މިހާރު ލަފާކުރެވެނީ ގެސްޓް ހައުސްތައް ހުޅުވޭނީ ސެޕްޓެމްބަރު މަހުގައި ކަމަށް: ހެލްތު މިނިސްޓަރ
އޮގަސްޓްމަހުގެ މެދެއްހާ ހިސާބުގައި ހާލަތަށް ބަލާ ހާލަތު ރިވިއު ކުރުމަށްފަހު އަލުން ގެސްޓްހައުސްތައް ހުޅުވޭނެ ތާރީޚެއް އިއުލާންކުރާނެ
ހެލްތު މިނިސްޓަރ އަބްދުﷲ އަމީން
އަންނަ އޮގަސްޓް މަހު ރަށްރަށުގައި ހުރި ގެސްޓް ހައުސްތައް ހުޅުވާލެވޭނެ ކަމަށް ކުރިން ސަރުކާރުން ބުނެފައި ވީނަމަވެސް މިހާރު ރާއްޖޭގައި ކޮވިޑް-19 ގެ ހާލަތަށް ބަލާއިރު އޮގަސްޓް މަހު ގެސްޓް ހައުސްތައް ނުހުޅުވާން ނިންމާފައިވާ ކަމަށް ހެލްތު މިނިސްޓަރ އަބްދުﷲ އަމީން ވިދާޅުވެއްޖެއެވެ.
ޓޫރިޒަމް އަލުން ފަށައިގަތުމަށް އެކުލަވާލި ގައިޑްލައިންގައި ވަނީ މީހުން ދިރިއުޅޭ ރަށްރަށުގައި ހިންގާ ގެސްޓް ހައުސްތައް އޮގަސްޓް މަހު ހުޅުވާލުމަށެވެ. ހޮނިހިރު ދުވަހުގެ ރޭ އައްޑޫ ސިޓީ، ފުވައްމުލަކު ސިޓީ އަދި ހއ. އިހަވަންދޫގެ ކޮވިޑް މެނޭޖްމަންޓް ފެސިލިޓީ ހުޅުވަން ބޭއްވި ރަސްމިއްޔާތުގައި ހެލްތު މިނިސްޓަރު އަބްދުﷲ އަމީން ވިދާޅުވީ މިހާރު މިބަލި ފެތުރެމުންދާ ނިސްބަތާއި މިހާރުގެ ހާލަތަށް ބަލާފައި އަޅަންޖެހޭ ފިޔަވަޅުތައް އަޅަމުންދާނެ ކަމަށާއި އެގޮތުން އޮގަސްޓް މަހު ގެސްޓް ހައުސްތައް ނުހުޅުވާން ނިންމާފައިވާ ކަމަށެވެ.
ނަމަވެސް އޮގަސްޓް މަހުގެ މެދެއްހާ ހިސާބުގައި ހާލަތަށް ބަލާ ހާލަތު ރިވިއު ކުރުމަށްފަހު އަލުން ގެސްޓް ހައުސްތައް ހުޅުވޭނެ ތާރީޚެއް އިއުލާން ކުރާނެ ކަމަށް ހެލްތު މިނިސްޓަރ ވިދާޅުވިއެވެ.
މިނިސްޓަރު ވިދާޅުވީ ކުރިން ވެސް ތަރުތީބު ކުރެވިފައި ހުރި ފިޔަވަޅުތައް އަޅަމުންދާނެ ކަމަށެވެ. އެގޮތުން އާންމު ހަރަކާތްތަކާއި ވިޔަފާރިތަކާއި ދަތުރުފަތުރުކުރުމަށް ބުރޫނާރާނެ ފަދަ ގޮތަކަށް އެ ފިޔަވަޅުތައް އަޅަން ސަރުކާރުން އިސްކަން ދޭނެ ކަމަށް މިނިސްޓަރ ވިދާޅުވިއެވެ.
ކޮވިޑް-19 އާ ގުޅިގެން ރާއްޖޭގެ ބޯޑަރުތައް ބަންދުކުރީ މަރޗް މަހުގެ 27 ވަނަ ދުވަހުއެވެ. އޭގެފަހުން ބޯޑަރުތައް ހުޅުވާލާފައިވަނީ ޖުލައި މަހުގެ 15 ވަނަ ދުވަހުއެވެ. ކޮވިޑްގެ ސަބަބުން ރާއްޖޭގެ އިގްތިޞާދަށް ވަނީ ބޮޑު ހީނަރުކަމެއް ކުރިމަތިވެފައެވެ. ވަކިން ޚާއްސަކޮށް ފަތުރުވެރިކަމަށް އޭގެ އަސަރު ވަނީ ވަރަށް ބޮޑަށް ކޮށްފައެވެ.
