އެއަރ އިންޑިއާގެ ބޯޓެއް ޖައްސަން އުޅުމުގެ ތެރޭގައި ވެއްޓި މަރުވި މީހުންގެ އަދަދު 17ށް އަރައިފި
މަރުވި މީހުންގެ ތެރޭގައި ޕައިލެޓްވެސް ހިމެނޭ
އެއަރ އިންޑިއާގެ ބޯޓެއް ކެރަލާ އެއާޕޯޓަށް އަށް ޖައްސަނިކޮށް ވެއްޓުން
ދުބާއީން ފުރައިގެން ކަލިކަޓަށް ދަތުރު ކުރަމުންދިޔަ އެއަރ އިންޑިއާގެ ބޯޓެއް ރަންވޭއަށް ޖައްސަން އުޅުމުގެ ތެރޭގައި ވެއްޓި އޭގައި ތިބި މީހުންގެ ތެރެއިން 17 މީހުން މަރުވެއްޖެއެވެ.
ބޭރުގެ މީޑިއާތަކުން ރިޕޯޓު ކޮށްފައިވާ ގޮތުގައި މަތިންދާ ބޯޓު ވެއްޓި، 17 މީހުން މަރުވެފައިވާއިރު، އޭގެތެރޭގައި އެ ބޯޓުގެ ޕައިލެޓުން ވެސް ހިމެނެއެވެ.
ޖުމްލަ 174 ޕެސެންޖަރުން ތިބި މަތިންދާ ބޯޓުން ތިން ގަޑިއިރުގެ އޮޕަރޭޝަނަކަށް ފަހު ބޯޓުގައި ތިބި އެންމެން ނެރެފައިވާ ކަމަށް ވެސް ރިޕޯޓުތަކުގައި ވެއެވެ. އަދި 112 މީހަކަށް އެކި ވަރުގެ ޒަހަމް ލިބިފައިވެއެވެ.
މި ބޯޓު ޖައްސަން އުޅުނީ ދެކުނު އިންޑިއާގެ ކެރެލާ ސްޓޭޓްގެ ކަލިކަޓަށް ކަމަށް މައުލޫމާތު ލިބެއެވެ.
މިބޯޓު ވެއްޓުމާއެކު ދެ ބައިވެގެން ދިޔަކަމަށް މަންޒަރު ދުށް މީހުންނާ ހަވާލާދީ މީޑިއާތަކުން ރިޕޯޓު ކޮށްފައިވެއެވެ. ބޯޓު ޖައްސަން މަސައްކަތް ކޮށްފައިވަނީ ގަދައަށް ވާރޭ ވެހެނިކޮށެވެ.
