ސިއްރު ހެކިބަސް ނެގޭނެ ކަމަށް ސުޕްރީމް ކޯޓުން ކަނޑައަޅައިފި
16 އޯގަސްޓު 2020 | އާދީއްތަ 09:57ގާނޫނަށް އިސްލާހު ގެނައުމުގައި ދެގޮތަކަށް ރައްޔިތުންގެ މަޖިލީހަށް އަމަލު ކުރެވިދާނެ
ސުޕްރީމް ކޯޓުގައި، ވެބް ކޮންފަރެންސް މެދުވެރިކޮށް ކުރިއަށް ގެންދިޔަ، ސިއްރު ހެއްކާބެހޭ ޝަރީއަތުގެ އަޑުއެހުމުގެ ސްކްރީން ޝޮޓެއް
ޖިނާއީ މައްސަލަތަކުގައި ސިއްރުން ހެކިބަސް ނެގޭނެ ކަމަށް ސުޕްރީމް ކޯޓުން ކަނޑައަޅައިފި އެވެ.
ޖިނާއީ މައްސަލަތަކުގައި ސިއްރު ހެކިބަސް ނެގޭނެ ކަމަށް ސުޕްރީމް ކޯޓުން ކަނޑައަޅާފައި މިވަނީ، ކުރީގެ އުއްތަމަ ފަނޑިޔާރު އަބްދުﷲ ސައީދުގެ މައްޗަށް ކުރެވުނު ތުހުމަތަކާއި ގުޅިގެން ފުލުހުން ހިންގި ތަހުގީގަށް ފޯނު ނުދެއްވި ކަމަށް ބުނާ މައްސަލާގައި ކްރިމިނަލް ކޯޓުން އިއްވި ދޮޅު އަހަރުގެ ޖަލު ހުކުމް ހައިކޯޓުން ބާތިލްކޮށް، ހައި ކޯޓުގެ އެހުކުމުގައި ފާހަގަކޮށްފައިވާ ސިއްރު ހެއްކާބެހޭ ބައި، ބާތިލް ކޮށްދިނުމަށް ޕްރޮސެކިއުޓަރ ޖެނެރަލް (ޕީޖީ)ގެ އޮފީހުން އެދިވަޑައިގެންނެވުމާ ގުޅިގެންނެވެ.
ހައިކޯޓުގެ އެހުކުމުގައި ކަނޑައަޅާފައިވަނީ ޖިނާއީ އިޖުރާއާތުގެ ގާނޫނު މިހާރު އޮތްގޮތުން ސިއްރުން ހެކިބަސް ނުނެގޭނެ ކަމަށެވެ. ސަބަބަކީ ޖިނާއީ އިޖްރާއާތުގެ ގާނޫނުގެ 149 ވަނަ މާއްދާ އޮތްގޮތުން ސިއްރުން ހެކިބަސް ނެގޭނީ ހެއްކާބެހޭ ގާނޫނުގައި ބަޔާންކުރާ ހާލަތްތަކުގައި ކަމަށް ވެފައި، ސިއްރު ހެކީގެ އެއްވެސް ވާހަކައެއް ހެއްކާބެހޭ ގާނޫނުގައި ނެތުމެވެ.
މި މައްސަލައިގައި ޕްރޮސެކިއުޓަރ ޖެނެރަލްގެ އޮފީހުން ސުޕްރީމް ކޯޓުގައި އެދިފައިވަނީ، ހައިކޯޓުގެ 2020 ވަނަ އަހަރުގެ 387 ވަނަ ނަމްބަރު ޤަޟިއްޔާގައި މައްސަލަ ނިމުނު ގޮތުގެ ހުލާސާ ރިޕޯޓްގައި (ނ) ޖިނާއީ އިޖުރާއަތުގެ 149 ވަނަ މާއްދާގައި ހެކި ބަސް ދޭ މީހުން ހިމާޔަތްކޮށް ރައްކާތެރި ކުރެވޭގޮތަށް ހެކިބަސް ނެގޭނީ، ހެއްކާ ބެހޭ ގާނޫނުގައި ބަޔާންކޮށްފައި އޮންނަންޖެހޭ ހާލަތުގައި ކަމަށް ބަޔާންކޮށް، ހެކިބަސް ދޭ މީހުން ހިމާޔަތްކޮށް، ރައްކާތެރި ކުރެވޭގޮތަށް ހެކިބަސް ނެގުމަށް ކަނޑައަޅާ ގޮތެއް ނުވަތަ ގޮތްތަކެއް ނެތްކަމަށް އެގާނޫނަށް ބެލުމުން އެނގެން އޮތް ކަމަށް ނިންމާފައިވަނީ ޝައުރީ އަދި ގާނޫނީ އުސޫލާ ހިލާފަށްކަމަށް ކަނޑައަޅާ ދެއްވުމަށެވެ.
