ހޯރަފުށި އެއާޕޯޓް ''ފެހި'' ކުރުން ކުރިޔަށް
16 އޯގަސްޓު 2020 | އާދީއްތަ 02:51އަމާޒު ހިފާފައިވަނީ އެއް ލައްކަ ގަސް އިންދަން
ހޯރަފުށި އެއާޕޯޓުގައި ގަސް އިންދުމުގައި އެމްއެންޑީއެފުން ހަރަކާތްތެރިވަނީ
ހއ. ހޯރަފުށި ރައްޔިތުންގެ އެންމެ ބޮޑު އެއް އުއްމީދު ކަމަށްވާ ހޯރަފުށި އެއާޕޯޓު، ''ފެހި'' ކުރުމުގެ ޕްރޮގްރާމްގެ ތެރެއިން ގިނަ އަދަދެއްގެ ގަސްތަކެއް އިންދައިފިއެވެ.
ހޮނިހިރު ދުވަހު ގިނައިން އިންދާފައިވަނީ ރުއް ގަހެވެ. އެ ރަށު ކައުންސިލުން ހިންގާ ޕްރޮގްރާމަށް އެހީތެރިވެ ދިނުމުގެ ގޮތުން އެމްއެންޑީއެފް ނޮދަން އޭރިޔާގެ ސިފައިންވެސް ވަނީ ބައިވެރިވެ، ގިނަ އަދަދެއްގެ ގަސް އިންދާފައެވެ.
ހޯރަފުށި ކައުންސިލްގެ ރައީސް މުހައްމަދު ވަހީދު ރާއްޖެ.އެމްވީ އަށް ވިދާޅުވީ، ބުދަ ދުވަހު އެ ދާއިރާގައި ހިމެނޭ ތުރާކުނު އަދި އުލިގަމް ރައްޔިތުންވެސް ގަސް އިންދުމުގެ ޕްރޮގްރާމްގައި ބައިވެރިވާނެ ކަމަށެވެ.
ރައްޔިތުންގެ މަޖިލީހުގައި ހޯރަފުށީ ދާއިރާ ތަމްސީލު ކުރައްވާ މެމްބަރު އަހުމަދު ސަލީމް (ސަލީމް) ކުރައްވާފައިވާ ޓްވީޓެއްގައި ވިދާޅުވީ، ގަސް އިންދުމުގެ ޕްރޮގްރާމް ގައި އެމްއެންޑީއެފް ބައިވެރިވުމަކީ ލިބިވަޑައިގެންނެވި އުފަލެއް ކަމަށެވެ. މަޖިލީހުގެ އެންވަޔަރަމެންޓް އެންޑް ކްލައިމެޓް ޗޭންޖް ކޮމިޓީގެ މުގައްރިރު ސަލީމް ސިފަކުރައްވާ ގޮތުގައި އިންދުނު ކޮންމެ ގަހަކީ ރައްޔިތުންނަށް ލިބުނު ބޮޑު ހަދިޔާއެކެވެ.
ހޯރަފުށި އެއާޕޯޓުގައި އެއްލައްކަ ގަސް އިންދުމުގެ ޕްރޮގްރާމް ލޯންޗު ކޮށްފައިވަނީ މި އަހަރުގެ ޖެނުއަރީ މަހުއެވެ. އެ މަޝްރޫއު ފައްޓަވައި ދެއްވީ ހޯރަފުއްޓަށް ނިސްބަށްވެ ވަޑައިގެންނަވާ ޓްރާންސްޕޯޓް މިނިސްޓަރު އައިޝަތު ނަހުލާއެވެ.
"ހޯރަފުށި އެއަޕޯޓު ފެހި ކުރުން، އަހަރުމެން އެންމެންގެ ޒިންމާ" މި ޝިއާރުގެ ދަށުން ކުރިޔަށްދާ ޕްރޮގްރާމްގައި އަމާޒު ހިފާފައިވަނީ އެއަޕޯޓުގެ ހުރިހާ ސަރަހައްދެއް ފެހިކޮށްލާށެވެ.
