އުޞޫލުތަކާ ޚިލާފަށް ޚިދުމަތްދޭ ތަންތަން ބަލާ ފާސްކޮށް ބަންދުކުރަނީ
29 ޖުލައި 2020 | ބުދަ 02:35ސަރުކާރުގެ އެހެނިހެން އިދާރާތައް ގުޅިގެން ބުރާސްފަތި ދުވަހުން ފެށިގެން ގްރޭޓަރމާލޭ ސަރަޙައްދުގައި ޚާއްސަ އޮޕަރޭޝަނެއް ހިންގާނެ
މާލޭގެ ޓީޖެޓީ ސަރަހައްދުގައި ހުންނަ ފުޑް ކޯޓްތައް؛ އާންމު ހިދުމަތްދޭ ތަންތަން ބެލުމަށް އެޗްޕީއޭއިން ވަނީ ނިންމާފައި
ކޮވިޑް-19 އާއި ގުޅިގެން އާންމު ހިދުމަތްދޭ ތަންތަނުން އަމަލުކުރުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އަންގާފައިވާ އެންގުންތަކައި އުޞޫލުތަކާ ޚިލާފަށް ޚިދުމަތްދޭ ތަންތަން ޤަވާޢިދާ އެއްގޮތަށް ބަންދުކުރާނެ ކަމަށް އެ އެޖެންސީން ބުނެފިއެވެ.
މާލެއިން ކޮވިޑް-19 ގެ ކޭސްތައް ފެންނަ މިންވަރު ރެކޯޑް އަދަދަކަށް އިތުރުވެފައިވާ އިރު އެޗްޕީއޭއިން ބުނީ ކޮވިޑް-19 އާއި ގުޅިގެން އައު ޢާއްމު ޙާލަތަށް ރުޖޫޢަވުމަށްޓަކައި ޢާއްމު ޚިދުމަތްދޭ ތަންތަނުގައި ރައްކާތެރިކަމާއެކު ޚިދުމަތްދިނުމުގެ އިންތިޒާމް ހަމަޖެއްސުމަކީ މި ބަލި ފެތުރުން މަދުކުރުމަށް އެޅޭ ވަރަށް މުހިއްމު ފިޔަވަޅެއް ކަމަށެވެ.
މިގޮތުން މިފަދަ ތަންތަނުން ޢާއްމު ފަރާތްތަކަށް ޚިދުމަތް ފޯރުކޮށްދޭންވާނީ، ކޮވިޑް-19 އާއި ގުޅިގެން އެ އެޖެންސީން ޢާއްމުކޮށްފައިވާ އުޞޫލުތަކާ އެއްގޮތަށް ކަމަށެވެ. އަދި މި އުޞޫލުތަކާ އެއްގޮތަށް ގްރޭޓަރ މާލޭ ސަރަޙައްދުގައި ހިމެނޭ ކެއިންބުއިމުގެ ޚިދުމަތްދޭ ތަންތަނާއި، ޢާއްމު ކާބޯތަކެތި ވިއްކާ ފިހާރަތަކާއި، ޖިމް ނުވަތަ ފިޓްނަސް ސެންޓަރުތަކާއި، ސެލޫންތައް އަދި މާރުކޭޓް ފަދަ ތަންތަނުން ޢަމަލުކުރަމުންދޭތޯ ބެލުމަށް ސަރުކާރުގެ އެހެނިހެން އިދާރާތައް ގުޅިގެން ބުރާސްފަތި ދުވަހުން ފެށިގެން ގްރޭޓަރ މާލޭ ސަރަޙައްދުގައި ޚާއްސަ އޮޕަރޭޝަނެއް ހިނގަމުން ދާނެ ކަމަށެވެ.
އެޗްޕީއޭއިން ބުނީ އުޞޫލުތަކާ ޚިލާފަށް ޚިދުމަތްދޭ ތަންތަން ޤަވާޢިދާ އެއްގޮތަށް ބަންދު ކުރެވޭނެ ކަމަށެވެ.
ކޮވިޑް-19 އާއި ގުޅިގެން އިއުލާންކޮށްފައިވާ ސިއްހީ ކުއްލި ނުރައްކަލުގެ ހާލަތުގެ ދަށުން ލޮކްޑައުންއަށް ލުއިދިނުމުގެ 3 ވަނަ މަރުހަލާގައި ރެކޯޑް އަދަދަކަށް ކޭސްތަކެއް އަންނަނީ ފެންނަމުންނެވެ. އެގޮތުން އަންގާރަ ދުވަހުގެ އިރުއޮއްސި 6:00 އާއި ހަމައަށް އިތުރު 137 މީހަކު ކޮވިޑް-19 އަށް ޕޮޒިޓިވްވެފައިވާ ކަމަށް އެޗްޕީއޭއިން ވަނީ ހާމަކޮށްފައެވެ. އަދި އޭގެ ތެރެއިން 92 މީހުންނަކީ ދިވެހިން ކަމަށް ވެސް އެޗްޕީއޭއިން ބުނެއެވެ.
ޕޮޒިޓިވްވި މީހުންގެ ތެރޭގައި ބަންގްލަދޭޝްއަށް ނިސްބަތްވާ 31 މީހަކާއި، އިންޑިއާއަށް ނިސްބަތްވާ 9 މީހެއްގެ އިތުރުން، ސްރީލަންކާއަށް ނިސްބަތްވާ 4 މީހަކާއި، ފިލިޕިންސް ރައްޔިތަކުވެސް ހިމެނޭ ކަމަށް އެޗްޕީއޭއިން މައުލޫމާތުދެއެވެ. އެއާއެކު ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމުލަ އަދަދު ވަނީ 3506 އަކަށް އަރާފައެވެ.
އަންގާރަ ދުވަހުން އެއްވެސް މީހަކު ބަލިން ފަސޭހަވެފައި ނުވާ އިރު، އާއްމު ޙާލަތަށް އެދޭނަމަ، މާސްކު އަޅުއްވާ، އެކަކު އަނެކެއްގެ ދުރުމިން ކަށަވަރު ކުރައްވާ، ބައްދަލުވާ އަދަދު މަދުކުރައްވާ، ކޮންމެހެން ނުކުންނަންޖެހޭ ހާލަތުގައި މެނުވީ ނުކުމެވަޑައި ނުގަންނެވުމަށް ހެލްތް މިނިސްޓަރު އަބްދުﷲ އަމީން ވަނީ އިލްތިމާސް ކުރައްވާފައެވެ. އަދި މިއީ ނުރައްކަލުގެ ރަގަބީލުގެ އަޑު ގަދަވުން ކަމަށް މިނިސްޓަރު ވަނީ ސިފަ ކުރައްވާފައެވެ.
