ކޮވިޑް-19 ޖެހުނު މީހުންގެ އަދަދު 19 މިލިއަނަށް

މުޅި ދުނިޔޭގައި ހަލުވިކަމާއެކު ފެތުރެމުން އަންނަ ކޮވިޑް ވައިރަސް 19 މިލިއަނަށްވުރެ ގިނަ މީހުންނަށް ޖެހިއްޖެއެވެ.

މިދިޔަ އަހަރުގެ ޑިސެމްބަރު މަހުން ފެށިގެން ދުނިޔޭގެ އެކި ކަންކޮޅުތަކުގައި ހަލުވިކަމާއެކު ފެތުރެމުން އަންނަ މި ވައިރަސް 19 މިލިއަނަށް ވުރެ ގިނަ މީހުންނަށް ޖެހިފައިވާ ކަމަށް ޖޯން ހޮޕްކިންސް ޔުނިވަރސިޓީން ހާމަކޮށްފައިވަނީ ހުކުރު ދުވަހުއެވެ. އެ ޔުނިވަރސިޓީގެ ތަފާސް ހިސާބުތައް ދައްކާ ގޮތުން ގިނަ ގައުމުތަކެއްގައި ކޮވިޑް-19 އަންނަނީ ހަލުވިކަމާއެކު ފެތުރެމުންނެވެ.

ނުރައްކާތެރި މިންވަރެއްގައި ބަލި ފެތުރެމުން އަންނަ ގައުމުތަކުގެ ތެރޭގައި އެމެރިކާ، އިންޑިއާ އަދި ބްރަޒިލް ހިމެނެއެވެ. އެމެރިކާ އަކީ މި ލިސްޓުގައި އެންމެ ކުރީގައި އުޅޭ ގައުމެވެ. މިހާތަނަށް އެ ގައުމުން 5 މިލިއަނަށް ވުރެ ގިނަ މީހުން ކޮވިޑް-19ށް ޕޮޒިޓިވްވެފައިވާ އިރު، ވޭތުވެދިޔަ 24 ގަޑިއިރު ތެރޭގައި ބައިލައްކައަށްވުރެ ގިނަ މީހުން ވަނީ އަލަށް ބަލި ޖެހިފައެވެ. އެ ގައުމުގައި މިހާތަނަށް މި ބަލީގައި 162 ހާހަށްވުރެ ގިނަ މީހުން މަރުވެފައިވާ އިރު އެންމެ ފަހުގެ ތަފާސް ހިސާބުތައް ދައްކާ ގޮތުން ވޭތުވެދިޔަ 24 ގަޑި އިރު ތެރޭގައި އެކަނި ވެސް ހާހަކަށް ވުރެ ގިނަ މީހުން ވަނީ މަރުވެފައެވެ.

ދެވަނައަށް މި ލިސްޓުގައި ހިމެނެނީ ބްރަޒިލްއެވެ. ބްރަޒިލްގައި ވެސް ނުރައްކާތެރި މިންވަރަކަށް ބަލި ފެތުރެމުން އަންނައިރު، މިހާތަނަށް އެ ގައުމުގައި ބަލި ޖެހުނު މީހުންގެ އަދަދު ވަނީ 3 މިލިއަނާ ގާތް ކޮށްފައެވެ. އެ ގައުމުގައި މިހާތަނަށް 2.9 މިލިއަން މީހުންނަށް ކޮވިޑް-19 ޖެހިފައިވާއިރު، ފާއިތުވެދިޔަ 24 ގަޑިއިރުގެ ތެރޭގައި 54 ހާހަށްވުރެ ގިނަ މީހުން އަލަށް ބައްޔަށް ޕޮޒިޓިވް ވެފައިވެއެވެ. އެ ގައުމުގައި މިހާތަނަށް 98 ހާހަށްވުރެ ގިނަ މީހުން މަރުވެފައިވާއިރު، މިއީ ދުނިޔޭގައި ދެވަނަ އަށް އެންމެ ގިނައިން މީހުން މަރުވި ގައުމެވެ. ފާއިތުވި 24 ގަޑިއިރު ތެރޭގައި އެކަނި ވެސް ހާހަކަށްވުރެ ގިނަ މީހުން ވަނީ މަރުވެފައެވެ.

