ސްޕެއިން އަދި ރެއާލް މެޑްރިޑްގެ ކުރީގެ ގޯލްކީޕަރު އިކާ ކަސިއަސް ފުޓްބޯޅަ ކުޅުން ހުއްޓާލައިފިއެވެ.
އުމުރުން 39 އަހަރުގައި ފުޓްބޯޅަ ކުޅުން ހުއްޓާލިކަން އިއުލާން ކުރަމުން ކަސިއަސް ބުނީ ގިނަ ދުވަސްތަކެއްވަންދެން ފުޓްބޯޅަ ކުޅެވިއްޖެ ކަމަށާއި، ދަތުރުކުރަންފެށި މަންޒިލާ ހަމައަށް ވާސިލްވެވިއްޖެ ކަމަށެވެ.
ކަސިއަސް ކުޅުން ހުއްޓާލިކަން އިއުލާން ކުރުމާއެކު ރެއާލުން ވަނީ ބަޔާނެއް ނެރެފައެވެ. މި ބަޔާނުގައި ބުނީ ކަސިއަސް އަކީ އެ ކްލަބުގެ ތާރީޚުގައި ދުށް އެންމެ މޮޅު ގޯލްކީޕަރު ކަމަށާއި، ރެއާލުން އަބަދުވެސް ކަސިއަސްއާ އެކުގައި ވާނެ ކަމަށެވެ. އަދި ރެއާލްގެ ކުޅުންތެރިންނާއި ސަޕޯޓަރުން އަދި މުވައްޒަފުންގެ ނަމުގައި ކަސިއަސް ކޮށްދިން ޚިދުމަތަށް ޝުކުރު އަދާކުރާ ކަމަށްވެސް ވަނީ ބުނެފައެވެ.
ކަސިއަސް ފުޓްބޯޅަ ކުޅުން ހުއްޓާލިކަން އިއުލާން ކުރިއިރު، އޭނާ ދާދި ފަހުން ވަނީ ރެއާލްގެ ރައީސް ފްލޮރެންޓީނޯ ޕެރޭޒްގެ އެޑްވައިޒަރުގެ މަގާމާއި ހަވާލުވެފައެވެ. އަދި މިއަހަރުގެ ފެބްރުއަރީ މަހުގެ ތެރޭގައި ސްޕެއިންގެ ފުޓްބޯޅަ އިދާރާގެ ރައީސްގެ މަގާމަށް ކުރިމަތިލާނެކަން އިއުލާންކުރި ކަސިއަސް، ކޮވިޑް-19 ގެ ސަބަބުން ކެމްޕެއިންކުރަން ވަގުތު ނުވާނެ ކަމަށް ބުނެ ފަހުން ވަނީ ނަން އަނބުރާ ގެންގޮސްފައެވެ.
ފުޓްބޯޅަ ކުޅުން ހުއްޓާލިކަން އިއުލާން ކުރިއިރު، ކަސިއަސް އެންމެ ފަހުން ކުޅެފައިވަނީ ޕޯޗުގަލްގެ ޕޯޓޯއަށެވެ. ރެއާލްގައި 16 އަހަރު ހޭދަކުރުމަށްފަހު ކަސިއަސް ޕޯޓޯއަށް ބަދަލުވީ 2015 ވަނަ އަހަރުއެވެ.
އެކަމަކު މިދިޔަ އަހަރުގެ މެއި މަހު ޕޯޓޯގެ ފަރިތަކުރުންތަކުގެ ތެރެއިން ހާޓްއެޓޭކެއް ޖެހިގެން ކަސިއަސް ހޮސްޕިޓަލުން ފަރުވާ ހޯދިއިރު، ދެ މަސް ފަހުން އަލުން ފަރިތަކުރުންތަކަށް ނުކުތް ނަމަވެސް، އޭގެ ފަހުން ކުޅުމުގައި ބައިވެރިވެފައެއް ނުވެއެވެ. އެކަމަކު ވަނީ މި ސީޒަނުގެ ޕޯޗުގީޒް ލީގުގެ އިތުރުން ޕޯޗުގީޒްގެ ކަޕްގެ ތަށި ޕޯޓޯއާއެކު އުފުލާލާފައެވެ.
ރެއާލްގެ އިތުރުން ސްޕެއިންގެ ގައުމީ ޓީމުގެ ކެޕްޓަންގެ މަގާމު އަދާކޮށްފައިވާ ކަސިއަސް ވަނީ އޭނާގެ ކެރިއަރުގައި ޖުމްލަ 24 ތަށި ކާމިޔާބުކޮށްފައެވެ. އަދި ވަނީ ކްލަބު ލެވެލްގެ އިތުރުން ބައިނަލްއަގުވާމީ ލެވެލްގެ ހުރިހާ ބޮޑެތި މުބާރާތެއް ކާމިޔާބުކޮށްފައެވެ. އެގޮތުން ރެއާލް އާއެކު ސްޕެނިޝް ލީގާއި ޔުއެފާ ޗެމްޕިއަންސް ލީގު ކާމިޔާބުކުރުމުގެ އިތުރަށް، އޭނާ ވަނީ ސްޕެއިން އާއެކު ފީފާ ވޯލްޑް ކަޕްގެ އިތުރުން ޔޫރޯ ފުޓްބޯޅަ މުބާރާތްވެސް ކާމިޔާބުކޮށްފައެވެ.
