ސައިކަލުގައި އުޅޭ އިރުވެސް ގައިދުރުކަން ބެހެއްޓުމަށް ޑރ. މުހައްމަދު އަލީ އިލްތިމާސްކޮށްފި
2 އޯގަސްޓު 2020 | އާދީއްތަ 08:33މަގުމަތީގައި އުޅޭއިރު ގައިދުރުކަން ބެހެއްޓުން މުހިއްމު: ޑރ. މުހައްމަދު އަލީ
އައިޖީއެމްއެޗްގެ އެތެރެހަށީގެ ޑޮކްޓަރު، ޑރ. މުހައްމަދު އަލީ
އިޖުތިމާއީ ގައިދުރުކަން ބަހައްޓަން ޖެހޭނީ ހަމައެކަނި މަގުމަތީގައި ހިނގާބިނގާވެ އުޅޭ ވަގުތުތަކުގައި ނޫން ކަމަށާއި، ސައިކަލާއި ބައިސްކަލުގައި އުޅޭ އިރުވެސް ގައިދުރުކަން ބަހައްޓަން ޖެހޭ ކަމަށް ޑރ. މުހައްމަދު އަލީ ވިދާޅުވެއްޖެއެވެ.
ރާއްޖެޓީވީގެ ފަލަސުރުޙީ ޕްރޮގްރާމުގައި އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ އެތެރެހަށީގެ ޑޮކްޓަރު، ޑރ. މުހައްމަދު އަލީ ވަނީ ރާއްޖެއިން ފެންނަ ކޮވިޑް ކޭސްތައް އިތުރުވާން މެދުވެރިވާ ސަބަބުތަކާ ގުޅޭގޮތުން ވާހަކަދައްކަވާފައެވެ. އެގޮތުން ރައްޔިތުންނަށް ދެވިފައިވާ އިރުޝާދާ އެއްގޮތަށް އަމަލުނުކުރުމަކީ، އެއް ސަބަބު ކަމަށް ވިދާޅުވިއެވެ. އެގޮތުން، ތޮއްޖެހިފައިވާ މާލޭގެ މަގުތަކުގައި އުޅޭ ވަގުތު ގައިދުރުކަން ނުބަހައްޓާ މަންޒަރު ފެންނަކަން ފާހަގަކުރައްވާ އެކަން އެހެން ނުކުރުމަށް ޑރ. މުހައްމަދު އަލީ ރައްޔިތުންނަށް ނަސޭހަތްތެރިވިއެވެ.
މާލެ ސަރަހައްދުގެ ފުރަބަންދު ހާލަތަށް ލުއިތައް ދިނުމުގެ ތިންވަނަ މަރުހަލާ އިއުލާނުކުރި ފަހުން، ކޮވިޑަށް ޕޮޒިޓިވްވެގެން ރިޕޯޓްކުރެވޭ އަދަދުތައް ވަނީ އިތުރުވެފައެވެ. އެގޮތުން ނިމިދިޔަ ދެ ހަފުތާގެ ތެރޭގައި ރެކޯޑް އަދަދަކަށް ޕޮޒިޓިވް ކޭސްތައް ރިޕޯޓްކުރެވުނެވެ.
ޑރ. މުހައްމަދު އަލީ ވަނީ ބަލީގެ ނުރައްކާ އަދިވެސް ފިލައިގެން ނުދާކަމަށް ވިދާޅުވެ ކުރިން ދެވުނު އިރުޝާދުތައް ތަކުރާރުކޮށްފައެވެ. އެގޮތުން ޒަރޫރީ ބޭނުމެއްގައި މެނުވީ ބޭރަށް ނުދިއުމަށާއި، ގެއަށް ވަނުމަށް ފަހު އަތް ދޮވުމަށާއި، ހުރިހާ ވަގުތަކެއްގައި ގައިދުރުކަން ބެހެއްޓުމަށް ވަކިން ހާއްސަ ސަމާލުކަމެއް ބެހެއްޓުމަށް އިލްތިމާސްކުރެއްވިއެވެ.
