އިންޑިއާ ކަނޑުގެ އައްސޭރިއަށް ނިސްބަތް ނުވާ ބަޔަކު އިންޑިއާ ކަނޑަށް އަތްގަދަކޮށްފިނަމަ ދިވެހިންނަށް ގެއްލުން ލިބޭނެ: ރައީސް ނަޝީދު
30 ޖުލައި 2020 | ބުރާސްފަތި 12:07މިތަނުގައި ދިވެހިންގެ ގޮތުގައި ސާބިތުވެ ތިބެނީ ވަކި ގޮތަކަށް އަމަލުތައް ބަހައްޓައިގެން އުޅެމުންދާތީ
ރައީސް މުހައްމަދު ނަޝީދު، އިންޑިއާގެ ބޮޑުވަޒީރު ނަރެންދްރަ މޯދީއާއެކު ބޭއްވެވި ބައްދަލުކުރެއްވުމުގެ ތެރެއިން
އިންޑިއާ ކަނޑުގައި އެކިއިރު އެކި ގައުމުތަކުން އަތް ގަދަކުރުމަށް މަސައްކަތް ކުރާ ކަމަށާއި، އަތްގަދަ ކޮށްފިކަމުގައިވާނަމަ އެކަމުގެ ގެއްލުން ދިވެހިންނަށް ލިބޭނެ ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއެވެ.
ބުދަ ދުވަހުގެ ރޭ އެމްޑީޕީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ އިންޑިއާ ކަނޑުގައި ދިވެހިން ދިރިއުޅެމުން އަންނަތާ ވަރަށް ގިނަ ދުވަސްވެފައިވާ ކަމަށާއި، މިތަނުގައި ދިވެހިންގެ ގޮތުގައި ސާބިތުވެ ތިބެނީ ވަކި ގޮތަކަށް އަމަލުތައް ބަހައްޓައިގެން އުޅެމުންދާތީ ކަމަށެވެ.
އިންޑިއާ ކަނޑުގައި އެކިއިރު އެކި ގައުމުތައް އަތް ގަދަކުރާކަން ފާހަގަކުރައްވައި ނަޝީދު ވިދާޅުވީ އިންޑިއާ ކަނޑަށް އައްސޭރިވާ ގައުމުތަކާއި، ނުވާ ގައުމުތައް ހުރިއިރު، އިންޑިއާ ކަނޑުގެ އައްސޭރިއަށް ނިސްބަތް ނުވާ ބަޔަކު އިންޑިއާ ކަނޑަށް އަތްގަދަކޮށްފިކަމުގައިވާ ނަމަ ދިވެހިންނަށް ބޮޑެތި ގެއްލުންތަކެއް ލިބޭނެ ކަމަށެވެ.
އެގޮތުން ޕޯޗުގީޒުންނަށް ވިޔަސް، ހޮލޭންޑް މީހުންނަށް ވިޔަސް، ހޮޅިންނަށް ވިޔަސް، އަދި އިނގިރޭސީންނަށް ވިޔަސް އަތްގަދަ ކުރި ހާލަތްތަކުގައި ދިވެހިންނަށް ލިބިފައި ހުރީ ގެއްލުންކަން ނަޝީދު ފާހަގަކުރެއްވިއެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި 2016 ވަނަ އަހަރުގެ އެޕްރީލް މަހު އެމަނިކުފާނު އިންޑިއާއަށް ކުރެއްވި ފުރަމާނަ ދަތުރުފުޅުގައި ރާއްޖެއާ އިންޑިއާ އާދެމެދު ސޮއިކުރެވުނު ޑިފެންސް އެކްޝަން ޕްލޭންގައި ހިމެނޭ ޑޯނިއަރ އެއަރކްރާފް ރާއްޖެއަށް ދިނުމަށް އިންޑިއާއިން ނިންމަވާފައިތީ އެކަމަށް އިޝާރާތް ކުރައްވާ ނަޝީދު ވިދާޅުވީ އެއީ ކުރީގެ ސަރުކާރުން ދިވެހިން ރައްޔިތުންނާއި، ގައުމުގެ މުސްތަގުބަލަށް ވިސްނުމަށްފަހު ނިންމާފައިވާ މުހިންމު ނިންމުމެއް ކަމަށެވެ.
ނަޝީދު ވިދާޅުވީ ޚާއްސަކޮށް ހާރިޖީ ސިޔާސަތުގައި އަމަލުކުރަމުން ދަނީ ރާއްޖޭގައި މީހުން އުޅެން ފެށީއްސުރެ ފަށައިގެން އަމަލުކުރަމުންދާ ގޮތަށް ކަމަށެވެ. އަދި ކުރިއަށް އޮތް ތާނގައި އެގޮތަށް އަމަލު ކުރެވޭނެ ކަމަށާއި، އެއީ ދިވެހިންނަށް އެންމެ ފައިދާ ހުރި ގޮތް ވެސް ނަޝީދު ފާހަގަކުރެއްވިއެވެ.
