ކްރޮއޭޝިއާގެ ޑިފެންޑަރު ޑޭޔާން ލޮވްރެން ލިވަޕޫލް ދޫކޮށް ރަޝިއާގެ ޒެނިތު ސެއިންޓް ޕީޓެސްބާގަށް ބަދަލުވެއްޖެއެވެ.

އުމުރުން 31 އަހަރުގެ ޑިފެންޑަރު ވަނީ ޒެނިތާއެކު ތިން އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ. ރިޕޯޓުތައް ބުނާ ގޮތުން ލޮވްރެން ޒެނިތަށް ބަދަލުވީ 11 މިލިއަން ޔޫރޯއަށެވެ. ލޮވްރެން ޒެނިތަށް ބަދަލުވިއިރު، މި ސީޒަނުގައި ލިވަޕޫލާއެކު އޭނާ ކުޅެފައިވަނީ އެންމެ 10 މެޗެވެ.

ލިވަޕޫލުން ނެރުނު ބަޔާނުގައި ބުނެފައިވަނީ ލޮވްރެންއަކީ ލިވަޕޫލަށް ގިނަ ކާމިޔާބީތަކެއް ހޯދައިދިން ކުޅުންތެރިއެއް ކަމަށާއި، އޭނާ ލިވަޕޫލަށް ކޮށްދިން ޚިދުމަތަށް ޝުކުރު އަދާކުރާ ކަމަށެވެ.

ހަ އަހަރަށްފަހު ލޮވްރެން ލިވަޕޫލް ދޫކޮށްލިއިރު، މީގެ ކުރިން އޭނާ ވަނީ މި ސީޒަނަށްފަހު ލިވަޕޫލް ދޫކޮށްލާނެ ކަމުގެ އިޝާރާތެއް ދީފައެވެ. ލޮވްރެން ބުނީ ބެންޗުގައި އިންނަން އެއްވެސް ކުޅުންތެރިއަކު ބޭނުންނުވާނެ ކަމަށާއި، އެކަމަކު ކޯޗުންގެ ނިންމުންތަކަށް އޭނާ އިހުތިރާމުކުރާ ކަމަށެވެ.

ލިވަޕޫލަށް ކުޅެމުން އަންނަ މިސްރުގެ ފޯވާޑް މުހައްމަދު ސަލާހް ބުނީ ލޮވްރެންއަކީ ޓީމަށް ކާމިޔާބު ހޯދުމަށް އަބަދުވެސް މަސައްކަތްކުރި ކުޅުންތެރިއެއް ކަމަށާއި، އޭނާގެ ނިންމުމަށް ކްލަބާއި ސަޕޯޓަރުންގެ އިތުރުން ކުޅުންތެރިންވެސް އިހުތިރާމުކުރާ ކަމަށެވެ.

ސައުތެމްޓަނުން 2014 ވަނަ އަހަރު ލިވަޕޫލަށް ބަދަލުވި ލޮވްރެން ވަނީ އެޓީމަށް ކުޅެދިން 131 މެޗުން 5 ލަނޑު ކާމިޔާބުކޮށްދީފައެވެ. އަދި ވަނީ ލިވަޕޫލާއެކު މި ސީޒަނުގެ އިނގިރޭސި ޕްރިމިއާ ލީގާއި، މި ސީޒަނުގެ ކްލަބު ވޯލްޑް ކަޕާއި، މި ސީޒަނުގެ ޔުއެފާ ސުޕަ ކަޕްގެ އިތުރުން މިދިޔަ ސީޒަނުގެ ޔުއެފާ ޗެމްޕިއަންސް ލީގު ކާމިޔާބުކޮށްފައެވެ.