އަމްރިތާގައި ފަރުވާ ހޯދަމުންދާ ދިވެހިންގެ ހާލު ނައިބު ރައީސް އޮޅުންފިލުވައިފި
30 ޖުލައި 2020 | ބުރާސްފަތި 10:10ހުރިހާ ބަލި މީހުންގެ ހާލު ވަކި ވަކިން އޮޅުން ފިލުއްވެވި
ނައިބް ރައީސް ފައިސަލް ނަސީމް
ކޮވިޑް-19 އާ ގުޅިގެން ރާއްޖެއިން ބޭސް ނުކުރެވޭ ބަލިތަކަށް ފަރުވާ ހޯދަން އިންޑިއާގެ އަމްރިތާ ހޮސްޕިޓަލަށް ދިޔަ ދިވެހިންގެ ހާލު ނައިބު ރައީސް ފައިސަލް ނަސީމް، އޮޅުން ފިލުއްވައިފިއެވެ.
ނައިބު ރައީސް ވަނީ ބުރާސްފަތި ދުވަހު އަމްރިތާ ހޮސްޕިޓަލްގެ އިންޓަރނޭޝަނަލް ޕޭޝަންޓް ރިލޭޝަންސް، ބާބޫ މެނަން އާއި ފޯނުން ގުޅުއްވާފައެވެ. ރައީސް އޮފީހުން ބުނީ، ދިވެހި ބަލި މީހުންނަށް ސިއްހީ ފަރުވާދިނުމަށް އިންޑިއާ އަށް ދަތުރު ކުރުމުގެ ފުރުސަތު ފަހިކޮށްދީ، އެ ގައުމުގައި ސިއްހީ ފަރުވާ ހޯދުމުގެ މަގު ފަހިކޮށްދިނުމުގައި އިންޑިއާ ސަރުކާރުން އަދާކޮށްފައިވާ ދައުރަށް ނައިބު ރައީސް ޝުކުރު އަދާކުރެއްވި ކަމަށެވެ.
އަދި، މި ހާލަތުގައި ވެސް، އެ ހޮސްޕިޓަލުގައި ފަރުވާ ހޯދަމުންދާ ދިވެހި ބަލި މީހުންނަށް ދެމުންގެންދާ ހިދުމަތްތަކަށް އަލިއަޅުއްވައިލައްވާ އެމަނިކުފާނު ވަނީ، ކޮވިޑް-19 އާއި ގުޅިގެން އެ ހޮސްޕިޓަލަށް ކުރިމަތިވެފައިވާ ދަތިތަކާއި ގޮންޖެހުންތަކާއި މެދު ސުވާލު ކުރައްވާފައެވެ.
އޭގެ އިތުރުން އެ ކަންކަން ހައްލުކޮށް، ހިދުމަތްތަކުގެ ފެންވަރު އިތުރަށް ހަރުދަނާ ކުރުމަށް އެ ހޮސްޕިޓަލުން ކުރަމުންގެންދާ މަސައްކަތްތަކުގެ މައުލޫމާތު ވެސް އެމަނިކުފާނު އޮޅުން ފިލުއްވާފައިވާ ކަމަށް ރައީސް އޮފީހުން މައުލޫމާތުދެއެވެ.
ނައިބު ރައީސް ވަނީ އަމްރީތާ ހޮސްޕިޓަލުގައި ފަރުވާ ހޯދަމުންދާ ދިވެހި ބަލި މީހުންގެ ހާލު ވަކިވަކީން އައްސަވާފައެވެ. ދިވެހިންނާއި ގުޅޭ ކަންކަމުގެ މައުލޫމާތު އޮޅުންފިލުއްވައި، އެ މީހުންގެ ކަންކަން ވަރަށް ގާތުން ބެލުމަށް ބާބޫ މެނަންގެ ކިބައިން އެމަނިކުފާނު އެދިވެޑައިގެންނެވި ކަމަށް ރައީސް އޮފީހުން މައުލޫމާތުދެއެވެ.
