އެމްއެމްޕީއާރްސީ ފައިސާ ލިބިފައިވާ އެއްވެސް ފުލުހަކު ބޮޑު ހިޔާނާތް ތަހުޤީޤު ކުރުމުގައި ބައިވެރިނުވާނެ: ސީޕީ ހަމީދު
ޙިޔާނާތުގެ ފައިސާ ލިބިފައިވާ ކަމުގެ ހެއްކާއި ޤަރީނާ ލިބިފައިވާ 5 ފުލުހަކު ހިމެނޭ
ކޮމިޝަނަރ އޮފް ޕޮލިސް މުޙައްމަދު ހަމީދު
ރާއްޖޭގައި މިފަހުން ހިންގާފައިވާ އެންމެ ބޮޑު ޙިޔާނާތް ކަމަށްވާ އެމްއެމްޕީއާރްސީގެ ޙިޔާނާތުގެ މައްސަލަ ތަހުޤީޤު ކުރުމުގައި އެމްއެމްޕީއާރްސީ ފައިސާ ލިބިފައިވާ އެއްވެސް ފުލުހަކު ބައިވެރިނުވާނެ ކަމަށް ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވެއްޖެއެވެ.
ބުރާސްފަތި ދުވަހުގެރޭ ރާއްޖެޓީވީގެ "ފަލަސުރުޙީ" ޕްރޮގްރާމްގައި ވާހަކަ ދައްކަވަމުން ސީޕީ ހަމީދު ވިދާޅުވީ، އެމްއެމްޕީއާރްސީގެ ޙިޔާނާތުގެ ފައިސާ އެކި ސިފަ ސިފައިގައި ލިބިފައިވާ ކަމުގެ ހެއްކާއި ޤަރީނާ ލިބިފައިވާ 5 ފުލުހަކު ހިމެނޭއިރު، އެ ހުރިހާ ފުލުހުންވެސް މަސައްކަތުން އެކަހެރި ކުރެވިފައިވާ ކަމަށެވެ. އަދި އެމްއެމްޕީއާރްސީ ޙިޔާނާތުގައި މަސްލަހަތު ހިމެނޭ އެއްވެސް ފުލުހަކު މި މައްސަލަ ތަހުޤީޤު ކުރުމުގައި ބައިވެރި ނުވާނެ ކަމަށް ސީޕީ ވިދާޅުވިއެވެ.
ޖިނާއީ އިޖުރާއަތުގެ ޤާނޫނުގެ ދަށުން ބާރު ލިބިގެން އެންޓި ކޮރަޕްޝަން ކޮމިޝަން (އޭސީސީ)އާއި، ރިޔާސީ ކޮމިޝަނާއި ފުލުހުން ގުޅިގެން މި މައްސަލައިގެ ޖޮއިންޓް އިންވެސްޓިގޭޝަން ކުރިއަށް ގެންދާކަން ފާހަގަ ކުރައްވައި ސީޕީ ވިދާޅުވީ، އެމްއެމްޕީއާރްސީ ޙިޔާނާތުގައި ފުލުހުންގެ މައްޗަށް ތުހުމަތު ކުރެވޭ މައްސަލަތަކުގެ ތަހުޤީޤުގައި ފުލުހުން ބައިވެރިނުވާނެ ކަމަށެވެ. އަދި އެ ތަހުޤީޤުތައް ހިންގާނީ އޭސީސީއާއި އެސެޓް ރިކަވަރީ ކޮމިޝަނުން ކަމަށް ސީޕީ ވިދާޅުވިއެވެ.
އެމްއެމްޕީއާރުސީގެ މައްސަލައާއި ގުޅޭގޮތުން ހިނގަމުންދާ ތަހުޤީގުގައި، އެމްއެމްޕީއާރުސީގެ ފައިސާ ލިބިފައިވާ ފުލުހުންގެ ވަޒީފާގައި މި ވަގުތު ތިބި ފަސް މުވައްޒަފެއްގެ ޖިނާއީ އަދި އިދާރީ ތަހުގީގު ހިނގަމުންދާތީ ވަޒީފާގެ މައްސޫލިއްޔަތުން ދުުރުކުރެވިފައިވާކަން ފުލުުހުން މީގެ ކުރިން ހާމަކޮށްފައިވެއެވެ.
އެމްއެމްޕީއާރުސީ ހިޔާނާތުގެ މައްސަލައާ ގުޅޭ ފަސް ފުލުހަކު ވަޒީފާގެ މައްސޫލިއްޔަތުން އެކަހެރިކޮށްފައިވާ އިރު, އެމްއެމްޕީއާރުސީގެ ޚިޔާނާތުގެ ލިސްޓުގައި ސިޔާސީ ބެފުޅުންނާއި ހުރިހާ ޕާޓީތަކަށް ނިސްބަތްވާ މެންބަރުންވެސް ހިމެނޭކަމަށް ދާދިފަހުން ޕްރޮސެކިއުޓަރ ޖެނެރަލް ހުސައިން ޝަމީމް ވަނީ ވިދާޅުވެފައެވެ.
