ރެއާލްގައި ބޭލް ހޭދަކުރަނީ ބޭކާރު ވަގުތުތަކެއް: ކަލްޑެރޮން

ރެއާލް މެޑްރިޑްގައި ވޭލްސްގެ ތަރި ގެރެތު ބޭލް ހޭދަކުރަނީ ބޭކާރު ވަގުތުތަކެއް ކަމަށް އެ ކްލަބުގެ ކުރީގެ ރައީސް ރަމޮން ކަލްޑެރޮން ވިދާޅުވެއްޖެއެވެ.

މި ފަހަކަށް އައިސް ރެއާލްގެ ފުރަތަމަ އެގާރައިން ބޭލްއަށް ޖާގައެއް ނުލިބެއެވެ. ރެއާލަށް 2013 ވަނަ އަހަރުގެ ސީޒަނުގައި ބަދަލުވި ބޭލް، އެ ކްލަބާއެކު ހަދާފައިވާ އެއްބަސްވުން ހަމަވާނީ 2022 ވަނަ އަހަރުއެވެ.

ބޭލްގެ އޭޖެންޓް ދާދި ފަހުން ވަނީ ބޭލް އަކީ ލޯނަށް އެހެން ކްލަބަކަށް ބަދަލުވާނެ ކުޅުންތެރިއެއް ނޫން ކަމަށާއި، އޭނާ އަންނަ ސީޒަނުގައި ވެސް ފެންނާނީ ރެއާލްގެ ސްކޮޑުން ކަމަށް ބުނެފައެވެ. އަދި ރެއާލާއެކު ބޭލް ހަދައިފައިވާ އެއްބަސްވުމުގައި ބާކީ ދެ އަހަރު އެބައޮތް ކަމަށާއި، ބޭލް ރެއާލްގައި ހުރީ ހިތްހަމަޖެހިގެން ކަމަށްވެސް ބުންޏެވެ.

އެކަމަކު 2006-2009 ށް ރެއާލްގެ ރައީސްގެ މަގާމު އަދާކުރެއްވި ކަލްޑެރޮން ވިދާޅުވީ ބޭލް ފަދަ ކުޅުންތެރިއަކު ބެންޗުގައި އިންނަތަން ފެނުމުން ދެރަވާ ކަމަށާއި، އޭނާ އަކީ އަދިވެސް ހުނަރުހުރި މޮޅު ކުޅުންތެރިއެއް ކަމަށެވެ. އެހެންކަމުން ބޭލް ރެއާލްގައި ހޭދަކުރާ ކޮންމެ ހިނދުކޮޅަކީ އިސްރާފެއް ކަމަށްވެސް ވަނީ ވިދާޅުވެފައެވެ.

މި ފަހުން ރެއާލުން ކުޅުނު މެޗުތަކުގައި ބޭލްއަށް ކުޅުމުގެ ފުރުސަތު ލިބިފައި ނުވާއިރު، އޭނާ ބެންޗުގައި އިނދެ ނިދުމުގެ އިތުރުން މި ނޫންވެސް އެކިއެކި ކަންކަން ކުރަމުން އަންނާތީ ރެއާލްގެ ސަޕޯޓަރުން އަންނަނީ ފާޑު ކިޔަމުންނެވެ. އަދި ބޭލް މައްސަލައިގައި ރެއާލްގެ ސަޕޯޓަރުންވެސް ވަނީ އޭނާ ރެއާލް ދޫކޮށްލުމަށް ގޮވާލާފައެވެ.

މި ސީޒަނުގައި ބޭލް ރެއާލްގެ ޖާޒީގައި ފެނިގެން ގޮސްފައިވަނީ އެންމެ 14 މެޗުގައެވެ. މީގެ ކުރިން ރެއާލްގައި ބޭލް މޮޅު ކުޅުމެއް ދެއްކިއިރު، އޭނާ ވަނީ ރެއާލްއާއެކު ޖުމްލަ 12 ތަށި ހޯދާފައެވެ. އަދި ވަނީ ރެއާލްއަށް ކުޅެދިން 251 މެޗުގައި 105 ލަނޑު ކާމިޔާބުކޮށްފައެވެ.