ސަސްޕެންޝަން އުވާލުން އެއީ ލިބުނު ހިތްވަރެއް ނޫން: ގާޑިއޯލާ

ޔުއެފާއިން މެންޗެސްޓާ ސިޓީއަށް ދިން ސަސްޕެންޝަން އުވާލުން އެއީ އެ ޓީމަށް ލިބުނު އިތުރު ހިތްވަރެއް ނޫން ކަމަށް ސިޓީގެ ކޯޗު ޕެޕް ގާޑިއޯލާ ބުނެފިއެވެ.

މިދިޔަ ފެބްރުއަރީ މަހު ޔުއެފާއިން ވަނީ ފައިނޭންޝިއަލް ފެއާ ޕްލޭ (އެފްއެފްޕީ) ގަވާއިދާ ސިޓީން ޚިލާފުވެފައި ވާތީ އެ ކްލަބު ޔޫރަޕުގެ މުބާރާތްތަކުން ކުރިއަށް އޮތް ދެ ސީޒަނަށް ސަސްޕެންޑް ކުރަން ނިންމާފައެވެ. މީގެ އިތުރުން ޔުއެފާ އިން ވަނީ އެޓީމު 30 މިލިޔަން ޔޫރޯ އިން ޖޫރިމަނާވެސް ކޮށްފައެވެ.

އެކަމަކު މި މައްސަލަ ސިޓީން ކޯޓް އޮފް އާބިޓްރޭޝަން ފޯ ސްޕޯޓްސް (ސީއޭއެސް) ގައި އިސްތިއުނާފު ކުރިއިރު، ސީއޭއެސްއިން ވަނީ ސިޓީގެ ސަސްޕެންޝަން އުވާލަން ނިންމާފައެވެ. އަދި ވަނީ ސިޓީގެ ޖޫރިމަނާ 30 މިލިޔަން ޔޫރޯއިން 10 މިލިޔަން ޔޫރޯއަށް ކުޑަކޮށްދީފައެވެ.

ގާޑިއޯލާ ބުނީ މި މައްސަލައަކީ މިހާރު ނިމިފައިވާ މައްސަލައެއް ކަމަށާއި، މި މައްސަލައިން ސަލާމަތްވެވުން އެއީ ކުޅުންތެރިންނަށާއި ކްލަބަށް މިހާރު ލިބޭނެ އިތުރު ހިތްވަރެއް ނޫން ކަމަށެވެ.

ގާޑިއޯލާ އިތުރަށް ބުނީ ކޮންމެ އަޑިގަނޑަކަށްފަހު އުސްގަނޑެއް އަންނާނެ ކަމަށާއި، ސިޓީގެ ސަސްޕެންޝަން އުވާލުން އެއީ މުޅި ދުނިޔެއަށް ސިޓީ އަކީ ކޮރަޕްޓް ބައެއް ނޫންކަން އަންގައިދިން ކަމެއް ކަމަށެވެ.

ގާޑިއޯލާ މީގެ ކުރިން ވަނީ ސިޓީގެ އަގު ވައްޓާލަން މަސައްކަތްކުރި މީހުން، ސިޓީގެ ކިބައިން މާފަށް އެދެން ޖެހޭނެ ކަމަށް ބުނެފައެވެ. ގާޑިއޯލާ ބުނީ ސިޓީގެ އަގު ވައްޓާލައި، ސިޓީއާ ދެކޮޅަށް ވާހަކަ ދެއްކި މީހުން މާފަށް އެދެން ޖެހޭނެ ކަމަށާއި، އިސްތިއުނާފުގެ މައްސަލަ ސިޓީއާ އެއްކޮޅަށް ނިމުމުން، އެއިން އެނގިގެންދަނީ ސިޓީގެ ކުށެއް ނެތްކަން ކަމަށެވެ.

އެކަމަކު ސިޓީގެ ސިޓީގެ ސަސްޕެންޝަން އުވާލުމާ ގުޅިގެން ޓޮޓެންހަމްގެ ކޯޗު ހޯސޭ މޮރީނިއޯ އާއި ލިވަޕޫލްގެ ކޯޗު ޔާގެން ކްލޮޕް ވަނީ އެކަމާ ދެކޮޅަށް ވާހަކަ ދައްކާފައެވެ. އެ ދެ ކޯޗުން ބުނީ އެފްއެފްޕީ ގަވާއިދުގައިވާ ކަންތައްތަކާ އެއްގޮތަށް ކަންތައްތައް ހިނގާތޯ ބަލަން ޔުއެފާއިން ކުރާ މަސައްކަތް ބަލިކަށިކޮށް އޮތުމަކީ ބަލައިގަނެވޭނެ ކަމެއް ނޫން ކަމަށާއި، ގަވާއިދެއް ހެދިފައިވާނަަމަ އޭގެ ބާރެއް ނެތި ބޭނުން ބަޔަކަށް ވަކި އުސޫލުތަކެއްގެ ތެރެއިން ސަލާމަތްވެވޭނަމަ އެ ގަވާއިދެއްގެ ބޭނުމެއް ނެތް ކަމަށެވެ.