ދުނިޔޭގެ ދެވަނަ އަށް އެންމެ ބޮޑު އާބާދީ އަދި އެންމެ ބޮޑު އެއް އިގްތިސާދު ކަމަށްވާ އިންޑިއާގައި ވެސް ކޮވިޑް-19 ޖެހުނު މީހުންގެ އަދަދު ވަނީ 2 މިލިއަނަށް ވުރެ މައްޗަށް އަރާފައެވެ. ހުކުރު ދުވަހު އާންމުކޮށްފައިވާ މައުލޫމާތުތައް ދައްކާ ގޮތުން އެ ގައުމުގައި 2،025،409 (ދެ މިލިއަން ފަންސަވީސް ހާސް ހަތަރު ސަތޭކަ ނުވަ) މީހުންނަށް ވަނީ ޖެހިފައެވެ.

އިންޑިއާގެ ހެލްތް އެންޑް ވެލްފެއަރ މިނިސްޓްރީން އާންމުކޮށްފައިވާ ތަފާސް ހިސާބުތައް ދައްކާ ގޮތުން ވޭތުވެދިޔަ 24 ގަޑިއިރު ތެރޭގައި އެކަނި ވެސް 62،538 (ފަސްދޮޅަށް ދެހާސް ފައްސަތޭކަ ތިރީސް އަށް) މީހަކު އަލަށް ބައްޔަށް ޕޮޒިޓިވް ވެފައިވެއެވެ. އިންޑިއާ ގައި މިހާތަނަށް 41 ހާހަށްވުރެ ގިނަ މީހުން ބަލީގައި މަރުވެފައިވާއިރު، އެ ގައުމުގައި ބަލި ޖެހުނު މީހުންގެ ތެރެއިން 1.3 މިލިއަން މީހުން ވަނީ ބަލިން ރަނގަޅުވެފައެވެ. މުޅި ދުނިޔޭގައި 19.2 މިލިއަން މީހުންނަށް ކޮވިޑް-19 ޖެހިފައިވާއިރު، ފާއިތުވި 24 ގަޑިއިރު ތެރޭގައި އެކަނި ވެސް 280 ހާހަށް ވުރެ ގިނަ މީހުން ވަނީ އަލަށް ބައްޔަށް ޕޮޒިޓިވް ވެފައެވެ. މުޅި ދުނިޔެއިން މިހާތަނަށް 12.3 މިލިއަން މީހުން ވަނީ ބަލިން ރަނގަޅު ވެފައެވެ. މުޅި ދުނިޔެއިން މިހާތަނަށް 7 ލައްކައަށް ވުރެ ގިނަ މީހުން ވަނީ ވައިރަސް ޖެހިގެން މަރުވެފައިވެއެވެ.

ކޮވިޑް-19 މުޅި ދުނިޔޭގައި ހަލުވި ކަމާއެކު ފެތުރެމުން އަންނަ އިރު، މި ބައްޔަށް ވެކްސިނެއް ހޯދުމުގެ މަސައްކަތް އެތައް ސަތޭކަ ފާމަސޫޓިކަލްސްއަކުން އަންނަނީ ކުރަމުންނެވެ. ދުނިޔޭގެ ސިއްހަތު ޖަމްއިއްޔާ އިން ގެންދަނީ 140ށް ވުރެ ގިނަ އަދަދެއްގެ ވެކްސިންއަށް ވަމުންދާ ގޮތް ގަވައިދުން ބަލާ މޮނިޓަރ ކުރަމުންނެވެ.

ދުނިޔޭގެ ސިއްހަތު ޖަމްއިއްޔާގެ ރެކޯޑްތަކަށް ބަލާއިރު، ކޮވިޑް-19ށް ވެކްސިނެއް ހޯދުމުގެ މަސައްކަތް މިހިސާބަށް އައި އިރު، 139 ވެކްސިނެއް އަދި އުޅެނީ އިންސާނުންގެ ހަށިގަނޑުގައި ޓެސްޓް ކުރާ ހިސާބަށް ނުފޯރައެވެ. ފޭސް 1 މިހާތަނަށް 25 ވެކްސިނެއް ދަނީ އަޖުމަ ބަލަމުންނެވެ. ފޭސް 1 ފުރިހަމަ ކޮށް ފޭސް 2 ގައި 17 ވެކްސިނެއް ފާހަގަވާއިރު، 7 ވެކްސިނެއް ފޭސް 3ށް ވަނީ ވާސިލް ވެފައެވެ. ފޭސް 3 ބަރާބަރަށް ފުރިހަމަ ކުރެވުން ދެން އޮންނާނީ އާއްމުކޮށް އެ ވެކްސިނެއް ބޭނުން ކުރުމުގެ ހުއްދަ ހޯދުމަށް ކުރަން ޖެހޭ މަސައްކަތާއި، ގިނަ އަދަދަކަށް އެ ވެކްސިން އުފެއްދުމަށް ކުރަން ޖެހޭ މަސައްކަތްތައް ކުރުމެވެ.