިލޭޓަރު ގެނައުމުގައި ހެލްތް މިނިސްޓްރީން އޮޅުވާލުންތަކެއް އޮޅުވާލާފައިވާ ކަމަށް އޮޑިޓް ރިޕޯޓުގައި ވަނީ ބުނެފައެވެ.
ރިޕޯޓުގައި ބުނާ ގޮތުން ވެންޓިލޭޓަރުތައް ގެންނަން ހަވާލު ކުރި ދުބާއީގެ އެގްޒެކިއުޓާސް ޖެނެރަލް ޓްރޭޑިންގ ކުންފުންޏަކީ ޑަބްލިއުއެޗްއޯގެ ލަފާގެ މަތިން ހަމަޖައްސާފައިވާ ކުންފުންޏެއް ނޫނެވެ. އެކަމަކު އެ ކުންފުންޏަކީ ސީދާ ޑަބްލިއުއެޗްއޯގެ މަޝްވަރާގެ މަތިން ވެންޓިލޭޓަރު ގެންނަން ހަވާލު ކުރި ކުންފުންޏެއް ކަމަށް ހެލްތް މިނިސްޓްރީން ވަނީ ރާއްޖެ.އެމްވީ އަށް މައުލޫމާތު ދީފައެވެ. އަދި ކޮރަޕްޝަން އަށް މަގު ފަހިވާ ގޮތަށް އެއްވެސް ކަމެއް ކޮށްފައިނުވާނެ ކަމުގެ ޔަގީންކަން އެ މިނިސްޓްރީން ވަނީ ދީފައެވެ.
އޮޑިޓް ރިޕޯޓުގައި ބުނީ، އެގްޒެކިއުޓާރސް ޖެނެރަލް ހެލްތް މިނިސްޓްރީއާ ދެމެދު ވެފައިވާ އެއްބަސްވުމުގެ ދަށުން، އެޑްވާންސް ޕޭމަންޓްގެ ގޮތުގައި ޕްރޮޖެކްޓުގެ އަގުގެ 75 އިންސައްތަ ދައްކާތާ 29 ދުވަސް ތެރޭގައި ވެންޓިލޭޓަރުތައް ސަޕްލައިކޮށް ނިންމަން ޖެހޭ ކަމަށެވެ. އެޑްވާންސް ޕޭމަންޓްގެ ގޮތުގައި އޭޕްރީލް މަހުގެ ދެވަނަ ދުވަހު 75 އިންސައްތަ އަދި 27 އޭޕްރީލް 2020 ގައި އިތުރު 15 އިންސައްތަ ދައްކާފައިވީ ނަމަވެސް، އޮޑިޓް ކުރެވުނު ތާރީޚު ކަމުގައިވާ އޮގަސްޓު މަހުގެ ހަ ވަނަ ދުވަހާ ހަމައަށް ވެސް ވެންޓިލޭޓަރުތައް ހަމައަށް ފޯރުކޮށްދީފައި ނުވާކަން އޮޑިޓް ރިޕޯޓުގައި ވަނީ ފާހަގަކޮށްފައެވެ.
