ވިޔަފާރިތަކާއި އާންމު ހަރަކާތްތަކަށް ބުރުނާރާނެ ގޮތަށް ކަންކަން ތަރުތީބުކުރުމަށް އިސްކަން ދޭނަން: ހެލްތު މިނިސްޓަރ
ބަލިން ރައްކާތެރިވުމަށް އަޅަންޖެހޭ ފިޔަވަޅުތައް ދޫކޮށްލާ ހިސާބަށް އަދި ނުދޭ
ހެލްތު މިނިސްޓަރ އަބްދުﷲ އަމީން
ކޮވިޑް-19 އާއި ގުޅިގެން ކުރިންވެސް ތަރުތީބު ކުރެވެފައި ހުރި ފިޔަވަޅުތައް އަޅަމުންދާނެ ކަމަށް ހެލްތު މިނިސްޓަރ އަބްދުﷲ އަމީން ވިދާޅުވެއްޖެއެވެ.
ހޮނިހިރު ދުވަހުގެ ރޭ އައްޑޫ ސިޓީ، ފުވައްމުލަކު ސިޓީ އަދި ހއ. އިހަވަންދޫގެ ކޮވިޑް މެނޭޖްމަންޓް ފެސިލިޓީ ހުޅުވަން ބޭއްވި ރަސްމިއްޔާތުގައި ހެލްތު މިނިސްޓަރު އަބްދުﷲ އަމީން ވިދާޅުވީ އެހެންނަމަވެސް ރައްޔިތުންނަށް އެއްތަނުން އަނެއްތަނަށް ދެވޭނެ ގޮތަށް މަގުފަހިވާ ގޮތަށް އަދި ވިޔަފާރިތަކާއި އާންމު ހަރަކާތްތަކަށް ބުރުނާރާނެ ގޮތަށް ކަންކަން ތަރުތީބުކު ކުރުމަށް އިސްކަންދެއްވާނެ ކަމަށެވެ. އެއާއެކު މިހާރު މިބަލި ފެތުރެމުންދާ ނިސްބަތާއި މިހާރުގެ ހާލަތަށް ބަލާ އަޅަންޖެހޭ ފިޔަވަޅުތައް އަޅަމުން ދާނެކަމަށް ވެސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ބަލިން ރައްކާތެރިވުމަށް ސަރުކާރުގެ ކަމާބެހޭ އިދާރާތަކުން ކުރަމުންދިޔަ މަސައްކަތާއި ކަމާބެހޭ ފަރާތްތަކުގެ އިރުޝާދުތަކަށް ރައްޔިތުން ބޯލެނބުމުގެ ސަބަބުން ބަލި ނުރައްކާތެރި ހާލަތަކަށް ނުގޮސް ކޮންޓްރޯލް ކުރެވިފައިވާ ކަމަށެވެ. ނަމަވެސް ބަލިން ރައްކާތެރިވުމަށް އަޅަންޖެހޭ ފިޔަވަޅުތައް ދޫކޮށްލާ ހިސާބަށް އަދި ނުދާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ކުރިޔަށް އޮތީ އީދު ޗުއްޓީއަށްވާއިރު އީދަކީ އަބަދު ވެސް ދިވެހިން އުފާ ފާޅުކޮށް އެއް ރަށުން އަނެއް ރަށަށް ގޮސް އުޅޭ ދުވަސްވަރެއް ކަމަށެވެ. ނަަމަވެސް މިފަހަރުގެ އީދަކީ އެފަދަ ގޮތަކަށް ކަންތައްތައް ކުރެވޭނެ އީދެއް ކަމަށް ނުދެކުމަށް އެދިވަޑައިގަންނަވާ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ކޮވިޑް-19 އަށް ޕޮޒިޓިވްވާ މީހުންގެ އަދަދު އިތުރު ވަމުންދާ ކަމަށެވެ. އަތޮޅު ތެރޭގައި ފަރުވާދޭ މަރުކަޒުތައް ގާއިމުކޮށް ފަރުވާދިނުމުގެ ތަމްރީންތައް އަދި ލިބެމުންދިޔަ ކަމުގައި ވީނަމަވެސް މިކަމުގައި އިތުރަށް ސަމާލުކަން ދޭންޖެހޭ ކަންތައްތައް އެބަހުރި ކަމަށް މިނިސްޓަރ ވިދާޅުވިއެވެ.
ފަރުވާ ދޭތަންތަނުގައި ޚާއްސަކޮށް ޑޮކްޓަރުންނާއި ނަރުހުންނާއި ސިއްހީ އެހީތެރިން ވެސް ބައްޔަށް ޕޮޒިޓިވް ވަމުންދާތަން ފެންނަކަމަށާއި އެހެންކަމުން ފަރުވާ ދިނުމުގެ ކަންކަމުގައި އިހުނަށްވުރެ ބޮޑަށް ސަމާލުކަން ދޭންޖެހޭނެ ކަމަށް މިނިސްޓަރ ވިދާޅުވިއެވެ.
