ކިތަންމެ ފާޑުކިއުމެއް އަމާޒުވިޔަސް އެމްޑީޕީ މެމްބަރުން އެކަމެއް ހިތަކު ނާޅާނެ: ފައްޔާޒް
ފައްޔާޒުގެ އިތުބާރު ނެތްކަމުގެ މައްސަލަ މަޖިލީހަށް ވެއްދުމަށް ދަނީ މަސައްކަތް ކުރަމުން
އިކޮނޮމިކް މިނިސްޓަރ ފައްޔާޒް އިސްމާއިލް
ސަރުކާރު ހިންގާ ކޯލިޝަންގެ މައި ޕާޓީ އެމްޑީޕީއަކީ އެކި ޚިޔާލުތަކަށް މަރުހަބާ ކިޔާނެ ޕާޓީއެއްކަމަށާއި ކިތަންމެ ފާޑުކިއުމެއް އަމާޒުވިޔަސް އެމްޑީޕީ މެމްބަރުން އެކަމެއް ހިތަކު ނާޅާނެ ކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
އިކޮނޮމިކް މިނިސްޓަރކަމުގެ މަގާމުގައި ހުންނެވި ފައްޔާޒު އިސްމާއީލްގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ވެއްދުމުގެ މަސައްކަތް ޚުދު އެމަނިކުފާނު ނިސްބަތްވެވަޑައިގަންނަވާ އެމްޑީޕީގެ ބައެއް ޕާލިމެންޓް މެމްބަރުން ފަށާފައިވާއިރު، މިކަމާއި ގުޅިގެން ސަރުކާރާއި އިދިކޮޅު ކޯލިޝަނުންވެސް ދަނީ ފާޑުކިޔަމުންނެވެ.
އިތުބާރު ނެތްކަމުގެ މައްސަލާގައި އަމާޒުވާ ފާޑުކިޔުންތަކާ ގުޅުވައި، މިނިސްޓަރ ފައްޔާޒް ކުރެއްވި ޓުވީޓެއްގައި ވަނީ އެމްޑީޕީއަކީ ތަފާތު ޚިޔާލުތަކުގެ މީހުން އުޅެމުންދާ ޕާޓީއެއް ކަމަށާއި ކިތަންމެ ފާޑުކިއުމެއް އައި ނަމަވެސް ޕާޓީގެ މެމްބަރުންނަކީ "ހަން ބޯ" މެމްބަރުން ކަމަށެވެ. އަދި ކޮންމެ ހަމަލާއެއް އަމާޒުވިނަމަވެސް، އެކަމެއް ހިތުގައި ނާޅާނެ ކަމަށް ވެސް ވިދާޅުވިއެވެ.
ފައްޔާޒުގެ އިތުބާރު ނެތް ކަމުގެ މައްސަލަ ފެންމަތިވެފައިވާއިރު އެޕާޓީގެ ގައުމީ މަޖިލީހުގެ ވަޓްސްއެޕް ގުރޫޕުގައި ޕާޓީގެ ރައީސް، އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ ފައްޔާޒުއަށް ހޫނު ހަމާލާތަކެއް ރައްދުކުރައްވާފައެވެ. އެގޮތުން އެމަނިކުފާނު ވިދާޅުވެފައިވަނީ ފައްޔާޒުގެ އިތުބާރު ނެތްކަމުގެ މައްސަލަ ހުށަހެޅުމުގައި އެމަނިކުފާނު ބައިވެރިވެވަޑައިގަންނަވާ ކަމަށެވެ. އަދި އެ މައްސަލައަށް 30 މެމްބަރުންގެ ތާއީދު ލިބިފައިވާ ކަމަށާއި އެ މެމްބަރުންނަށް ދިމާކޮށް ނުފޫޒު ނުފޯރުވުމަށް އެމަނިކުފާނު އެދިވަޑައިގަންނަވާ ކަމުގައެވެ.
ބުރާސްފަތި ދުވަހުގެރޭ ރާއްޖެޓީވީގެ "ފަލަސުރުޙީ" ޕްރޮގްރާމްގައި ވާހަކަ ދައްކަވަމުން މިނިސްޓަރ ވިދާޅުވީ، އިތުބާރު ނެތް ކަމުގެ މައްސަލަ ކުރިއަށްދާކަމުން ދޭހަވަނީ މި ސަރުކާރު ގެނައުމުގެ މަޤްސަދުތައް ހާސިލުވަމުންދާ ކަމެވެ. އެގޮތުން އެކަން ރަނގަޅު ނަމަވެސް ނުވަތަ ގޯސް ނަމަވެސް، މިއަދު ސަރުކާރު ހިންގާ ޕާޓީގެ ވަޒީރެއްގެ އިތުބާރު ނެތްކަމަށް އަޑު އުފުލުމުގެ ޙައްޤު ހޯދާދެވިފައިވާކަން ދޭހަވާކަން މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ، "ނޯ ކޮންފިޑެންސް" ނަގަން ޖެހޭ ވަރުގެ ކަމެއް ކުރައްވާފައި ނުވާނެ ކަމުގެ ފުރިހަމަ ޔަޤީންކަން ދެއްވާ ކަމަށެވެ. އަދި އެ ޚަބަރު ލިބުމާ ހަމައަށްވެސް މިނިސްޓަރުގެ އެއްވެސް މައްސަލައެއް އޮތްކަން އެއްވެސް ފަރާތަކުން ހިއްސާ ކޮށްފައި ނުވާކަމަށް މިނިސްޓަރ ވިދާޅުވިއެވެ. އަދި ނޯ ކޮންފިޑެންސް މައްސަލަ ވައްދަން ސޮއިކުރެއްވި ބޭފުޅުންނަށް މި މައްސަލައާ ގުޅިގެން ގުޅުއްވަން ބޭނުންފުޅު ނުވާކަން ފާހަގަ ކުރައްވައި މިނިސްޓަރ ވިދާޅުވީ، މިއީ "އެ މަނިކުފާނުގެ ފައިޓެއް" ނޫންކަމަށެވެ.
