މަސްތުގެ ހާލަތުގައި ހުރި ފުލުހެއް ހައްޔަރުކޮށްފި
މި މައްސަލަ ފުލުހުން ދަނީ ތަހުގީގު ކުރަމުން
ފުލުހުންގެ އިދާރާ
މަސްތުގެ ހާލަތުގައި ހުރި ފުލުހެއް ހައްޔަރުކޮށްފިއެވެ.
މޯލްޑިވްސް ޕޮލިސް ސަރވިސް އިން ބުނީ މި މައްސަލައިގައި ހައްޔަރު ކުރެވުނީ ފުލުހެއް ކަމަށާއި އޭނާ އަކީ ޗުއްޓީއަށް ކ. ކާށިދޫއަށް ދިޔަ، އެހެން ރަށެއްގައި މަސައްކަތް ކުރާ ފުލުހެއް ކަމަށެވެ.
މަސްތުގެ ހާލަތުގައި ކަމަށް ތުހުމަތު ކުރެވިގެން ހުކުރު ދުވަހު ކާށިދޫއިން ފުލުހުންގެ ބެލުމުގެ ދަށަށް ގެނެސް އޭނާ ދިރިއުޅޭ ގެ ބަލާ ފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއް އަޅާފައި ހުރި ތިން ރަބަރު ޕެކެޓު ފެނިފައިވާ ކަމަށެވެ.
މި މައްސަލައާއި ގުޅިގެން ހައްޔަރު ކުރެވުނީ އުމުރުން 33 އަހަރުގެ ފިރިހެނެއް ކަމަށް ބުނެ އެ ސަރވިސްއިން އިތުރަށް ބުނީ ފުލުހުންގެ ބެލުމުގެ ދަށަށް ގެނެސް އޭނާގެ ޔޫރިން ޓެސްޓު ކުރިއިރު މަސްތުވާތަކެއްޗަށް ޕޮޒިޓިވް ވެފައިވާކަމަށެވެ.
ފުލުހުންގެ ބެލުމުގެ ދަށަށް ގެނައި މި މީހާގެ ބަންދާއި މެދު ގޮތެއް ނިންމުމަށް ކާށިދޫ މެޖިސްޓްރޭޓް ކޯޓަށް ހާޒިރުކުރުމުން ހޯމް މިނިސްޓްރީން ކަނޑައަޅާ ތަނެއްގައި ބަހައްޓައިގެން ތަހުގީގު ކުރިއަށް ގެންދިއުމަށް 10 ދުވަހުގެ މުއްދަތެއް ވަނީ ދީފައެވެ.
މި މައްސަލަ ފުލުހުން ދަނީ ތަހުގީގު ކުރަމުންނެވެ.
