ދުނިޔޭގެ ފީފާ ރޭންކިންގެ އެއްވަނަ ބުރެޒިލްއަށް.

ކޮކާ ކޯލާ ދުނިޔޭގެ ވޯލްޑް ރޭންކިންގެ އެއްވަނަ މަގާމު ދުނިޔޭގެ ފުޓްބޯޅައިގެ ރަސްގެފާނުގެ ގޮތުގައި ގިނަ ބަޔަކު ގަބޫލް ކުރާ ބްރެޒިލް އިން ހޯދައިފިއެވެ.

ދުނިޔޭގެ ފީފާ ރޭންކިންގެ އެއްވަނައަށް ބްރެޒިލް ޖެހިލާފައި މިވަނީ އެމަގާމުގައި ކުރިން އޮތް ޖަރުމަން ފަހަތަށް ޖައްސާލުމަށް ފަހުގައެވެ.

ބްރެޒިލް ދުނިޔޭގެ އެއްވަނަ މަގާމް ހޯދީ ކުރިން މި މަގާމުގައި އޮތް ޖަރުމަނަށް ވުރެ 55 ޕޮއިންޓް އިތުރަށް ލިބިގެން 1604 ޕޮއިންޓާއެކުއެވެ. ކުރިން ފީފާ ރޭންކްގައި އޮތް ޖަރުމަނަށް ލިބިފައިވަނީ 1549 ޕޮއިންޓެވެ.

ބްރެޒިލްއަށް ދުނިޔޭގެ ފީފާ ރޭންކިންގެ އެއްވަނަ ލިބުނުއިރު މިއީ ބްރެޒިލްއަށް މި މަގާމު ލިބުނު 5 ފަނަ ފަހަރެވެ. އެންމެ ފަހުން ބްރެޒިލްއަށް ދުނިޔޭގެ ފީފާ ރޭންކިންގެ އެއްވަނަ މަގާމު ލިބިފައިވަނީ 2002 ވަނަ އަހަރުގައެވެ.

1992 ވަނަ އަހަރު ފީފާއިން ތައާފަފް ކުރި ފީފާ ރޭންކިނ ސިސްޓަމް ތައާރަފް ކުރިފަހުން އެ މަގާމު އެންމެ ގިނަ ފަހަރު ހޯދާ، އެންމެ ދިގު މުއްދަތަކަށް އެ މަގާމު ދަމަހައްޓާފައިވާ ގައުމަކީ މިފަހަރުގެ ރޭންކިންގެ އެއްވަނަ ލިބުނު ބްރެޒިލްކަން ފާހަގަ ކޮށްލަންޖެހެއެވެ. އެގޮތުން 1994 ވަހަ އަހަރުގެ ޖުލައިމަހުން ފެށިގެން 2001 ވަނަ އަހަރުގެ މާޗުމަހުގެ ނިޔަލަށް ބަރެޒިލް ފީފާ ރޭންކިންގެ އެއްވަނާގައި އޮތްއިރު، އޭގެ ފަހުން 2002 ގެ އެޕްރީލް މަހުން ފެށިގެން 2007 ވަނަ އަހަރުގެ ޖެނުއަރީއާ ހަމައަށް ފީފާ ރޭންކިންގެ އެއްވަނަ މަގާމުގައި އޮތީ ވެސް ބްރެޒިލްއެވެ.

ބްރެޒިލް އާއި އެންމެ ގާތުން ވާދަކުރާ ގައުމަކީ ޖަރުމަނެވެ. ޖަރުމަނަށް މިފަހަރުގެ ރޭންކިންގެ ދެވަނަ ލިބުނުއިރު ޖަރުމަން ވެސް ވަނީ މީގެކުރިން ފީފާ ރޭންކިންގެ އެއްވަނަ ހަތަރު ފަހަރެއްގެ މަތިން ހޯދާފައެވެ. ތިންވަނައަށް މި މަގާމު އެންމެ ގިނައިން ހޯދާފައި ވަނީ އިޓަލީއެވެ. އިޓަލީވެސް ވަނީ ދުނިޔޭގެ ފީފާ ރޭންކިންގެ އެއްވަނަ ހަތަރު ފަހަރެއްގެ މަތިން ހޯދާފައެވެ.

ދުނިޔޭގެ ރޭންކިންގެ ތިންވަނާގައި 1399 ޕޮއިންޓް ލިބިގެން އޮތީ އާޖެންޓީނާއެވެ. 1329 ޕޮއިންޓާއެކު ހަތަރުވަނާގައި ސްވިޒަލެންޑް އޮތްއިރު ރޭންކިންގެ ފަސްވަނާގައި 1319 ޕޮއިންޓާއެކު އޮތީ ޕޮލެންޑެވެ. ޔޫރަޕްގެ ޗެމްޕިއަން ޕޯޗުގަލް ދެދަރަޖައިގެ ވެއްޓުމަކާއެކު މިވަގުތު އޮތީ 1269 ޕޮއިންޓާއެކު ރޭންކިންގެ ހަވަނަ މަގާމަށް ވެއްޓިފައެވެ.

ފްރާންސްވެސް ވަނީ އެއްދަރަޖައިގެ ވެއްޓުމަކާއެކު ފީފާ ރޭންކިންގެ 10 ވަނަ އަށް ވެއްޓިފައެވެ.

މިއަދު އާންމުކުރި ކޮކާ ކޯލާ ފީފާ ރޭންކިންގައި ދުނިޔޭގެ ފުޓްބޯޅައިގެ ވަރުގަދަ ބާރުތަކުގެ ގޮތުގައި ހިމެނޭ ސްޕެއިން، އިޓަލީ، އިންގްލެންޑުގެ މަގާމަށް އެއްވެސް ބަދަލެއް އައިސްފައި ނުވެއެވެ. އެގޮތުން ސްޕެއިން ރޭންކިންގެ 11 ވަނާގައި އޮތްއިރު އިޓަލީ އޮތީ 12 ވަނާގައެވެ. އަދި އިންގްލެންޑް އޮތީ 13 ވަނާގައެވެ.

ފީފާ ރޭންކިންގެ އެންމެ ފުލުގައި އޮތީ އެއް ދަރަޖައިގެ ވެއްޓުމަކާއެކު ނިމިގެންދިޔަ ޔޫރޯ ފުޓްބޯޅަ މުބާރާތުގައި ދުނިޔޭގެ ފުޓްބޯޅައަށް ހައިރާންކަމެއް ގެނުވި އާބާދީގެ ގޮތުން މަދު އައިސްލޭންޑެވެ. އައިސްލޭންޑް އެއްދަރަޖައިގެ ވެއްޓުމަކާއެކު މިވަގުތު އޮތީ ދުނިޔޭގެ 20 ވަނައިގައެވެ.