ފޯވާޑް ކީލިއަން އެމްބާޕޭގެ ފައިތިލައިގެ ހުޅަށް ލިބުނު އަނިޔާ ސީރިއަސް ކަމަށް ޕީއެސްޖީން ބުނެފިއެވެ.

އެމްބާޕޭއަށް އަނިޔާވީ ފްރެންޗް ކަޕްގެ ފައިނަލް މެޗުގައި ސެއިންޓް އެޓިއެން އަތުން 1-0 ގެ ނަތީޖާއަކުން ޕީއެސްޖީ މޮޅުވި މެޗުގައެވެ. މި މެޗުގައި އެމްބާޕޭ އަށް އަނިޔާވުމުގެ ސަބަބުން ވަނީ ބަދަލުކޮށްފައެވެ. އެމްބާޕޭއަށް އަނިޔާވެގެން ބަދަލުކުރަން ޖެހުނީ މެޗުގެ 30 ވަނަ މިނެޓުގައި ސެއިންޓް އެޓިއެންގެ ލޮއިކް ޕެރީން ކުރި ނުރައްކާތެރި ފައުލަކާ ގުޅިގެންނެވެ. އެ ފައުލާ ގުޅިގެން ޕެރީންއަށް ވަނީ ސީދާ ރަތް ކާޑެއް ދައްކާފައެވެ.

ޕީއެސްޖީއިން ބުނީ އެމްބާޕޭގެ ފައިތިލައިގެ ހުޅަށް ލިބުނު އަނިޔާ ސީރިއަސް ކަމަށާއި، 72 ގަޑިއިރު ފަހުން އިތުރު ޓެސްޓުތަކެއް ހަދާނެ ކަމަށެވެ. އެމްބާޕޭއަށް ލިބުނު އަނިޔާއާ ގުޅިގެން މީގެ ކުރިން އޭނާ އޮޕަރޭޝަނެއް ކުރަން ޖެހިދާނެ ކަމަށް ބެލެވުނު ނަމަވެސް، އޮޕަރޭޝަން ނުކޮށް އޭނާ ސަލާމަތްވާނެ ކަމަށް މިހާރު ވަނީ ރިޕޯޓުކޮށްފައެވެ.

އެމްބާޕޭއަށް އަނިޔާވުމާއެކު، އަންނަ އޮގަސްޓް މަހު ފެށުމަށް ހަމަޖެހިފައިވާ ޔުއެފާ ޗެމްޕިއަންސް ލީގަށް އެމްބޭޕޭ ފިޓްނުވުމުގެ ބިރު އެބައޮތެވެ. ޗެމްޕިއަންސް ލީގުގެ ކުއާޓާ ފައިނަލުގައި އޮގަސްޓް މަހުގެ 13 ވަނަ ދުވަހު ޕީއެސްޖީ ނުކުންނާނީ އެޓަލާންޓާއާ ދެކޮޅަށެވެ

މޮނާކޯއިން ކެރިއަރު ފެށި އެމްބާޕޭ އެންމެ ފުރަތަމަ ޕީއެސްޖީއާ ގުޅުނީ ލޯނު އެއްބަސްވުމެއްގެ ދަށުންނެވެ. އޭގެ ފަހުން 208 މިލިއަން ޑޮލަރު ދެއްކުމަށްފަހު ޕީއެސްޖީން އެމްބާޕޭގެ އެއްބަސްވުން ދާއިމީކުރިއިރު، އޭނާ އަންނަނީ އެ ކްލަބުގައި ތަފާތު މޮޅު ކުޅުމެއް ދައްކަމުންނެވެ. އެގޮތުން މި ސީޒަނުގައި އެމްބާޕޭ ވަނީ ޕީއެސްޖީއަށް ކުޅެދިން 34 މެޗުގައި 30 ލަނޑު ޖަހާފައެވެ.

އަދި ވަނީ މިހާތަނަށް ޕީއެސްޖީއަށް ކުޅެދިން 120 މެޗުގައި 90 ލަނޑު ޖަހާފައެވެ. އެމްބާޕޭ ވަނީ ޕީއެސްޖީއާއެކު މިހާތަނަށް ފްރެންޗު ލީގު ތިން ފަހަރު ހޯދާފައެވެ. އަދި ވަނީ އެ ކްލަބާއެކު ފްރެންޗު ކަޕް ދެ ފަހަރު އަދި ފްރެންޗު ލީގު ކަޕް އެއް ފަހަރު ކާމިޔާބުކޮށްފައެވެ.