ރާޖަޕަކްސައަށް ރައީސް އަދި ނައިބު ރައީސް ތަހުނިޔާ ވިދާޅުވެއްޖެ
7 އޯގަސްޓު 2020 | ހުކުރު 04:39ލަންކާއަށް ކުރިއެރުމާއި ކާމިޔާބު ލިބޭނެ ކަމާމެދު ޔަގީން ކުރަން
މަހިންދަ ރާޖަޕަކްސަ
ސްރީލަންކާގެ ގާނޫނު ހަދާ މަޖިލީހުގެ އިންތިހާބު ކާމިޔާބު ކުރެއްވި، އެ ގައުމުގެ ބޮޑު ވަޒީރު އަދި ކުރީގެ ރައީސް މަހިންދަ ރާޖަޕަކްސައަށް ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު މަރުހަބާ ދަންނަވައިފިއެވެ.
ތަހުނިޔާ ފޮނުއްވާ ރައީސް ސޯލިހު ވިދާޅުވީ އެގައުމަށް ބޮޑެތި ކުރިއެރުންތަކާއި ފާގަތިކަން ލިބޭނެކަން ޔަގީން ކުރައްވާ ކަމަށެވެ. އަދި ރާއްޖެއާއި ލަންކާއާ ދެމެދު އޮތް ގުޅުންވެސް އިތުރަށް ހަރުދަނާ ވެގެންދާނެ ކަމަށް ރައީސް ސޯލިހު ވިދާޅުވިއެވެ.
އިތުރު ކާމީޔާބީއަށް އެދިވަޑައިގެން ނައިބު ރައިސް ފައިސަލް ނަސީމު ވިދާޅުވީ މަހިންދަ ރާޖަޕަކްސައަށް ލީޑަރޝިޕްގައި ލަންކާއަށް އިތުރު ކާމިޔާބީތައް ލިބިގެންދާނެ އުންމީދު ކުރައްވާ ކަމަށެވެ.
މީގެ އިތުރުން ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ ޑިމަކްރަސީގެ ރީތި މިސާލު ވޯޓުން ދައްކާފައިވާ ކަަމަށެވެ. ލަންކާގެ ރައީސް ގޯޓާބަޔަ ރާއްޖަޕަކްސައަށާއި މަހިންދަ ރާއްޖަ ޕަކްސައަށް ނަޝީދު ވަނީ ތަހުނިޔާ ފޮނުއްވާފައެވެ.
ބުރާސްފަތި ދުވަހު ލަންކާގައި ބޭއްވި އިންތިޚާބުގައި 72 ގޮނޑި ކާމިޔާބު ކޮށްފައި ވަނީ ރާޖަޕަކްސަގެ ޕޮޑުޖަނަ ޕާޓީ (އެސްއެލްޕީޕީ)އިންނެވެ. އަދި ސަޖިތު ޕްރޭމަދާސަގެ ޔުނައިޓެޑް ޕީޕަލްސް ފްރޮންޓް (އެސްޖޭބީ) އެލަޔަންސަށް ލިބިފައި ވަނީ 23 ގޮނޑި ކަމަށް ރިޕޯޓުތަކުން ބުނެއެވެ.
މިއަދު ލަންކާއިން ދެކެމުން އަންނަ ޒަމާނީ ތަރައްގީގެ ބާނީ އަކީ ނުވަތަ މޭސްތިރި އަކީ މަހިންދަ ރާޖަޕަކްސަގެ ގޮތުގައި އެޤައުމުގެ ގިނަ ރައްޔިތުން ސިފަކުރެއެވެ.
ރާޖަޕަކްސަގެ ޒަޢާމަތުގައި ރާއްޖެއާއެކު ވަރަށް ގާތްގުޅުމެއް ބޭއްވެވި އެވެ. އަދި ރާއްޖެ އެހީއަށް ބޭނުންވެއްޖެ ކޮންމެ ހިނދެއްގައި އެމަނިކުފާނު ވަރަށް އީޖާބީ ގޮތެއްގައި އެކަންކަން ކޮށްދެއްވި އެވެ. އަދި އެކި ދާއިރާތަކުން ގުޅުން ބަދަހި ކުރައްވާ، އެއްބަސްވުން ތަކުގެ ތެރެއިން ދެގައުމުން އަންނަނީ އެހީތެރިވަމުންނެވެ. ރާއްޖެ މިނިވަން މުސްތަގިއްލު ގައުމެއްގެ ގޮތުގައި އިއުލާނު ކުރެވިގެން ދިއުމާއެކު، އެންމެ ފުރަތަމަ ސިޔާސީ ގުޅުން ގާއިމު ކުރި ގައުމުތަކުގެ ތެރޭގައި ސްރީީލަންކާ ހިމެނެއެވެ. އޭރުއްސުރެ ދެގައުމުގެ ދެމެދުގައި އަޚުވަތްތެރި ގާތް ގުޅުމެއް ވަނީ ދަމަހައްޓާފަ އެވެ. މީގެ އެންމެ މުހިންމު ދައުރެއް އަދާ ކުރެއްވި ބޭފުޅަކީ ރާޖަޕަކްސަ އެވެ.
