7 ފެބްރުއަރީގައި، ވެރިކަން ބަދަލުކުރުމަށް ޖަޒުބާތުގައި ޖެހުނު ފުލުހުންނަށް ވިސްނިއްޖެ، އެގްޒެކްޓިވް ޓީމަށް ފުރިހަމަ އިތުބާރު އެބައޮތް: ސީޕީ
24 ޖުލައި 2020 | ހުކުރު 07:35ރައްޔިތުންގެ އުދާސްތަކެއް ހުރި ނަމަވެސް އެކަންކަން ހަމަޖެހިގެންދާނީ ހަމަޖެހިފައިވާ އުސޫލުގެ ތެރެއިން
ކޮމިޝަނަރ އޮފް ޕޮލިސް އަދި ހޯމް މިނިސްޓަރ
2012 ވަނަ އަހަރުގެ ހަތެއް ފެބްރުއަރީގައި ވެރިކަން ބަދަލުކުރުމުގައި ހިނގާ ދިޔަ ކަންކަމުގައި ބައިވެރިވި ފުލުހުންނަށް ވިސްނިއްޖެ ކަމަށާއި، މިހާރު އެތް އެގްޒެކްޓިވް ޓީމަށް ފުރިހަމަ އިތުބާރު އެބައޮތް ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގުރާމްގައި ވާހަކަ ދައްކަވަމުން ސީޕީ ހަމީދު ވިދާޅުވީ، އެ ދުވަހު ހިނގަ ދިޔަ ކަންތައްތަކުގައި ބައިވެރިވި ވަކި ވަކި ފުލުހުންގެ މައްސަލަތައް ފެނި ފިޔަވަޅު ނޭޅި އެބަހުރި ކަމަށާއި ހަމަޖެހިފައިވާ ގާނޫނީ ނިޒާމުގެ ތެރެއިން އެކަންތައްތައް ބެލެން ޖެހޭނެ ކަމަށެވެ.
ފުލުހުންގެ އިސް މަގާމުތަކުގައި ތިއްބެވި ގިނަ ފަރާތްތަކަކީ 7 ފެބްރުއަރީގައި ހިނގައި ދިޔަ ހަމަނުޖެހުމުގައި އިސްކޮށް ބައިވެރިވި ކަމުގެ ތުހުމަތު ކުރެވޭ ފަރާތްތަކަށް ވާއިރު، އެ ފަރާތްތައް މަގާމުތަކުގައި ތިބިގެން މުއައްސަސާ ރިފޯމް ނުކުރެވޭނެ ކަމަށް ރައްޔިތުން ބުނަމުން ގެންދާ ދަނޑިވަޅެއްގައި ސީޕީ ވިދާޅުވީ، ރައްޔިތުންގެ އުދާސްތަކެއް ހުރި ނަމަވެސް އެކަންކަން ހަމަޖެހިގެންދާނީ ހަމަޖެހިފައިވާ އުސޫލުގެ ތެރެއިން ކަމަށެވެ. ސީޕީ ވިދާޅުވީ، ޕޮލިސް ސާރވިސްގައި މިހާރު އޮތް އެގްޒެކިޓިވް ޓީމަށް ފުރިހަމައަށް އިތުބާރު ކުރައްވާ ކަމަށެވެ.
ޕްރޮގުރާމްގައި އިތުރަށް ވާހަކަ ދައްކަވަމުން ސީޕީ އިތުރަށް ވިދާޅުވީ، ފުލުހުންގެ ތެރެއިން އެއްވެސް ބަޔަކު އެފަދަ ކަމެއް އަލުން ކޮށްފާނެ ކަމަށް ގަބޫލުނު ކުރާ ކަމަށާއި އެ ދުވަހު ވަކި ޖޯޝެއްގައި ޖެހިގެން ކަންތައްތައް ކުރި ފުލުހުންނަށް ވިސްނިފައިވާނެ ކަމަށް ގަބޫލު ކުރައްވާ ކަމަށެވެ.
ދެވަނަ 7 ފެބްރުއަރީއެއް ތަކުރާރުވިޔަ ނުދިނުމަށް ގިނަ މަސައްކަތްތަކެއް ކުރެވެމުންދާ ކަމަށް ހޯމް މިނިސްޓަރ އިމްރާން އަބްދުﷲ ވެސް ވަނީ މީގެ ކުރިން ވިދާޅުވެފައެވެ.
