އިންތިޚާބުގައި ބޮޑު ތަފާތަކުން ޔަޒްނީ ނަޝީދާ (ޔަޒޫ) ބަލިކޮށް، އެތުލެޓިކްސް އެސޯސިއޭޝަން އޮފް މޯލްޑިވްސްގެ ރައީސްގެ މަގާމަށް ތިންވަނަ ދައުރަކަށް މުޙައްމަދު ތޮލާލް އިންތިޚާބުވެވަޑައިގެންފިއެވެ.

އެތުލެޓިކްސް އެސޯސިއޭޝަންގެ އިންތިޚާބު ބުދަ ދުވަހުގެ ހެނދުނު ހ. ބޯޅަގޭގައި ބޭއްވިއިރު، އިންތިޚާބުގައި ރައީސްގެ މަގާމަށް ކުރިމަތިލައްވާފައިވަނީ ތޮލާލް އާއި ޔަޒޫއެވެ. އިންތިޚާބުގައި 12 ކްލަބަކާއި ހަތަރު އިންޑިވިޖުއަލް މެންބަރުން ވޯޓުލިއިރު، ތޮލާލަށް ވަނީ 15 ވޯޓު ވަނީ ލިބިވަޑައިގެންފައެވެ. ޔަޒޫއަށް ލިބިވަޑައިގެންނެވީ އެންމެ ވޯޓެކެވެ.

ތިންވަނަ ދައުރަކަށް ރައީސް ކަމަށް ތޮލާލް އިންތިޚާބުވެވަޑައިގެންނެވިއިރު، އެ އެސޯސިއޭޝަނުގެ ރައީސްގެ މަގާމު 2012 ވަނަ އަހަރުން ފެށިގެން ފުރުއްވަމުން އަންނަ ތޮލާލްގެ ދައުރުގައި އެތުލެޓިކްސްގައި ރާއްޖެ ވަނީ ބޮޑެތި ކާމިޔާބީތަކެއް ހާސިލްކޮށްފައެވެ. އޭގެ ތެރޭގައި 2015 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އާއި، މިދިޔަ އަހަރުގެ ސައުތު އޭޝިއަން ގޭމްސްގެ 100 މީޓަރު ދުވުމުން ރާއްޖެ ރަން މެޑަލް ހޯދުމުގެ އިތުރަށް، އޭޝިއާ ފެންވަރުގެ މުބާރާތްތަކުންވެސް ވަނީ ކާމިޔާބީ ހޯދާއެވެ.

ރައީސްގެ މަގާމަށް ތިންވަނަ ދައުރަކަށް ހޮވިވަޑައިގަތުމަށްފަހު ތޮލާލް ވިދާޅުވީ އެތުލެޓިކްސްގެ ގިނަ އިވެންޓުތަކެއް މިއަހަރު ކެންސަލް ކުރަން ޖެހިދާނެ ކަމަށާއި، އެކަމަކު ބޭއްވެން އޮތް މުބާރާތްތައް ބޭއްވުމަށް މަސައްކަތް ކުރާނެ ކަމަށެވެ.

ތޮލާލް އިތުރަށް ވިދާޅުވީ މިދިޔަ ހަތަރު އަހަރަކީ ކާމިޔާބު ހަތަރު އަހަރު ކަމަށާއި، އެގޮތުން އެތުލެޓިކްސް އެހެން ހަރުފަތަކަށް ގެންދިޔުމަށް މިދިޔަ ހަތަރު އަހަރު މަސައްކަތް ކުރި ކަމަށެވެ. މީގެ އިތުރުން ކުރިއަށް އޮތް ހަތަރު އަހަރު އެންމެ ބޮޑު ޓާގެޓަކީ މި ސަރަހައްދުން ނުކުމެ ކޮމަންވެލްތު ގޭމްސްއިން މެޑެއްޔެއް ހޯދުން ކަމަށްވެސް ތޮލާލް ވިދާޅުވިއެވެ.

ބުދަ ދުވަހު ބޭއްވި އިންތިޚާބުގައި ނައިބު ރައީސްގެ މަގާމަށް ވާދަކުރެއްވީ މިހާރުވެސް އެ މަގާމު ފުރުއްވަމުން އަންނަ އަޙްމަދު އަޒީލެވެ. އަދި ހަޒާންދާރުގެ މަގާމަށް ކުރިމަތިލެއްވޯ ކުރީ ދައުރެއްގައި އެ މަގާމު އަދާކުރި މުސްތަފާ މުޙައްމަދެވެ. މި މަގާމުތަކަށް އެންމެ މީހަކު ކުރިމަތިލާފައިވުމުން ފެންނަ ނުފެންނަ ވޯޓެއް ނެގިއިރު، އަޙްމަދު އަޒީލާއި މުސްތަފާ މުޙައްމަދު، މި ކޮންމެ ބޭފުޅަކަށްވެސް ވަނީ 15 ވޯޓު ލިބިވަޑައިގެންފައެވެ.

މި އިންތިޚާބުގައި އިތުރު ތިން މެމްބަރުންގެ މަގާމަށް ހޮވިވަޑައިގެންނެވީ މިހާރުވެސް އެ މަގާމުގައި އަދާކުރަމުން އަންނަ މުހައްމަދު ޝުޖާއު (މޯޑް) އާއި، އަލަށް ވާދަކުރި ހުސެއިން އަމީން ނަސީރުގެ އިތުރުން ކުރީގެ ދުވުންތެރިޔާ އަހުމަދު ޝަގީފް (ރިވަރިން) އެވެ. އަންހެން މެންބަރު ކަމަށް ޔާސްމީން އަބްދުﷲ އެކަނި ކުރިމަތިލެއްވިއިރު، އޭނާއަށް ވަނީ ފެންނަ ނުފެންނަ ވޯޓުގައި 15 ވޯޓު ލިބިވަޑައިގެންފައެވެ.