ތައުލީމީ ބިލުގައި ހުރި ޓީޗަރުންގެ ކަންބޮޑުވުންތައް ރައީސްއާ ހިއްސާކޮށްފި
25 ޖުލައި 2020 | ހޮނިހިރު 14:28ބިލަށް ހިޔާލު ހޯދުމަށް ފޯރަމެއް ބޭއްވި
ަރައީސް އާއި ނައިބ ރައީސްގެ އިތުރުން އެޑިއުކޭޝަން މިނިސްޓްރީގެ އިސް ބޭފުޅުން
ރައްޔިތުންގެ މަޖިލީހުގެ ކޮމިޓީ މަރުހާލާގައި ތައުލީމާ ބެހޭ ބިލުގައި ހުރި ކަންބޮޑުވުންތައް ހިއްސާ ކުރަން ފުރުސަތު ލިބިފައިނުވާ ކަމަށް ބުނެ، ޓީޗަރުންގެ އެސޯސިއޭޝަނުން ކަންބޮޑުވުންތައް ރައީސްއާ ހިއްސާކޮށްފިއެވެ.
ތައުލީމީ ބިލަށް އާއްމުންގެ ހިޔާލު ހުށައަޅަން ރައްޔިތުންގެ މަޖިލީހުން މީގެ ކުރިން ހުޅުވާލިއެވެ. އަދި ހިޔާލު ހުށައަޅަން ބޭނުންވާ ފަރާތްތަކަށް ހާއްސަކޮށްގެން މަޖިލީހުގެ އިދާރާގައި ފޯރަމެއް ބޭއްވިއެވެ. މި ފޯރަމުގައި އެ ޖަމިއްޔާގެ ފަރާތުން ބައިވެރިވެފައިވާ ކަމެއް އެނގިފައެއް ނުވެއެވެ.
ޓީޗަރުންގެ އެސޯސިއޭޝަނުން ބުނީ، ތައުލީމީ ބިލަށް ކޮމިޓީ މަރުހަލާގައި މަޝްވަރާ ކުރުމުގެ ފުރުސަތު މަޖިލީހުން ދީފައިނުވާ ކަމަށެވެ. އެހެންކަމުން، ބިލުގައި ހުރި ކަންބޮޑުވުންތައް ފާހަގަކޮށް ރައީސް އިބްރާހިމް މުހައްމަދު ސޯލިހުއަށް ސިޓީއެއް ފޮނުވާފައިވާ ކަމަށް އެ އެސޯސިއޭޝަނުން ބުންޏެވެ.
އެ އެސޯސިއޭޝަންގެ މައިގަނޑު ކަންބޮޑުވުންތަކަކީ، ޓީޗަރުންނާއި ޕްރިންސިޕަލުންގެ ޒިންމާތައް ކަނޑައެޅިފައިވާއިރު ޓީޗަރުންގެ ގޮތުގައި މާނަކުރާ އެކިއެކި ފަންނީ މުވައްޒަފުންގެ ޒިންމާތައް ކަނޑައެޅިފައި ނުވުމާއި ކައުންސިލަރުންނާއި، ހެލްތް އެސިސްޓަންޓުނަށް ލައިސަންސް ދޭނެ މިންގަނޑެއް ސާފު ނުވުމެވެ. އަދި ހިލޭ ކިޔަވައިދޭނެ ކަމަށް ހިމަނާފައިވާއިރު، ހިލޭ ކިޔަވައިދިނުން ކަށަވަރުވާނެ މައިގަނޑު ގޮތްތައް ބަޔާންކުރެވިފައި ނެތުންވެސް އެއީ ޓީޗަރުންގެ ކަންބޮޑުވުމެކެވެ.
ސްކޫލްތަކުގައި ހުރި ވަސީލަތްތައް ދަރިވަރުންނަށް ކަށަވަރުކޮށްދޭން އިތުރު މަސައްކަތްތަކެއް ކުރަން ބިލުގައި ހިމަނަން ޖެހޭ ކަމަށާއި، އޭގެ އިތުރުން ޓީޗަރުންނަށް ބޭނުންވާ ވަސީލަތްތައް ފޯރުކޮށްދެވޭނެ ގޮތްތަކެއްވެސް ބިލުގައި ބަޔާންކުރުން މުހިއްމުކަން ކަމަށް އެ އެސޯސިއޭޝަނުން ދެކެއެވެ.
ބިލާއި ބެހޭ ގޮތުން ހިޔާލު ހޯދުމަށް ކޮމިޓީން ވަނީ މީގެ ކުރިން އެޑިއުކޭޝަން މިނިސްޓަރު ހިމެނޭ ގޮތަށް އެ މިނިސްޓްރީގެ އިސް ބޭފުޅުން ހާޒިރުކޮށްފައެވެ. ކޮމިޓީއަށް ހިޔާލުތައް ހިއްސާކުރުމުގެ ކުރިން މިނިސްޓްރީން ވަނީ ޓިޗަރސް އެސޯޝިއޭޝަނާއި ބައްދަލުކޮށްފައެވެ.
ޓީޗަރސް އެސޯސިއޭޝަންގެ ކަންބޮޑުވުންތަކާއި ގުޅޭ ގޮތުން ކޮމިޓީގެ މުގައްރިރު އަހުމަދު އަބްދުﷲ ރާއްޖެ.އެމްވީ އަށް ވިދާޅުވީ، ބިލާ ގުޅޭ ގޮތުން ހިޔާލު ހުށަައަޅަން ހުޅުވާލި ފުރުސަތުގައި ކޮމިޓީއާ ބައްދަލުކުރަން ޓީޗަރުންގެ އެސޯސިއޭޝަން އެދިފައިނުވާ ކަމަށެވެ. ކޮމިޓީން ވަނީ ބިލުގެ ބޮޑު ބައެއް މިހާރު ނިންމާލާފައެވެ.
