މި އަހަރުގެ އަޟްޙާ އީދު ބައްދަލުކުރީ، ކޮވިޑް-19ގެ ސަބަބުން ހިތްދަތި ތަޖުރިބާތަކެއް ކުރަންޖެހިފައިވާ ދުވަސްވަރެއްގައި ކަމަށާއި، މި ދަނޑިވަޅަކީ ކޮވިޑުގެ ސަބަބުން ހީނަރުވެފައިވާ ގުޅުންތައް އަލުން ބަދަހިކޮށް އާލާކުރުމަށް ލިބޭ ރަނުގެ ފުުރުސަތެއް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

އަޟްޙާ އީދުގެ މުނާސަބަތުގައި ރައީސް ސޯލިހު ފޮނުއްވި ހިޠާބުގައި އެމަނިކުފާނު ވިދާޅުވީ، ކޮވިޑުގެ ސަބަބުން ދިރިއުޅުމުގެ އާންމު އާދަކާދަތަކާ މުޅިން ހިލާފަށް އުޅެން ޖެހިފައިވިޔަސް، އާއިލީ ގުޅުންތަކާއި ރަޙްމަތްތެރިކަމުގެ ގުޅުންތައް ބަދަހިކޮށް އާލާކުރުމުގެ ފުރުސަތުތައް ތަނަވަސްވެފައި އެބައޮތް ކަމަށެވެ.

ކިތަންމެ ދުރުގައި ތިބެން ޖެހުނަސް، ގޭގެއަށް ޒިޔާރަތް ނުކުރެވުނަސް، އަދި ބޮޑެތި އެއްވުންތަކާއި ހަފްލާތައް ނުބޭއްވުނަސް، އާއިލާގެ މީހުންގެ ހާލު އަހުވާލު އޮޅުންފިލުވައި، އީދުގެ ތަހުނިޔާ ބަދަލުކުރުމަށް ހާއްސަ ސަމާލުކަމެއް ދިނުމަކީ މިފަދަ މުނާސަބަތެއްގައި ނުހަނު ބޭނުންތެރި ކަމެއް ކަމަށް ރައީސް ސޯލިހު ފާހަގަކުރެއްވިއެވެ.

އަޟްޙާ އީދަކީ މުސްލިމުންގެ މެދުގައި ގުޅުން ދެމެހެއްޓުމާއި، އެހީތެރިވުމާއި، އެއްބާރުލުމުގެ އިތުރުން އެތައް ގުރުބާނީއެއްގެ ޒިކްރާ އައުކޮށްދޭ މަތިވެރި މުނާސަބަތެއް ކަމަށް އެމަނިކފާނު ވިދާޅުވިއެވެ.

ރައީސް ވިދާޅުވި ގޮތުގައި މި އީދަކީ މުޖުތަމައުގެ ހަމަޖެހުމާއި ސުލްހަވެރިކަން ދެމެހެއްޓުމުގެ މުހިންމުކަން އަޅުގަނޑުމެންގެ ހަނދާނަށް ގެނެސްދޭ އީދެކެވެ. އެހެންކަމުން ހައްޖުގެ އިތުރުން އީދާ ގުޅިފައިވާ ހިކްމަތްތައް ހިތްމައްޗަށް ގެނެސް، އެކަކު އަނެކަކަށް މައާފުކޮށް، އަހްވަންތަކަމުގެ ގުޅުން ކުރިއަށް ނެރެ، ސުލްހަޔާއި ހަމަޖެހުމަށް އިސްކަން ދިނުމަށް ރައީސް އިލްތިމާސް ކުރެއްވިއެވެ.

ރައީސްގެ ހިޠާބު ނިންމަވާލައްވަމުން އެމަނިކުފާނު ވަނީ އިޖުތިމާއި ގައިދުރުކަމަށް ހާއްސަ ސަމާލުކަމެއް ދިނުމާއެކު އާންމުންގެ ތެރެއަށް ނުކުމެ އުޅުން ވީވަރަކުން މަދުކުރެއްވުމަށް ގޮވާލައްވާފައެވެ.