ގުރައިދޫގައި ބިދޭސީއެއްގެ ގަޔަށް ވަޅި ހަރާ މަރާލި މީހާއަށް މަރުގެ ދައުވާ އުފުލައިފި
4 އޯގަސްޓު 2020 | އަންގާރަ 16:28ބިދޭސީ މީހާ މަރާލީ ހިނގި ހަމަނުޖެހުމެއްގެ ތެރެއިން
ތ. ގުރައިދޫ، ބިދޭސީ މީހާގެ ހަށިގަނޑުގެ ދެތިން ތަނަކަށް ވަޅިން ވަނީ ހަމަލާދީފައިވާ ކަމަށް ކައުންސިލުން ބުނޭ
ތ. ގުރައިދޫގައި ބިދޭސީއެއްގެ ގަޔަށް ވަޅި ހަރާ މަރާލި މީހާއަށް މަރުގެ ދައުވާ އުފުލައިފިއެވެ.
21 މެއި 2020 ވަނަ ދުވަހު ތ. ގުރައިދޫ ކަންޑަރު ސަރަހައްދުގައި ހުރި ސައިޓެއްގެ ތެރޭގައި ފުން ޒަހަމްތަކަކާއެކު މަރުވެފައި އޮއްވާ ފެނުނީ ބަގްލަދޭޝް ރައްޔިތެއް ކަމަށްވާ، ޝާހް އަލަމްއެވެ.
މި މައްސަލައާ ގުޅިގެން ޕަބްލިކް ޕްރޮސިކިއުޓަރ އަހްމަދު ޝަފީއު ވިދާޅުވީ ބަންގްލަދޭޝް ރައްޔިތެއް ކަމަށްވާ ބަބުލް މިއަހްގެ މައްޗަށް ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާ ކުރުމުގެ ގާނޫނުގެ 5 ވަނަ މާއްދާގެ ދަށުން ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާ ކްރިމިނަލް ކޯޓަށް ހުށަހަޅާފައިވާ ކަމަށެވެ. ބަބުލްގެ މައްޗަށް މި ކުށް ސާބިތުވެއްޖެނަމަ މަރުގެ އަދަބު އަންނާނެއެވެ.
އެ މީހާ މަރާލާފައިވަނީ ދެ މީހުންގެ ތެރޭގައި ހިނގި ހަމަނުޖެހުމެއްގެ ތެރެއިންކަން މިހާތަނަށް ތަހުގީގަށް ހާމަވެފައިވާ ކަމަށް ފުލުހުން ވަނީ ބުނެފައެވެ.
ގުރައިދޫ ކައުންސިލުން "ރާއްޖެއެމްވީ"އަށް މައުލޫމާތު ދީފައިވާ ގޮތުން، ބިދޭސީ މީހާގެ ހަށިގަނޑުގެ ދެތިން ތަނަކަށް ވަޅިން ވަނީ ހަމަލާދީފައެވެ. އެ ބިދޭސީ މީހާ އެއްލާލާފައި އޮއްވައި ފެނުނީ އޭނާ މަސައްކަތް ކުރަމުންދިޔަ ސައިޓުގެ ކުރިމަތީގައި އޮންނަ ސަރަހައްދުން ކަމަށް ކައުންސިލުން ވަނީ މީގެ ކުރިން ބުނެފައެވެ.
