ސާފްގައި އިތުރު ފުޓްބޯޅަ މުބާރާތްތަކެއް ބޭއްވުމަށް މަޝްވަރާކޮށްފި

ދުނިޔޭގެ ފުޓްބޯޅައިގެ މައި އިދާރާ ފީފާގެ އެހީތެރިކަމާއެކު ސާފް ސަރަހައްދުގައި، ފުޓްބޯޅައިގެ އިތުރު މުބާރާތްތަކެއް ބޭއްވުމަށް މަޝްވަރާކޮށްފިއެވެ.

ސާފް ސަރަހައްދުގެ ފުޓްބޯޅަ އެސޯސިއޭޝަންތަކުގެ ވެރިންގެ އިތުރުން ފީފާގެ ރައީސް ޖިއާނީ އިންފަންޓީނޯ އާއި އޭއެފްސީގެ ރައީސް ޝެއިޚް ސަލްމާން ބިން އިބްރާހިމް ޚަލީފާ އާއެކު ބުރާސްފަތި ދުވަހު ވީޑިއޯ ކޮންފަރެންސް މެދުވެރިކޮށް ބޭއްވި މި ބައްދަލުވުމުގައި ދެކުނު އޭޝިއާގައި ފުޓްބޯޅަ ކުރިއެރުވުމަށް ކުރެވެން ހުރި ކަންކަމާ މެދު ވަނީ މަޝްވަރާ ކޮށްފައެވެ.

މި ބައްދަލުވުމުގައި އެންމެ ބޮޑަށް މަޝްވަރާކުރެވުނު ކަންކަމަކީ ސާފް ގައުމުތަކުގެ މެދުގައި ކުޅެވޭ ފުޓްބޯޅަ މުބާރާތްތައް އިތުރުކޮށް، ދެ ޖިންސުގެ މުބާރާތްތައް ކުލަބު ލެވެލްގެ އިތުރުން ގައުމީ ޓީމުތަކުގެ އިތުރުން އުމުރުފުރާތަކުގެ މެދުގައި ބޭއްވުމަށެވެ.

މި ބައްދަލުވުމުގައި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ފަރާތުން ބައިވެރިވެވަޑައިގެންނެވީ ރައީސް ބައްސާމް އަދީލް ޖަލީލެވެ. ބައްދަލުވުމަށްފަހު ކުރެއްވި ޓްވީޓެއްގައި ބައްސާމް ވިދާޅުވީ މި ބައްދަލުވުމުގައި އެންމެ ބޮޑަށް ވާހަކަ ދެކެވުނީ މި ސަރަހައްދުގެ މުބާރާތްތައް އިތުރު ކުރުމުގެ ވާހަކަތައް ކަމަށާއި، މިއީ ވަރަށް އުންމީދީ ކުރިއެރުންތަކެއް ލިބޭނެ ބައްދަލުވުމެއް ކަމުގައި ދެކޭ ކަމަށެވެ.

މި ސަރަހައްދުގެ ކްލަބުތަކުގެ މެދުގައި އިތުރު މުބާރާތްތައް ބޭއްވުމަށް އަބަދުވެސް އެސޯސިއޭޝަންތަކުން އަންނަނީ މަޝްވަރާ ކުރަމުންނެވެ. އެކަމަކު އެ މަޝްވަރާތަކުގައި އަމަލީ ސިފައެއް އަންނަތަނެއް ނުފެނެއެވެ. އެކަމަކު ފީފާގެ ރައީސް އިންފަންޓީނޯ އާއި އޭއެފްސީގެ ރައީސް ޝެއިޚް ސަލްމާނާއެކު މި ބޭއްވުނު ބައްދަލުވުމުގެ ސަބަބުން އެކަމަށް އަމަލީ ސިފައެއް ފެންނާނެކަމުގެ އުންމީދު ވަނީ ބޮޑުވެފައެވެ.

މި ސަރަހައްދުގައި ގައުމީ ލެވެލްގައި ބާއްވަމުން އަންނަނީ ދެ މުބާރާތެވެ. އެއީ ސައުތު އޭޝިއަން ގޭމްސް އާއި ސާފް ސުޒުކީ ކަޕެވެ. މީގެ ތެރެއިން ދެއަހަރުން އެއް އަހަރު ބާއްވާގޮތަށް އޮންނަ ސާފް ސުޒުކީ ކަޕް ތާވަލުކުރާ ތާރީޚަށް ބޭއްވުމަކީ ދަތި ކަމެކެވެ.