އީދު ޚުތުބާ: ކަމާބެހޭ ފަރާތްތަކުގެ އިރުޝާދުތަކަށް ބޯލަނބާ!

ކޮވިޑް-19 ގެ ދަތި އުނދަގޫތަކުން އަރައިގަތުމަށްޓަކައި ކަމާބެހޭ ފަރާތްތަކުގެ އިރުޝާދުތަކަށް ބޯލެނބުމަށް އަޟްޙާ ޢީދު ނަމާދުގެ ޚުތުބާގައި ހަނދާންކޮށްދީފިއެވެ.

"ޢީދުލް އަޟްޙާގެ ޙަޤީޤަތާއި މަޤްސަދުތައް" މި މައުޟޫގެ މައްޗަށް ބިނާކޮށްފައިވާ ޚުތުބާގައި ބުނީ، މީގެ ދުވަސްކޮޅެއް ކުރިން މި ޤައުމު ތަޙައްމަލު ކުރަމުން ދިޔައީ ދަތި އުނދަގޫ ދުވަސްތަކެއް ކަމަށެވެ. އެހެން ނަމަވެސް، މިހާރު ﷲ ގެ ރަޙުމަތްފުޅުން މިސްކިތްތަކުގައި ރައްކާތެރިކަމުގެ ފިޔަވަޅުތަކާއެކު ނަމާދު ކުރެވޭ ކަމަށާއި، އާންމު ދިރިއުޅުމުގައިވެސް ކުރިއާ އަޅާބަލާއިރު ބޮޑެތި ލުއިތަކެއް ލިއްބައިދީފައިވާ ކަމަށް ޚުތުބާގައި ބުނެފައިވެއެވެ.

ޚުތުބާގައި އިތުރަށް ބުނީ، ކުރިއަށް އޮތް ތަނުގައިވެސް ކަމާބެހޭ ފަރާތްތަކުން ދެމުން ގެންދާ އިރުޝާދުތަކަށް ބޯލެނބުމަށް ހަނދާންކޮށްދޭ ކަމަށެވެ.

އޭގެ އިތުރުން، ޙައްޖާއި ޢީދު ޝަރުޢު ކުރެއްވުމުގެ މަޤްސަދަށް އަލިއަޅުވާލައްވާ ޚުތުބާގައި އިތުރަށް ބުނީ، އެންމެ މުހިއްމު އެއް ޚިކުމަތަކީ އުއްމަތުގެ އެއްބައިވަންތަކަން ދެމެހެއްޓުން ކަމަށެވެ. އަދި ސުލްޙަމަސަލަސްކަމާއި، އަދާވަތްތެރި ނުވުމުގެ އިތުރުން، އެކަކު އަނެކެއްގެ މިނިވަންކަމަށް އަރައިނުގަތުމަށް ތަރުބިއްޔަތު ލިބިގެންދާކަމަށްވެސް ޚުތުބާގައި ބުނެފައިވެއެވެ.

ޢީދުގައިވެސް އިސްލާމީ މިންގަނޑުތަކާ އެއްގޮތަށް އުފާ ފާޅު ކުރުމަށް ހަނދާންކޮށްދެއްވައި ޚުތުބާގައި ބުނީ، ޢީދަކީ ތަފާތު ކުރުމެއްނެތި، ހުރިހާ މުސްލިމުންނަށްވެސް އަންނަ އުފާވެރި މުނާސަބަތެއް ކަމަށެވެ. އަދި އިސްލާމީ ޢީދުގައި އޮންނާނީ އިސްލާމީ މިންގަނޑުތަކާ އެއްގޮތަށް އުފާ ފާޅުކޮށް މުނިފޫހި ފިލުވުން ކަމަށްވެސް ޚުތުބާގައި ބުނެފައިވެއެވެ.

އޭގެ އިތުރުން، ޤައުމުގެ މިނިވަންކަމުގެ ރަމްޒުކަމުގައިވާ އިސްލާމް ދީން ހިމާޔަތް ކުރުމަށް ދިވެހި ދައުލަތުގެ ވެރިންނާއި ރައްޔިތުންނަށް ޚުތުބާގައި ވަނީ ގޮވާލާފައެވެ. އަދި މިފަދަ ދުވަހެއްގައި މާތް ﷲ އަށްޓަކައި ކުރެވޭ ޤުރުބާނެއްގެ މަތިވެރިކަންވެސް ޚުތުބާގައި ހަނދާން ކޮށްދެއްވާފައިވެއެވެ.