ޔުނައިޓެޑް އަރަބް އެމިރޭޓްސް (ޔޫއޭއީ) އިން އިސްރާއީލް ގުޅުން ގާއިމްކުރަން ނިންމި ނިންމުމަކީ ''ވަރަށް ބޮޑު ކުށެއް'' ކަމަށް އީރާނުގެ ރައީސް ހަސަން ރޫހާނީ ވިދާޅުވެއްޖެއެވެ.

ތާރީހީ މުހިންމު ސުލްހައިގެ އެބަސްވުމެއް އިސްރާއީލް ޔޫއޭއީ އާ ދެމެދު އެކުލަވާލާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕު ވިދާޅުވީ މިމަހުގެ 12ވީ ބުރާސްފަތި ދުވަހެވެ. މިނިންމުމާ ގުޅިގެން އިސްލާމީ ބައެއް ގައުމުތަކުން ދަނީ ކަންބޮޑުވުންފާޅު ކުރަމުންނެވެ.

އިސްރާއީލް ޔޫއޭއީ އާ ދެމެދު އެކުލަވާލާފައިވާ މިއެއްބަސްވުމަށް ރޫހާނީ ފާޑު ކިޔުއްވާ ވިދާޅުވީ މިއީ ޔޫއޭއިން މެދުއިރުމަތީ ސަރަހައްދުގައި އިސްރާއީލްއަށް ބާރުގަދަވާ ގޮތަށް ނިންމާ ނިންމުންތަކުގެ ތެރެއިން ނިންމުމެއް ކަމަށެވެ. ވަރުގަދަ އިންޒާރަކާއެކު ރޫހާނީ ވިދާޅުވީ ޔޫއޭއީގެ މިނިންމުން ރަނގަޅު ނޫން ކަމަށް ވިސްނޭނެ ކަމަށާއި، ނުބައި މަގަކަށް ނުދާނެ ކަމަށް އުންމީދު ކުރާ ކަމަށެވެ.

ޔޫއޭއީއާ އިޒްރޭލްގެ މިއެއްބަސްވުމުގެ ދަށުން އިސްރާއީލް ވަނީ ފަލަސްތީންގެ ހުޅަނގު އައްސޭރި ބިނާތައް އިސްރާއީލްގެ ބަޔަކަށް ހެދުން މަޑު ޖައްސާލަން އެއްބަސްވެފައެވެ. ދެގައުމުން ވަނީ ދެގައުމުގެ މެދުގައި ގާއިމްކުރާ ބައިލޭޓްރަލް ގުޅުން ގެންދާނެ ރޯޑްމެޕްއެއް ގާއިމްކުރުމަށް އެއްބަސްވެފައެވެ.

މިއެއްބަސްވުމަކީ ދެގައުމުން އެއްބަސްވުމަކަށް ނާދެވި، ދިގުލައިގެން ގޮސްފައިވާ އެއްބަސްވުމެކެވެ. ނަމަވެސް އެމެރިކާ މެދުވެރިއެއްގެ ރޯލު އަދާކޮށް މިއެއްބަސްވުން މިވަނީ އަވަސްކޮށްފައެވެ. މިއެއްބަސްވުމުގެ ސަބަބުން މެދުއިރުމަތީގެ ހަމަޖެހުން ރަނގަޅުވާނެ ކަމަށް ގައުމުތަކުގެ ލީޑަރުން ގަބޫލު ކުރެއެވެ.

މީގެއިތުރުން ކުރިއަށް އޮތް ހަފްތާގައި އިސްރާއީލް އަދި ޔޫއޭއީ އިން ބައިލޭޓްރަލް އެއްބަސްވުންތަކުގައި ސޮއިކުރާނެ ކަމަށް ވެސް ބޭރުގެ މީޑިއާތަކުގައި ރިޕޯޓު ކޮށްފައިވެއެވެ.

މިކަމުގެ ސަބަބުން ދެގައުމުން ވެސް ފަތުރުވެރިކަމާއި، ދެގައުމުގެ ދެމެދުގައިި ޑައިރެކްޓް ފްލައިޓް އޮޕަރޭޓް ކުރުމާއި، ޓެލެކޮމިއުނިކޭޝަން، ނެކްނޮލޮޖީ، ސިއްހީ އަދިވެސް އެކިއެކި ދާއިރާތަކުގައި އިންވެސްޓްކޮށް އެހީތެރިކަން ފޯރުކޮށްދިނުމަށް ފަސޭހަތަކެއް ވެގެންދާނެ ކަމަށެވެ.