ފަސް ކުޅުންތެރިން ބަދަލުކުރެވޭ ގަވާއިދަށް އަމަލުކުރަން ޕްރިމިއާ ލީގުގެ ކުލަބުތައް ދެކޮޅު

މެޗެއްގެ ތެރެއިން ފަސް ކުޅުންތެރިން ބަދަލުކުރެވޭ ގަވާއިދަށް އަންނަ ސީޒަނުގައި އަމަލުކުރަން އިނގިރޭސި ޕްރިމިއާ ލީގުގެ ކުލަބުތަކުން ދެކޮޅު ހަދައިފިއެވެ.

މެޗެއްގެ ތެރެއިން ފަސް ކުޅުންތެރިން ބަދަލުކުރެވޭ ގަވާއިދު އިންޓަނޭޝަނަލް ފުޓްބޯލް އެސޯސިއޭޝަން ބޯޑް (އައިފެބް) އިން ފާސްކޮށްފައިވަނީ ކޮވިޑް-19ށް ފަހު ފުޓްބޯޅަ އަލުން ފެށުމުގެ ގޮތުން ފީފާއިން ހުށަހެޅުމުންނެވެ. މި ބަދަލު ގެންނަން އައިފެބުން ފާސްކުރީ ކުޅުންތެރިންނަށް ލިބޭ ވަރުބަލިކަމާއި، އަނިޔާތައް މަދުކުރުމުގެ ގޮތުންނެވެ. އެކަމަކު މި ކަމުގައި އެންމެ ފަހު ގޮތްތަކެއް ނިންމާނީ ލީގުތަކުގެ ބޯޑުންނެވެ.

އެގޮތުން ކޮވިޑް-19 ގެ ބްރޭކަށްފަހު ޕްރިމިއާ ލީގު އަލުން ފެށިއިރު، ފަސް ކުޅުންތެރިން ބަދަލުކުރެވޭ ގަވާއިދަށް ވަނީ އަމަލުކޮށްފައެވެ.

މީގެ ކުރިން އައިފެބުން މި ގަވާއިދު ފާސްކޮށްފައި އޮތީ މި ސީޒަނަށް އެކަންޏެވެ. އެކަމަކު ފަހުން ވަނީ އަންނަ ސީޒަނުގައިވެސް މި ގަވާއިދަށް އަމަލުކުރެވޭނެކަން ހާމަކޮށްފައެވެ.

އެއާއެކު ޕްރިމިއާ ލީގުގެ 20 ކުލަބުގެ މެދުގައި އަންނަ ސީޒަނުގައި މި ގަވާއިދަށް އަމަލުކުރަން ފެނޭތޯ ނެގި ވޯޓުގައި، ކްލަބުތަކުން ވަނީ ފަސް ކުޅުންތެރިން ބަދަލުކުރެވޭ ގަވާއިދަށް އަމަލުކުރުމާ ދެކޮޅަށް ވޯޓު ދީފައެވެ.

ކޮވިޑް-19 އާ ގުޅިގެން މި ސީޒަނުގެ ޕްރިމިއާ ލީގު ދިގުލައިގެން ދިޔައިރު، މިދިޔަ ޖުލައި މަހުގެ 26 ވަނަ ދުވަހު ލީގު ވަނީ ނިންމާލާފައެވެ. އަދި އަންނަ ސީޒަނުގެ ޕްރިމިއާ ލީގު ފެށުމަށް ނިންމާފައިވަނީ އަންނަ ސެޕްޓެމްބަރު މަހުގެ 12 ވަނަ ދުވަހުއެވެ. އަދި ސީޒަން ހުޅުވުމުގެ ގޮތުން ކުޅޭ ކޮމިއުނިޓީ ޝީލްޑް މެޗު ވަނީ މި އޮގްސްޓް މަހުގެ 29 ވަނަ ދުވަހަށް ތާވަލުކޮށްފައެވެ.