ބޮޑުފިނޮޅު ބިދޭސީންނަށް މުސާރަ ދިނުމަށް ލޭބަރ ރިލޭޝަން އޮތޯރިޓީން އަންގައިފި
24 ޖުލައި 2020 | ހުކުރު 07:59މި މަހުގެ 30 ގެ މުސާރާ ދޭން ވަނީ އަންގާފައި
ބޮޑު ފިނޮޅުގައި ތިބި ބިދޭސީން ވަނީ ހަމަނުޖެހުން ހިންގައި ތަކެއްޗަށް ގެއްލުންދީފައި
ރިސޯޓެއްގެ ގޮތުގައި ތަރައްގީ ކުރަމުން އަންނަ ބ. ބޮޑުފިނޮޅުގައި ބޭ ތިއްބި އަރްއައިއެކްސް ކުންފުނީގެ 179 ބިދޭސީންނަށް ދޭން ޖެހޭ މުސާރަ މި މަހުގެ 30ގެ ކުރިން ދިނުމަށް ލޭބަރ ރިލޭޝަން އޮތޯރިޓީ (އެލްއާރްއޭ) އިން އަންގައިފިއެވެ.
ބޮޑުފިނޮޅުގައި މަސަައްކަތް ކުރަމުން އައި ބިދޭސީންނަށް ލިބެންޖެހޭ މުސާރަ ނުލިބޭތީވެ އެ މީހުން ވަނީ މުޒާހަރާކޮށް އެ ރަށުގައި ހުރި ތަކެއްޗަށް ގެއްލުން ދީފައެވެ. ލޭބަރ އޮތޯރިޓީން އާރްއައިއެކްސް ކުންފުނީގެ މެނޭޖިން ޑިރެކްޓަރ އަދި ރައްޔިތުންގެ މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާ އަށް ފޮނުވާފައިވާ ސިޓީއެއް ގައި ބުނީ، ބޮޑު ފިނޮޅުގައި ތިބި އާރއައިއެކްސް މުވައްޒަފުންނާއި، ބޮޑުފިނޮޅު ހޮޓެލް އެންޑު ރިސޯޓް ޕްރައިވެޓް ލިމިޓެޑްގެ މުވައްޒަފުން ފިޔަވައި ދެން ތިބި ބިދޭސީންނަކީ އެކިއެކި ކުންފުނިތަކުގެ ނަމުގައި ރާއްޖޭގެ ވަޒީފާތަކަށް އައިސް ގަވާއިދާ ހިލާފަށް އުޅެމުން އަންނަ ބިދޭސީން ކަމަށެވެ.
ބޮޑުފިނޮޅުގައި ތިބި ހުރިހާ ބިދޭސީން، އެ މީހުންނަށް ވަޒީފާދީގެން ގެންގުޅުނީ އާރްއައިއެކްސް އިން ކަމަށް ބުނެފައިވާ ކަމަށް އެ ސިޓީގައި ބުންޏެވެ. އަދި އެ ރަށް ހިންގާ ސީލް މޯލްޑިވްސް އާއި އާރްއައިއެކްސްއާ ދެމެދު ބަދަލުކުރެވިފައިވާ ލިޔުންތަކަށް ބެލިޔަސް ބޮޑުފިނޮޅު ގައި ތިބި ބިދޭސީންނަކީ، ރިޒާގެ ކުންފުނިން މުސާރަ ދެމުން އައި ބައެއްކަން އެނގޭ ކަމަށް ސިޓީގައި ބުންޏެވެ.
ދެ ފަރާތުން ވެފައިވާ އެއްބަސްވުމަށް ބަލާއިރު ބޮޑު ފިނޮޅުގައި މަސައްކަތް ކުރާ ބިދޭސީންނަށް މުސާރަ ދިނުމާއި، ކާންދިނުމާއި، އެމީހުންނާ ގުޅޭގޮތުން ސަރުކާރަށް ދައްކަން ޖެހޭ ފައިސާ ދެއްކުމަކީ، އާރުއައިއެކްސް އިން ކުރަންޖެހޭ ކަމެއް ކަމަށް އެލްއާރްއޭ އިން ބުންޏެވެ.
އެހެންކަމުން ބޮޑުފިނޮޅުގައި ތިބި 179 ބިދޭސީންނަށް ނުދެވިފައިވާ މުސާރު ދީ ނިންމުމަށް ފަހު، އެކަން ކަށަވަރު ކުރެވޭނެ ލިޔުމެއް މި މަހުގެ 30ގެ ކުރިން އެ އޮތޯރިޓީއާ ހިއްސާ ކޮށްދިނުމަށް އެލްއާރްއޭއިން ވަނީ އާރްއައިއެކްސް ކުންފުންޏަށް އަންގާފައެވެ.
އަންގާ އެންގުންތަކަށް އަމަލު ނުކުރާނަމަ، ވަޒީފާއާބެހޭ ގާނޫނުގެ ދަށުން ފިޔަވަޅު އަޅާނެ ކަމަށް ވެސް އެލްއާރްއޭ އިން ބުންޏެވެ.
