ސަން ސިޔާމަށް ދީފައިވާ ސޮވެރިން ގްރެންޓީއާ ގުޅޭ މައުލޫމާތު ހޯދުމަށް މީކާއީލް އެދިވަޑައިގެންފި
ޗައިނާގެ އެގްޒިމް ބޭންކުން 127 މިލިއަން ޑޮލަރު (ދެ ބިލިއަން ރުފިޔާ) ލޯން ސަން ސިޔާމްގެ ކުންފުންޏަށް ދިނީ ސޮވެރިން ގެރެންޓީ ދިނުމުން
ދ. މީދޫ ދާއިރާގެ މެމްބަރު އަހުމަދު ސިޔާމް މުހައްމަދު: ކުރީގެ ރައީސް ޔާމީންގެ ވެރިކަމުގައި ދައުލަތުން ޒިންމާވާގޮތަށް 127 މިލިއަން ޑޮލަރުގެ ލޯނެއް އެގްޒިމް ބޭންކުން ދޫކޮށްފައިވޭ
މީދޫ ދާއިރާގެ މެމްބަރު އަދި މަޝްހޫރު ވިޔަފާރިވެރިޔާ އަހުމަދު ސިޔާމް މުހައްމަދަށް ދައުލަތުން 2017 ވަނަ އަހަރު ދިން ސޮވެރިން ގްރެންޓީއާ ގުޅޭ ގޮތުން މައުލޫމާތު ހޯދުމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް އެދިވަޑައިގެންފިއެވެ.
މީކާއީލް ވަނީ، ރައްޔިތުންގެ މަޖިލީހުގެ ރައީސް މުހައްމަދު ނަޝީދުއަށް މިކަމާ ގުޅޭ ސިޓީއެއް ފޮނުއްވާ، ފިނޭންސް މިނިސްޓަރ އިބްރާހީމް އަމީރާ ހަތަރު ސުވާލެއް ކުރެއްވާ އެ ސުވާލުތަކުގެ ޖަވާބު ލިޔުމުން ހޯއްދަވާ ދެއްވުމަށް އެދިވަޑައިގަންނަވާފައެވެ.
މީކާއީލް ކުރައްވާފައިވާ ސުވާލުތަކުގެ ފުރަތަމަ ސުވާލެއްގެ ގޮތުގައި ވަނީ، 2017 ވަނަ އަހަރު ދައުލަތުން ސޮވެރިން ގްރެންޓީ ދީގެން ސަން ސިޔާމް ރިސޯޓްސް ޕްރައިވެޓް ލިމިޓެޑަށް ޗައިނާގެ އެގްޒިމް ބޭންކުން ދޫކޮށްފައިވާ 127 މިލިއަން ޑޮލަރުގެ ލޯނު ޑިފޯލްޓް ވެފައިވޭތޯއެވެ.
ދެވަނަ ސުވާލެއްގެ ގޮތުގައި، ލޯނު ޑިފޯލްޓް ވެފައިވާނަމަ ދައުލަތުން އެ ލޯނަަށްވާ ފައިސާ ދެއްކުމުގެ އިންތިޒާމް ހަމަޖެހިފައިވޭތޯއާއި އަދި އެ އިންތިޒާމު ހަމަޖެހިފައިވާނަމަ ފައިސާ ދެއްކުމަށް ނިންމާފައިވާ މުއްދަތަކީ ކޮބައިތޯ އެވެ.
ތިންވަނަ ސުވާލެއްގެ ގޮތުގައި ވަނީ، ދައުލަތުގެ ފަރާތުން އެ ލޯން ދެއްކުމަށް އެކްޓެންޝަނަކަށް އެދިފއިވާނެތޯ އާއި އަދި އެދިފައިވާނަމަ، މިއެކްޓެންޝަން ހަމަޖައްސަނީ ޖީ20 ޑެޓް މޮރެޓޯރިއަމްގެ ދަށުންތޯއެވެ. އަދި ހަތަރުވަނަ ސުވާލެއްގެ ގޮތުގައި މީކާއީލް ކުރައްވާފައިވަނީ، އެ ލޯން ދެއްކުމަށް އެކްޓެންޝަނެއް ދޭނަމަ މިކަމުގެ ސަބަބުން ދައުލަތުގެ މާލީ އިންތިޒާމަށް ކުރާނެ އަސަރަކީ ކޮބައިތޯއެވެ.
މީކާއީލްގެ މި ހަތަރު ސުވާލަށް ފިނޭންސް މިނިސްޓަރ އަމީރު ފަރާތުން ލިޔުމުން ޖަވާބު ހޯއްދެވުމަށް މަޖިލީހަށް ހުށަހަޅުއްވާފައިވަނީ މިމަހުގެ 4 ވަނަ ދުވަހުއެވެ.
ރައީސް ޔާމީންގެ ވެރިކަމުގައި ސަން ސިޔާމްގެ، ސަން ސިޔާމް ރިސޯޓްސް ޕްރައިވެޓް ލިމިޓެޑަށް ޗައިނާގެ އެގްޒިމް ބޭންކުން ދޫކޮށްފައިވާ 127 މިލިއަން ޑޮލަރުގެ (ދެ ބިލިއަން ރުފިޔާ) ލޯނަކަށް ދައުލަތުން ވަނީ ސޮވެރިން ގެރެންޓީ ދީފައެވެ. އަދި މި ލޯނުގެ ތެރެއިން 10 މިލިއަން ޑޮލަރު ޑިފޯލްޓްވުމުން އެ ފައިސާ މި އޮގަސްޓް މަހުގެ ތެރޭގައި ދެއްކުމަށް ދިވެހި ސަރުކާރަށް ޗައިނާގެ އެގްޒިމް ބޭންކުން އަންގާފައިވާ ކަމަށް ވަނީ މައުލޫމާތު ލިބިފައެވެ.
