ހޮންކޮންގައި މާސްކު ނާޅާ މީހުން ބޮޑު އަދަދަކުން ޖޫރިމަނާ ކުރަނީ

ބޭރުތެރޭގައި އުޅޭއިރު މާސްކު އަޅަން މަޖުބޫރުކޮށް، މާސްކު ނާޅާ މީހުން ބޮޑު އަދަދަކުން ޖޫރިމަނާ ކުރަން ހޮންކޮންގ ސަރުކާރުން ނިންމައިފިއެވެ.

ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ހޮންކޮންގެ ޗީފް ސެކެރެޓަރީ މެތިއު ޗޮން ވިދާޅުވީ، ބުދަ ދުވަހުން ފެށިގެން އިންޑޯ އަދި އައުޓްޑޯގައި މާސްކު އެޅުން މަޖުބޫރުވާނެ ކަމަށެވެ. އެއާ ހިލާފުވާ މީހުން 5000 ހޮންކޮން ޑޮލަރު ނުވަތަ 645 އެމެރިކާ ޑޮލަރުން ޖޫރިމަނާ ކުރެވޭނެ ކަމަށް އޭނާ ވިދާޅުވިއެވެ.

މި ފަހަކަށް އައިސް ހޮންކޮންގައި ޕޮޒިޓިވްވާ ކޭސްތަކުގެ އަދަދުތައް އިތުރުވަމުންދާތީވެ އެ ގައުމުގެ ސަރުކާރުން ދަނީ އަޅާފައިވާ ފިޔަވަޅުތައް ހަރުކަށި ކުރަމުންނެވެ. އެގޮތުން ދެ މީހުންނަށްވުރެ ގިނަ މީހުން އެއްވުން މަނާކޮށް ރެސްޓޯރެންޓް ތަކުން ހަމައެކަނީ ޓޭކްއަވޭ ހެދޭ ގޮތަށް ވަނީ ހަމަޖައްސާފައެވެ.

ހޯމަ ދުވަހު އެކަނިވެސް 145 މީހަކު ކޮވިޑަށް ޕޮޒިޓިވްވެފައިވާއިރު ހެލްތް އޮފިޝަލުން ވަނީ ކަންބޮޑުވުން ފާޅުކޮށްފައެވެ. ކޭސްތައް އިތުރުވަމުންދާތީ ހައި ރިސްކު ކެޓަގަރީގައި ހިމެނޭ މީހުން ޓެސްޓު ކުރާ އަދަދު އިތުރު ކުރަން އޮފިޝަލުން ވަނީ ނިންމާފައެވެ.

ހޮންކޮންގައި ކޮވިޑް-19 ޖެހުނު މީހުންގެ އަދަދު އުޅެނީ 2779 ގައެވެ. ބަލި ޖެހުނު މީހުންގެ ތެރެއިން 1495 މީހަކު ރަނގަޅުވެފައިވާއިރު، މި ބަލީގައި 22 މީހަކު ވަނީ މަރުވެފައެވެ.