އެމްޕީބީއޭއަށް ދުނިޔޭގެ ފެންވަރުގެ ފެސިލިޓީއެއް
މިއަހަރު ނިމުމުގެ ކުރިން އެ ފެސިލިޓީގެ މަސައްކަތްތައް ނިންމާލުމަށް މަސައްކަތް ކުރަމުންދޭ
މިހާރު ބިލިއާޑް މުބާރާތްތައް ކުޅެމުން އަންނަ އެމްބީއޭ ކުލަބު ހައުސް
މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އަށް ދުނިޔޭގެ ފެންވަރުގެ ފެސިލިޓީއެއް ތަރައްގީ ކޮށްދިނުމަށް މަސައްކަތް ކުރަމުންދާ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.
އާދީއްތަ ދުވަހު ކުރެއްވި ޓްވީޓެއްގައި ވަޒީރު ވިދަޅުވީ އެމްޕީބީއޭއަށް ދުނިޔޭގެ ފެންވަރުގެ ފެސިލިޓީއެއް ތަރައްގީ ކުރުމަށް މަސައްކަތް ކުރަމުންދާ ކަމަށާއި، މިއަހަރު ނިމުމުގެ ކުރިން އެ ފެސިލިޓީގެ މަސައްކަތްތައް ނިންމާލުމަށް މަސައްކަތް ކުރަމުންދާ ކަމަށެވެ. އަދި އެ ފެސިލިޓީއާއެކު ބައިނަލްއަގުވާމީ މުބާރާތްތައް ބޭއްވުމުގެ ގާބިލުކަން ރާއްޖެއަށް ލިބިގެންދާނެ ކަމަށްވެސް ވިދާޅުވިއެވެ. އެގޮތުން އެ ފެސިލިޓީގެ މަސައްކަތް ނިމުމާއެކު ބިލިއާޑް ވޯލްޑް ޗެމްޕިއަންޝިޕް ބޭއްވުމަށް ރާއްޖެއިން ބިޑް ކުރެވޭނެ ކަމަށްވެސް ވަޒީރު ވިދާޅުވިއެވެ.
މީގެ އިތުރުން ވަޒީރު ވަނީ މި މަސައްކަތް ކުރިއަށް ގެންދިޔުމުގައި އެމްޕީބީއޭގެ ރައީސް އަދި އެ އެސޯސިއޭޝަނުގެ ހިންގާ ކޮމިޓީން ދެމުންދާ އެހީތެރިކަމަށް ޝުކުރުއަދާކުރައްވާފައެވެ.
މިހާރު ބިލިއާޑް މުބާރާތްތައް ކުޅެމުން އަންނަނީ އެމްބީއޭ ކުލަބު ހައުސްގައެވެ. މީގެ ކުރިންވެސް ވަޒީރު ވަނީ އެމްބީއޭ ކުލަބު ހައުސް އިތުރަށް ތަރައްގީ ކުރުމަށް މަސައްކަތް ކުރަމުންދާ ކަމަށް ވިދާޅުވެފައެވެ.
ރާއްޖޭގައި ބިލިއާޑް ކުރިއެރުވުމަށް މި ސަރުކާރުން މީގެ ކުރިންވެސް މަސައްކަތް ކޮށްފައިވާއިރު، މިދިޔަ އަހަރު ކުޅިވަރާ ބެހޭ ވުޒާރާގެ އެހީއާއެކު ވަނީ ރާއްޖޭގެ ގައުމީ ބިލިއާޑް ޓީމަށް ފުރަތަމަ ފަހަރަށް ބޭރުގެ ކޯޗެއް ހަމަޖައްސާފައެވެ. އެގޮތުން ގައުމީ ބިލިއާޑް ޓީމަށް އޭރު ހަމަޖެއްސީ ފިލިޕީންސްގެ ތަޖުރިބާކާރު ކުޅުންތެރިޔާ އަދި ކޯޗެއް ކަމަށްވާ ވެލަރިއާނޯ ޕަޖުއޭ ޖޫނިއާއެވެ.
