ރެއިން ފެށިގެން މާލޭގެ މިސްކިތްތަކުގައި އަލުން ޤުނޫތު ނާޒިލާ ކިޔަން ފަށައިފި
4 އޯގަސްޓު 2020 | އަންގާރަ 12:37ޤުނޫތު ނާޒިލާ ކިޔަން ފަށާފައިވަނީ ހޯމަ ދުވަހުގެ ރެއިން ފެށިގެން
ފުރަބަންދަށް ލުއި ދިނުމަށްފަހު މާލެސިޓީގެ މިސްކިތެއްގައި ޖަމާއަތުގައި ކުރި ފުރަތަމަ ހުކުރު ނަމާދަށް ފަހު މީހުން މިސްކިތުން ފައިބަނީ
މާލޭސިޓީގެ މިސްކިތްތަކުގައި އަލުން ޤުނޫތު ނާޒިލާ ކިޔަން ފަށައިފިއެވެ.
ރާއްޖެއެމްވީއަށް މައުލޫމާތު ދެއްވަމުން އިސްލާމިކް މިނިސްޓަރ ޑރ. އަޙްމަދު ޒާހިރު ޢަލީ ވިދާޅުވީ އަލުން ޤުނޫތު ނާޒިލާ ކިޔަން ފަށާފައިވަނީ ހޯމަ ދުވަހުގެ ރެއިން ފެށިގެން ކަމަށެވެ. މިނިސްޓަރު ވިދާޅުވީ އަލުން ޤުނޫތު ނާޒިލާ ކިޔަން ފަށާފައިވަނީ ރާއްޖޭގައި ކޮވިޑުގެ ހާލަތު އިތުރަށް ގޮސްވުމާއި ގުޅިގެން ކަަމަށެވެ.
މާލެސިޓީ ލޮކްޑައުންއަށް ދިޔުމުގެ ކުރިން މިސްކިތްތަކުގައި ޤުނޫތު ނާޒިލާ ކިޔާކަން ފާހަގަކުރައްވާ އިސްލާމިކް މިނިސްޓަރު ވިދާޅުވީ އެކަން މަޑުޖައްސާލާފައި އޮތީ ލޮކްޑައުންއަށް ލުއިދީ، މިސްކިތްތައް އަލުން ހުޅުވާލުމަށްފަހު، ނަމާދު ކުރާއިރު މިސްކިތުގައި ގިނަ ވަގުތު ހޭދަވިޔަ ނުދިނުމަށް ކަަމަށެވެ. އެހެންނަމަވެސް އަތޮޅު ތެރޭގެ ރަށްތަކުގައި މެދުކެނޑުމެއް ނެތި ޤުނޫތު ނާޒިލާ ކިޔަމުން ދިޔަ ކަމަށް އިސްލާމިކް މިނިސްޓަރު ވިދާޅުވިއެވެ.
ދުނިޔޭގައި އުފެދޭ ބަލިމަޑުކަމައި ނުރައްކާތެރި ރޯގާ ތަކާއި ގުޅިގެން މީގެ ކުރިން ވެސް ރާއްޖޭގައި ފަރުޟު ނަމާދުތަކުގައި ޤުނޫތު ނާޒިލާ ކިޔާފައިވެއެވެ.
ގުނޫތު ނާޒިލާ އަކީ ބޮޑު ކާރިސާއެއް ކުރިމަތިވުމުން ނަމާދުގެ ފަހު ރަކްއަތުގައި ކިޔާ ހާއްސަ ގުނޫތު (ދުއާ) އެކެވެ. މާތް ރަސޫލާގެ ދުވަސްވަރުވެސް ބޮޑެތި ކާރިސާތައް ދިމާވުމުން ނަމާދުގެ ތެރޭގައި ގުނޫތު ނާޒިލާ ކިޔުއްވިއެވެ. އެގޮތުން ހަނގުރާމައެއްގައި ވަރަށް ގިނަ ހާފިޒުން ޝަހީދުވުމާއި ގުޅިގެން ވެސް ވަނީ ގުނޫތު ނާޒިލާ ކިޔުއްވާފައެވެ.
