ޔާމީނަށް ވަކީލުންނާ ބައްދަލުކުރަން ކަރެކްޝަނުން ހުރަހެއް ނާޅާ: އިމްރާން

ކޮރަޕްޝަންގެ ކުށް ސާބިތުވެ ފަސް އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީންގެ ވަކީލުންނަށް އެމަނިކުފާނާ ބައްދަލުކުރަން ފުރުސަތު ފަހިކޮށްދީފައިވާނެ ކަމަށާއި، އެއްވެސް އިރެއްގައި ވަކީލުންނާ ބައްދަކުރަން ކަރެކްޝަން ސަރވިސް އިން ހުރަސް އަޅާފައިވާ ނުވާނެ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.

އާދިއްތަ ދުވަހު ޔާމީންގެ ޝަރީޔަތް ކްރިމިނަލް ކޯޓުގައި ތާވާލުކޮށްފައިވާއިރު، އެމަނިކުފާނާ ބައްދަލު ކުރުމުގެ ފުރުސަތު ވަކީލުންނަށް ނުލިބޭތީ ޕީޕީއެމުން ވަނީ ކަންބޮޑުވުން ފާޅުކޮށްފައެވެ.

އެކަމާއި ގުޅިގެން ރާއްޖެޓީވީގެ ފަލަ ސުރުހީ ޕްރޮގްރާމްގައި އިމްރާން ވިދާޅުވީ، ވަކީލުންނާ ބައްދަލުނުކުރެވޭ ކަމުގެ ޝަކުވާ ރައީސް ޔާމީން ކުރެއްވި ދުވަހުން ފެށިގެން, ކަރެކްޝަނުން އިސްނަގައިގެން ވަކިލުންނާ ބައްދަލު ކުރެވޭނެކަން ހަމަޖައްސާފައިވާނެ ކަމަށެވެ.

އިމްރާން ވިދާޅުވީ، ދަތުރުފަތުރުގެ އިންތިޒާމް ހަމަނުޖެހިގެން ވަކިލުންނަށް، ޔާމީންއާ ބައްދަލު ނުކުރެވުމަކީ ހޯމް މިނިސްޓްރީން ނުވަތަ ކަރެކްޝަނުން ޒިންމާވާން ޖެހޭ ކަމެއް ކަމަށް ގަބޫލްނުކުރައްވާ ކަމަށެވެ.

ރައީސް ޔާމީން އަށް ޖަލުގައި ލިބެމުންދާ އިންތިޒާމްތަކާއި ބެހޭ ގޮތުން އިދިކޮޅުން ވަނީ ކަންބޮޑުވުން ފާޅުކޮށްފައެވެ. އޭގެ ތެރޭގައި ރައީސް ޔާމީން އަށް ޓީވީގެ ހިދުމަތް ނުލިބުމާއި، ފެތޭނެ އިންތިޒާމް މަގުފަހިވެފައި ނެތުން ހިމެނެއެވެ.

ހޯމް މިނިސްޓަރު ވިދާޅުވީ، މާފުށި ހިއްކަން ފެށުމާއި ގުޅިގެން އޮއިވަރު ގަދަވާތީ އެތަނުގައި ރައީސް ޔާމީން އަށް މޫދަށް އެރޭން ޓްރެކެއް ހެދުމުގެ މަސައްކަތް ފެށި ކަމަށެވެ. އެކަމަކު ލޮކްޑައުންއާ ހެދި އެކަން މަޑު ޖެހުނު ކަމަށެވެ. އިމްރާން ވިދާޅުވީ، ''މިކަމުން އަރައިގަތުމާއި'' އެކު އެކަން ހަމަޖެހިގެންދާނެ ކަމަށެވެ.

އަދި ޓީވީ މެދުކެނޑިގެން ދިޔަ ކަމަށާއި މިހާރު ހުރިހާ ޗެނަލްތަކެއް ލިބޭ ގޮތަށް ހަމަޖެހިފައިވާ ކަމަށް ވިދާޅުވިއެވެ.