ރާއްޖެއިން ފެނުނު ކޮވިޑް ކޭސްތަކުގެ އަދަދު 5000 ފަހަނައަޅާ ގޮސްފި!
އޭގެ ތެރޭގައި 107 ދިވެހިންވެސް ހިމެނޭ
ކޮވިޑް-19 ރެންޑަމް ސާމްޕްލިންގ ގެ ތެރެއިން- މި ފަހަކަށް އައިސް ގިނަ ދިވެހިންވެސް ވަނީ ޕޮޒިޓިވްވެފައި
ރާއްޖެއިން އިތުރު 143 މީހުން ކޮވިޑް-19 އަށް ޕޮޒިޓިވްވެ, ރާއްޖެއިން ރިޕޯޓްކުރެވުނު ޖުމްލަ ކޭސްތަކުގެ އަދަދު 5000 ފަހަނައަޅާ ގޮސްފިއެވެ.
އާދިއްތަ ދުވަހު ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ކުރި ޓްވީޓެއްގައި ބުނީ، އާދިއްތަ ދުވަހު ރާއްޖެއިން އިތުރު 143 މީހަކު ކޮވިޑަށް ޕޮޒިޓިވްވެފައިވާ ކަމަށެވެ.
އޭގެ ތެރޭގައި 107 ދިވެހިންނާއި، ބަންގްލަދޭޝްއަށް ނިސްބަތްވާ 28 މީހަކާއި، އިންޑިއާއަށް ނިސްބަތްވާ 6 މީހެއްގެ އިތުރުން، ނޭޕާލްއަށް ނިސްބަތްވާ 2 މީހަކު ހިމެނެއެވެ. މިއާއެކު ރާއްޖެއިން މި ބަލި ޖެހުނު މީހުންގެ ޖުމްލަ އަދަދަކީ 5041 އެވެ.
އެޗްޕީއޭއިން ބުނީ، އާދިއްތަ ދުވަހު ޕޮޒިޓިވްވި މީހުންގެ ތެރެއިން 140 މީހުންނަކީ މާލޭ ސަރަޙައްދަށް ނިސްބަތްވާ މީހުން ކަމަށެވެ. އަދި 3 މީހުންނަކީ ރަށްރަށުން ޕޮޒިޓިވްވި ކޭސްތަކެވެ.
އޭގެ އިތުރުން، އާދިއްތަ ދުވަހު އިތުރު 13 މީހަކު ކޮވިޑުން ރަނގަޅުވެފައިވާއިރު، ރާއްޖެއިން ކޮވިޑް-19 ޖެހިގެން ރަނގަޅުވި މީހުންގެ ޖުމުލަ އަދަދަކީ 2804 އެވެ. އަދި މި ވަގުތުގެ އެކްޓިވް ކޭސްތަކުގެ އަދަދަކީ 2218 އެވެ.
