ރަށްރަށަށް ދާން 9000 މީހުން އެދިފައިވޭ: އަމީން
30 ޖުލައި 2020 | ބުރާސްފަތި 06:44ބައެއް ރަށްރަށުން އަންނަނީ ކޮވިޑުގެ ކޭސްތައް ފެންނަމުން
ހެލްތް މިނިސްޓަރު އަމީން، ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަނީ
މާލެއިން ރަށްރަށަށް ދާން ބޭނުންވެގެން 9000 އެއްހާ މީހުން އެދިފައިވާ ކަމަށާއި، މިއީ ރަށްރަށަށް ދަތުރުކުރަން އެންމެ ރަނގަޅު ދަނޑިވަޅު ނޫން ކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެއެވެ.
ބުދަ ދުވަހުގެރޭ ރާއްޖެޓީވީގެ ފަލަސުރުހީ ޕްރޮގްރާމްގައި ހެލްތް މިނިސްޓަރު ވިދާޅުވީ، އެ ނުވަހާސް މީހުންނަކީ ކޮންމެހެން ދާން ޖެހިގެން ދާ މީހުން ކަމަށް ގަބޫލުފުޅު ނުކުރައްވާ ކަމަށެވެ. ރަށްރަށަށްދާއިރު ޒިންމާދާރުވާން މިނިސްޓަރު ވަނީ ހުރިހާ ފަރާތްތަކަށް ގޮވާލާފައެވެ.
ރަށްރަށަށް ދާން ބޭނުންވާ މީހުންނަށް ދެވެނީ އެކަމަށް ހާއްސަކޮށްފައިވާ ހުއްދަ އެޗްޕީއޭއިން ނަގައިގެންނެވެ. ރަށްރަށަށްދާ ހުރިހާ އެންމެންވެސް 14 ދުވަހުގެ ކަރަންޓީނުގެ މުއްދަތު ފުރިހަމަ ކުރަން ޖެހެއެވެ.
