އޭސް ޓްރެވެލްސްގެ ފަރާތުން 900 ވުރެ ގިނަ ބިދޭސީން އަނބުރާ ގައުމަށް ފޮނުވާލައިފި
935 މީހަކު އަނބުރާ ގައުމަށް ފޮނުވާލައިފައިވޭ
ބިދޭސީން ފުރުމަށް ކިއޫގައި
އިމިގްރޭޝަންގެ އެހީތެރިކަމާއިއެކު އޭސް ޓްރެވެލްސްގެ ފަރާތުން 900 ވުރެ ގިނަ ބިދޭސީން އަނބުރާ ގައުމަށް ފޮނުވާލައިފިއެވެ.
މިކަން ހާމަކޮށް އޭސް ޓްރެވެލްސްގެ މެނޭޖިންގް ޑިރެކްޓަރ މުހައްމަދު ފިރާގް ކުރެއްވި ޓުވީޓެއްގައި ވިދާޅުވީ، ފާއިތުވި 10 ދުވަހު ބަންގްލަދޭޝްއަށް ނިސްބަތްވާ 935 މީހަކު އަނބުރާ ގައުމަށް ފޮނުވާލައިފައިވާކަމަށެވެ. އެމީހުން ފޮނުވާފައިވަނީ، ސްރީލަންކަން އެއާރލައިންސްގެ 5 ފްލައިޓަކުންނެވެ.
ބިދޭސީން ފޮނުވާލުމުގެ މަސައްކަތް ފަށާފައިވަނީ ކޮވިޑް-19އާ ގުޅިގެން މާލެ ލޮކްޑައުންކުރި ހިސާބުންނެވެ. މި ލޮކްޑައުން ތެރޭގައި ރާއްޖޭގައި ލިޔެކިއުމެއް ނެތި އުޅޭ ބިދޭސީންގެ ތެރެއިން 4205 މީހަކު އަނބުރާ ގައުމަށް ފޮނުވާލާފައިވެއެވެ. މިއާއި އެކު ކޮވިޑާ ގުޅިގެން ސަރުކާރުން ފެށި ވޮލެންޓަރީ ރިޕެޓްރިއޭޝަން ޕްރޮގްރާމުގެ ތެރެއިން އަނބުރާ ގައުމަށް ފޮނުވާލެވުނު ބިދޭސީންގެ ޖުމްލަ އަދަދު ވަނީ 14،000 ގާތްކޮށްފައެވެ.
ރާއްޖޭގައި މަސައްކަތް ކުރާ ބިދޭސީންގެ ތެރެއިން ލައްކައަކާއި ގާތްކުރާ އަދަދަކަށް ގަވާއިދާ ހިލާފަށް ބިދޭސީން އުޅެމުން އަންނަ ކަމަށް ސަރުކާރުން ވަނީ ހާމަކޮށްފައެވެ. މުޅި މައްސަލައަށް ހައްލެއް ގެނައުމުގެ ގޮތުން އިކޮނޮމިކް މިނިސްޓްރީން ދަނީ މިހާރުވެސް މަސައްކަތްތަކެއް ކުރަމުންނެވެ. އެގޮތުން އިކޮނޮމިކް މިނިސްޓަރ ވަނީ އަމާޒަކީ މި އަހަރުގެ ތެރޭގައި 20،000 ބިދޭސީން އެ މީހުންގެ ރުހުމުގައި އަނބުރާ ގައުމަށް ފޮނުވާލުން ކަމަށް ވިދާޅުވެފައެވެ. އަދި އަނބުރާ ގައުމަށް ދާން ބޭނުންވާ ފަރާތްތަކަށް ސަރުކާރުން ވަނީ ލުއި ފަސޭހަ ގޮތްތަކެއް ހުޅުވާލާފައެވެ.
