އިންޑިއާގެ ވެކްސިން އެންމެ ފުރަތަމަ ފޯރުކޮށްދޭ ގައުމަކަށް ރާއްޖެ
16 އޯގަސްޓު 2020 | އާދީއްތަ 14:37ވެކްސިން އުފެއްދުމުގެ މަސައްކަތް އިންޑިއާއިން ވަނީ ފަށާފައި
އިންޑިއާގެ ސަފީރު ސަންޖޭ ސުދީރް
ކޮވިޑް-19 އާ ދެކޮޅަށް އިންޑިއާއިން ވެކްސިން އެއް ހޯދިއްޖެނަމަ އެންމެ އަވަހަށް ވެކްސިން ފޯރުކޮށްދޭ ގައުމަކަށް ރާއްޖެވާނެ ކަމުގެ އިޝާރާތެއް އިންޑިއާ އިން ރާއްޖެ އަށް ކަނޑައަޅާފައިވާ ސަފީރު ސަންޖޭ ސުދީރް ދެއްވައިފިއެވެ.
އިންޑިއާއިން ޓެސްޓުކުރަމުން އަންނަ ވެކްސިން އުފައްދަން ސައިންސްވެރިން ފެހިސިގްނަލް ދިނުމުން، ފުުޅާ ދާއިރާއެއްގައި ވެކްސިން އުފައްދަން ފަށާނެ ކަަމަށް އެ ގައުމުގެ ބޮޑުވަޒީރު ނަރެންދުރަ މޯދީ ވަނީ އިންޑިއާގެ 74 ވަނަ މިނިވަން ދުވަހު ވިދާޅުވެފަ އެވެ. އިންޑިއާގެ ސައިންސްވެރިން ޓެސްޓުކުރަމުން އަންނަ ތިން ވެކްސިނެެއް ކާމިޔާބު ވާނެ ކަމުގެ ޔަގީންކަން އެގައުމުން ވަނީ ދީފައެވެ.
ރާއްޖެ ޓީވީގެ ''މޯލްޑިވްސް ވީކްލީ'' އަށް ދެއްވި ހާއްސަ އިންޓަވިއުއެއްގައި އިންޑިއާ ސަފީރު ވިދާޅުވީ، ރާއްޖެ އަކީ އިންޑިއާގެ އެންމެ ގާތް އެކުވެރި ގައުމު ކަމަށާއި، ހަމަ އެފަދައިން އިންޑިއާ އަކީ ރާއްޖޭގެ އެންމެ ގާތް އެކުވެރިޔާ ކަމަށެވެ. ކޮވިޑުގެ ބަލިމަޑު ކަމުގެ އިތުރުން ރާއްޖެ އަށް ދިމާވާ ކޮންމެ ކާރިސާއެއްގައިވެސް އިންޑިއާ އަކީ އެންމެ ފުރަތަމަ އެހީތެރިކަން ފޯރުކޮށްދޭ ގައުމުކަން ސަފީރު ފާހަގަކުރެއްވިއެވެ.
އިންޑިއާއިން ވަނީ މި ފަހުން ރާއްޖެއިން ހިމަބިހި ފެނުމުން ވެކްސިންގެ 30،000 ޑޯޒް އިންޑިއާއިން ވަނީ 75 ގަޑިއިރު ތެރޭގައި ހަދިޔާކޮށްފައެވެ. އަދި ކޮވިޑުގެ ހާލަތާއި ގުޅިގެން އިންޑިއާއިން ވަނީ ބަލިމަޑުކަމުން އަރައިގަތުމަށް ރާއްޖެއަށް ތިން މަހުގެ (5.5 ޓަނުގެ) ބޭހުގެ ސްޓޮކްވެސް ހަދިޔާކޮށްފައެވެ.
މޯލްޑިވްސް ވީކްލީ މި ޕްރޮގްރާމް ދެއްކުމަށް ހަމަޖެހިފައިވަނީ 22 އޮގަސްްޓް ވާ ހޮނިހިރު ދުވަހުގެ ރޭ 11 ޖަހާއިރުއެވެ.
