އަނެއްކާ ވެސް ރިކޯޑެއް، 152 މީހުން ޕޮޒިޓިވް!
30 ޖުލައި 2020 | ބުރާސްފަތި 16:35މާލެސިޓީން 142 މީހަކު ވަނީ ޕޮޒިޓިވްވެފައި
ލޮކްޑައުންއަށް ލުއި ދިންފަހުން ގިނަ އަދަދެއްގެ ދިވެހިން ދަނީ ޕޮޒިޓިވްވަމުން
ރާއްޖެއިން އިތުރު 152 މީހަކު ކޮވިޑް-19 އަށް ޕޮޒިޓިވްވެއްޖެއެވެ.
ބުރާސްފަތި ދުވަހު ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ތަރުޖަމާނު ޑރ. ނަޒްލާ ރަފީގް ވިދާޅުވީ ބުރާސްފަތި ދުވަހުގެ ނިޔަލަށް 152 މީހަކު ޕޮޒިޓިވްވެފައިވާ ކަމަށެވެ.
ޕޮޒިޓިވްވި މީހުންގެ ތެރޭގައި 89 ދިވެހިން ހިމެނޭއިރު ބަންގްލަދޭޝްގެ 54 މީހުންނާއި އިންޑިއާގެ 5 މީހުންނާއި ސްރީލަންކާއަށް ނިސްބަތްވާ 4 މީހުން ހިމެނެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ)ގެ ތަފާސް ހިސާބުތަކަށް ބަލާއިރު، މާލެ ސިޓީން ޕޮޒިޓިވްވެފައިވަނީ 142 މީހެއެވެ. އަދި އަތޮޅުތެރޭގެ ރަށްތަކުން 10 މީހަކު ޕޮޒިޓިވްވެފައިއެވެ.
ރިކޯޑު އަދަދަކަށް ބުރާސްފަތި ދުވަހު މީހުން ޕޮޒިޓިވްވެފައިވާއިރު، ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމުލަ އަދަދު ވަނީ 3719ށް އަރާފައެވެ.
ބުރާސްފަތި ދުހަހު 14 މީހުން ބަލިން ފަސޭހަވެފައިވާއިރު، ރާއްޖެއިން ކޮވިޑް-19 ޖެހިގެން ރަނގަޅުވި މީހުންގެ އަދަދު ވަނީ 2568ށް އަރާފައެވެ. އަދި މިވަގުތުގެ އެކްޓިވް ކޭސްތަކުގެ އަދަދަކީ 1120 އެވެ.
އޭގެ އިތުރުން، މިވަގުތުވެސް 657 މީހަކަށް އައިސޮލޭޝަން ފެސިލިޓީތަކުގައި ފަރުވާދެމުން ދާކަމަށް އެޗްޕީއޭގެ ތަފާސް ހިސާބުތަކުން ދައްކައެވެ. އަދި 59 މީހަކު ހޮސްޕިޓަލުގައި ދަނީ ފަރުވާ ދެމުންނެވެ.
ޚާއްސަކޮށް ފުރަބަންދަށް ލުއި ދިނުމުގެ 3 ވަނަ މަރުޙަލާ ފެށި ފަހުން ދުވާލެއްގެ މައްޗަށް ފެންނަމުންދާ ކޭސްތަކުގެ އަދަދު ދަނީ އިތުރުވަމުންނެވެ. އަދި ގިނަ އަދަދެއްގެ ދިވެހިން ދަނީ ޕޮޒިޓިވްވަމުންނެވެ.
މިހާތަނަށް ރާއްޖޭގައި ކޮވިޑް-19 ޖެހިގެން 16 މީހަކު ވަނީ މަރުވެފައެވެ.
