އެންމެ މާތް މަސްއަރަކީ ހައްޖު މަސް ކަމަށާއި، ހައްޖު މަހުގެ އެންމެ މާތް ދުވަސްތަކަކަކީ އެ މަހުގެ ފުރަތަމަ ދިހަ ދުވަސްކަމުގައިވާތީ އެދުވަސްތަކުގައި އަޅުކަމުގައި މަސްއޫލުވުމަށް ހުކުރު ޚުތުބާގައި ގޮވާލައިފިއެވެ.

''ހައްޖު މަހުގެ ދިހަ ދުވަހުގެ މާތްކަން'' މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ މާތް ﷲ ހަޟްރަތުގައި އެންމެ ލޮބުވެތިވެގެންވާ މައްސަރުތަކަކީ ހުރުމަތްތެރި ވެގެންވާ މައްސަރުތައް ކަމަށެވެ. އެ މައްސަރުތަކުގެ ތެރެއިން އެންމެ ލޮބުވެތިކަން ބޮޑު މައްސަރަކީ ހައްޖު މަސް ކަމަށާއި، ހައްޖު މަހުގެ އެންމެ މާތް ދުވަސްތަކަކަކީ އެ މަހުގެ ފުރަތަމަ ދިހަ ދުވަސް ކަމަށް ޚުތުބާގައިވެއެވެ.

މި ދުވަސްތަކުގައި ހެޔޮއަމަލުތައް ގިނަކޮށް، ރޯދަ ހިފުމަށް ޚުތުބާގައި ވަނީ ގޮވާލާފައެވެ.

ދުނިޔެއަށް މިވަގުތު ކުރިމަތިވެފައިވާ ބަލިމަޑުކަމުގެ ސަބަބުން، މިއަހަރު ހައްޖުގެ އަޅުކަން އަދާކުރުމަށް ނިޔަތް ގަނެފައިވާ ބަޔަކަށް، ހައްޖަށް ދެވޭ ގޮތްނުވި ކަމުގައި ވިޔަސް، ފަރްޟު ހައްޖުވުމަށް އެކަމަށް ވާންޖެހޭ ތައްޔާރީތައް ވެފައިވާ ފަރާތްތަކަށް ﷲގެ ޙަޟްރަތުން ދަރުމަ އާއި، ސަވާބު ލިބޭނެކަން ފާހަގަކޮށް ޚުތުބާގައި ބުނީ އަމިއްލަ ގައުމުގައި، އަމިއްލަ ވަޒަނުގައި، ތިބިކަމުގައި ވިޔަސް ހައްޖު މަހުގެ ފުރަތަމަ ދިހަ ދުވަހުގެ އާއި ޘަވާބު ލިބިގަތުމަށް މަސައްކަތް ކުރުމުގެ މަގު ވަނީ ތަނަވަސް ކޮށްދީފައިވާ ކަމަށެވެ.

ޚުތުބާގައި ބުނީ އިސްލާމް ދީނަކީ އަމަންއަމާންކަމާއި، ރައްކައުތެރިކަން މުޖުތަމައަށް ގެނެސްދޭނެ ދީން ކަމަށާއި، މީސްތަކުންގެ ދިރިއުޅުން ބާއްޖަވެރި ކުރުމަށް އޮތް ހަމައެކަނި މަގު ކަމަށެވެ.

އިޚްލާސްތެރިކަމުގެ މުހިންމުކަމުގެ މައްޗަށް އަލިއަޅުވާލައި ޚުތުބާގައި ބުނީ އިޚްސާންތެރިކަމަކީ އެންމެހާ އަޅުކަންތައް ގަބޫލުވުމުގެ ޝަރުތު ކަމަށެވެ. ޚުތުބާގައި ބުނީ ޝިރުކު ކުރުމާއި ޝިރުކުގެ އަހުލުވެރިންގެ ކިބައިން ބަރީއަވާން ޖެހޭ ކަމަށާއި، އިޚްލާސްތެރިކަން ފަނޑުކޮށް ކިލަނބު ކޮށްލާފަދަ އެންމެހާ ކަންކަމުން ދުރުވެ، ރައްކާތެރިވާން ޖެހޭ ކަމަށެވެ. އަދި ދެއްކުންތެރިކަމާއި އަޑުއެރުވުން ފަދަ ކުޑަ ޝިރުކުތަކަށް ޖާގަ ނުދިނުމަށް ވެސް ޚުތުބާގައި ވަނީ ގޮވާލާފައެވެ.

ޚުތުބާގައި ބުނީ މުސްލިމުންނަކީ އެމީހުންގެ ޢަމަލުތަކާއި، ވަގުތުތަކުގައި، ﷲ ގެ ރުއްސެވުމާއި، ފުއްސެވުމުގެ ތެރޭގައި އުޅޭ ބަޔެއް ކަމަށާއި، ކުރާ އަމަލުތަކުގެ ތެރޭގައި އެންމެ ބަރަކާތް އިތުރު އަމަލަކީ، ﷲ އަށް ކިޔަމަންތެރި ވުމުގެ ގޮތުން ކުރާ އަމަލުތަކާއި، ހޭދަ ކުރާ ވަގުތުތައް ކަމަށެވެ.

ޛިކްރު ކުރުމަކީ މާތް މަތިވެރި އަޅުކަމެއްކަން ފާހަގަކޮށް ޚުތުބާގައި ބުނީ ޛިކްރު ކުރުމަކީ ކުފުރުގެ ނުބައި އަނދަވަޅަކަށް ވެއްޓުމުންނާއި ޝައިތާނާގެ މަޅީގައި ޖެހުމުންނާއި ނަރަކައިގެ ވޭންދެނިވި އަޒާބުން ރައްކާތެރިކޮށްދޭ ވަރުގަދަ އައްޑަނައެއް ކަމަށެވެ. ޛިކްރު ކުރުމުގެ ސަބަބުން މާތްﷲ ގެ ރަހުމާތާއި މަލާއިކަތުންގެ ހެޔޮ ދުޢާ ލިބި، އެކަލާނގެ މަދަދާއި ތައުފީޤު ލިބިގެންދާނެ ކަަމަކެވެ.