ޖުލައި މަހު ޕެންޝަނުގެ ގޮތުގައި 117 މިލިއަން ރުފިޔާ ދޫކޮށްފި

ޖުލައި މަހު ޕެޝަނުގެ ގޮތުގައި 117 މިލިއަނަށްވުރެ ގިނަ ރުފިޔާ ދޫކޮށްފި އެވެ.

ރާއްޖޭގެ ޕެންޝަން އޮފީހުން ހާމަކޮށްފައިވާ ތަފާސްހިސާބުތަކަށް ބަލާއިރު، އެންމެ ގިނަ އަދަދަކަށް ފައިސާ ދޫކޮށްފައިވަނީ އަސާސީ ޕެންޝަނުގެ ގޮތުގަ އެވެ. އެއީ 86،286،402.70ރ (އަށްޑިހަ ހަ މިލިއަން، ދެލައްކަ އަށްޑިހަ ހަހާސް، ހަތަރުސަތޭކަ ދެ ރުފިޔާ، ހަތްދިހަ ލާރި) އެވެ. އަސާސީ ޕެންޝަން ދޫކޮށްފައިވަނީ، 18172 މީހަކަށެވެ.

ދެން އެންމެ ގިނަ އަދަދަކަށް ފައިސާ ދޫކޮށްފައިވަނީ، ދައުލަތުގެ ވަޒީފާތަކުން ރިޓަޔަރކުރާ ފަރާތްތަކަށް ދައުލަތުން ދޭ އިނާޔަތްތަކަށެވެ. އެގޮތުން، އެފަދަ ފަރާތްތަކަށް 17،891،680.21ރ (ސަތާރަ މިލިއަން، އަށްލައްކަ ނުވަދިހައެއްހާސް، ހަސަތޭކަ އަށްޑިހަ ރުފިޔާ، 21 ލާރި) ދޫކޮށްފައިވެއެވެ. ދައުލަތުގެ ވަޒީފާތަކުން ރިޓަޔަރކުރާ ފަރާތްތަކަށް ދައުލަތުން ދޭ އިނާޔަތް 4022 ފަރާތަކަށް ލިބިފައިވެއެވެ.

ރިޓާޔަރމަންޓް ޕެންޝަންގެ ގޮތުގައި 7،150،321.35ރ (ހަތް މިލިއަން، އެއްލައްކަ ފަންސާސްހާސް، ތިންސަތޭކައެކާވީސް ރުފިޔާ، ތިރީސްފަސްލާރި) ދޫކޮށްފައިވާއިރު، އެއީ 1366 ޕެންޝަނަރަކަށް ދޫކޮށްފައިވާ ފައިސާ އެވެ. އަދި ދައުލަތުގެ އެހެނިހެން ރިޓަޔަރމަންޓް އިނާޔަތްތަކުގެ ގޮތުގައި 6،112،145.24ރ (ހަ މިލިއަން، އެއް ލައްކަ ބާރަ ހާސް، އެއްސަތޭކަ ސާޅިސް ފަސް ރުފިޔާ، ސައުވީސް ލާރި) ދޫކޮށްފައިވާއިރު، އެއީ 3242 ޕެންޝަރަކަށް ދޫކޮށްފައިވާ ފައިސާ އެވެ.

އެހެންކަމުން ޕެންޝަން އޮފީހުން މި ޖުލައި މަހު، ޕެންޝަރަނަރުންނަށް ދޫކޮށްފައިވާ ޖުމްލަ ފައިސާގެ އަދަދަކީ، 117،440،549.50ރ (ސަތޭކަސަތާރަ މިލިއަން، ހަތަރުލައްކަސާޅީސް ހާސް، ފައްސަތޭކަސާޅީސްނުވަ ރުފިޔާ، ފަންސާސް ލާރި) އެވެ.

ރިޓަޔަރމަންޓް ޕެންޝަން ފިޔަވައި އެހެން ޕެންޝަނާއި އިނާޔަތްތަކަކީ ދައުލަތުގެ ބަޖެޓުން ޚަރަދުކޮށްގެން ދެވޭ ޕެންޝަނާއި އިނާޔަތްތަކެކެވެ.