ސުޕްރީމް ކޯޓުން ކުރި ހުކުމުގައި ބުނެފައިވަނީ، އެހެން ޑިމޮކްރަޓިކް ގައުމުތަކުގައި ސިއްރުން ހެކިބަސް ނަގާ އުސޫލުން އަޑު ބަދަލު ކޮށްގެން އަދި ކާކުކަން ނޭނގޭ ގޮތަށް ނުވަތަ އެ ނޫން ވެސް ގޮތަކަށް ހެކިބަސް ނަގަން ހުށަހަޅައިފި ނަމަ، އެއާ މެދު ގޮތްތަކެއް ކޯޓުން ނިންމިދާނެ އެވެ. އަދި ސިއްރު ހެކިނަގާނެ ގޮތުގެ ގާނޫނެއް ނުވަތަ އުސޫލެއް ނެތުމަކީ ގާނޫނުއަސާސީން ލިބިދޭ އަސާސީ ހައްގެއް ނުދެވޭނެ ސަބަބެއް ނޫން ކަމަށާއި، ސިއްރު ހެކިބަސް ނުނެގި، އިންސާފުން ޝަރީއަތް ކުރެވުމުގެ ހައްގު ގެއްލުނަ ނުދިނުމަށް ކަމަށް ސިއްރު ހެކިބަސް ނެގޭނެ ކަމަށް އެހުކުމުގައި ވެއެވެ.
ސުޕްރީމް ކޯޓުގެ މިހުކުމުގައި އިތުރަށް ބުނެފައިވަނީ، މިމައްސަލައަށް ގާނޫނީ ހައްލެއް ގެނައުމަށް ރައްޔިތުންގެ މަޖިލީހަށް ދެ ގޮތަކަށް އަމަލު ކުރެވިދާނެ ކަމަށެވެ. އެގޮތުން ފުރަތަމަ ގޮތަކީ، ޖިނާއީ އިޖުރާއަތުގެ ގާނޫނުގެ 149 ވަނަ މާއްދާ އާއި ހެއްކާބެހޭ ގާނޫނަށް ހަވާލާދީފައިވާ ކަންކަމުގެ ތަފްސީލްތައް ހެއްކާބެހޭ ގާނޫނަށް ހަވާލާދިނުމަކާ ނުލައި، އެގާނޫނުގައި ހިމެނުން ކަމަށެވެ. ދެވަނަ ގޮތަކީ، ހެއްކާބެހޭ ގާނޫނު އިސްލާހުކޮށް، އެއިސްލާހުގައި ޖިނާއި އިޖުރާއަތުގެ ގާނޫނުގެ 149 ވަނަ މާއްދާގައި އެގާނޫނާ ހަވާލާދީފައިވާ ކަންކަމުގެ ތަފްސީލް ހިމެނުމެވެ.
މީގެއިތުރުން ހުކުމުގެ ތަފްސީލް ރިޕޯޓުގައި، ޒަމާނަށް އަންނަ ބަދަލުތަކާއެކު، ޖިނާއީ ކުށްކުރުމުގެ ވައްޓަފާޅިއާއި އެކުށްކުށާ ގުޅިގެން ހިންގޭ ތަހުގީގުތަކާއި، އެތަހުގީގުތަކުގައި ހެކި ހޯދުމަށް ކުރަންޖެހޭ މަސައްކަތާއި ހޯދޭ ހެކިތައް ބަދަލުވަމުން އަންނަ ކަމަށެވެ. އަދި ޝަރީއަތް ކުރުމުގައި ހެއްކާބެހޭ ކަންކަމުގައި ކުރެވޭ ބަހުސްތައް މިވަނީ ގިނަވެފައިކަމަށާއި، މިބަދަލުތަކާއި ހާލަތްތަކަށް ރިއާޔަތްކުރެވޭނެ ހެއްކާބެހޭ ގާނޫނެއް މިވަނީ އިހުނަށްވުރެ ބޮޑަށް ބޭނުންޖެހިފައި ކަމަށްވެސް، ސުޕްރީމް ކޯޓުގެ ހުކުމުގެ ތަފްސީލް ރިޕޯޓުގައި ބުނެފައި ވެއެވެ.
އެ މައްސަލަ ބެއްލެވި ފަނޑިޔާރުުންގެ ބެންޗުގެ އިސްފަނޑިޔާރަކީ މަހާޒު އަލީ ޒާހިރު އެވެ. ދެން ހިމެނިވަޑައިގަންނަވަނީ ފަނޑިޔާރު ޑރ. އަޒްމިރަލްދާ ޒާހިިރާއި ފަނޑިޔާރު އައިޝާ ޝުޖޫން މުހައްމަދެވެ.
