ފުލުހުންގެ ލޯންޗެއްގައި އަލިފާން ރޯކޮށްލި މައްސަލާގައި ދެ މީހެއްގެ މައްޗަށް ޓެރަރިޒަމް ދައުވާކޮށްފި

މިއަހަރުގެ މާރިޗް 22 ގައި ލ. ގަން، ތުނޑި ބަނދަރު ސަރަހައްދުގައި އޮތް މޯލްޑިވްސް ޕޮލިސް ސަރވިސްގެ ލޯންޗެއްގައި އަލިފާން ރޯކޮށްލި މައްސަލައާ ގުޅިގެން ދެ މީހެއްގެ މައްޗަށް ޓެރަރިޒަމް ދައުވާ ކުރުމަށް ޕްރޮސެކިއުޓަރ ޖެނެރަލްގެ އޮފީހުން ކްރިމިނަލް ކޯޓަށް ހުށަހަޅައިފި އެވެ.

ޕީޖީގެ އޮފީހުން މިމައްސަލާގައި ޓެރަރިޒަމްގެ ދައުވާ ކޮށްފައިވަނީ، މޫސާ އިނާސް، ލ. ގަން ތުނޑި، ކަޅައިދޫފިހިޔާގެ އާއި އަބްދުއްލަތީފް އިބްރާހީމް، ލ. ގަން ތުނޑި، ލަވްސައިޑްގެ މައްޗަށެވެ.

އިނާސް އާއި އަބްދުއްލަތީފްގެ މައްޗަށް ދައުވާ ކޮށްފައިވަނީ، ޓެރަރިޒަމް މަނާކުރުމުގެ ގާނޫނުގެ ދަށުން، ޓެރެރިސްޓް ޖަމާއަތަކަށް ތާއީދުކުރާ މީހެއްކަމަށް ދޭހަވާ ފަދަ ލިޔުންތަކަކާއި ވީޑިއޯ އެމީހުގެ ގެންގުޅުނު ކަމަށް ތުހުމަތު ކުރެވޭ ހާޑް ޑިސްކަކުން ފެނިފައިވާތީ އެވެ.

ދައުވާ ކުރި ސަބަބެއް ކަމަށް ބުނެފައިވަނީ، ފުލުހުންގެ ލޯންޗެއް ރޯކޮށްލި މައްސަލައާ ގުޅިގެން، ކޯޓު އަމުރެއްގެ ދަށުން އިނާސްގެ ގެ ބަލާ ފާސްކުރުއިރު، ފެނުނު ލެޕްޓޯޕެއްގެ ހާޑް ދިސްކް ތަހުލީލު ކުރިއިރު، ޓެރެރިސްޓް ޖަމާއަތްތައް ކަމަށްވާ، އިސްލާމިކް ސްޓޭޓް އާއި އަލްގައިދާ އަށް ތާއީދު ކުރާކަން ދޭހަކޮށްދޭ ލިޔުންތަކާއި ވީޑިއޯ ފެނިފައިވާތީ ކަމަށެވެ.

މީގެއިތުރުން، ކޯޓު އަމުރެއްގެ ދަށުން، އަބްދުއްލަތީފްގެ ގެ ބަލާ ފާސްކުރިއިރު، ފެނުނު ހާޑް ޑިސްކެއް ތަހުލީލު ކުރިއިރު، ޓެރެރިސްޓް ޖަމާއަތްތައް ކަމަށްވާ ޖަބްޙަތުއްނުޞްރާ އާއި އަލްގައިދާއަށް ތާއީދު ކުރާކަން ދޭހަކޮށްދޭ ލިޔުންތައް ފެނިފައިވާތީ ކަމަށް ވެސް ބުނެފައި ވެއެވެ.

މި ދައުވާ އެ ދެ މީހުންގެ މައްޗަށް ސާބިތު ވެއްޖެނަމަ، އެއް އަހަރާއި ތިން އަހަރާ ދެމެދުގެ މުއްދަތަކަށް ޖަލަށް ލެވޭނެއެވެ.