ޝަރީއަތް ނިމެންދެން އަދީބް ޖަލުގައި ބަންދުކުރުމަށް ހައި ކޯޓުން އަމުރުކޮށްފި
އަހުމަދު އަދީބުގެ މައްޗަށް ހަތް ދައުވާއެއް އުފުލާފައިވޭ
އަހުމަދު އަދީބު ހައިކޯޓުގެ އަޑުއެހުމަށް ވެދެވަޑައިގަންނަވަނީ
އެމްއެމްޕީއަރުސީގެ ހިޔާނާތާ ގުޅިގެން، ކުރީގެ ނައިބު ރައީސް އަހުމަދު އަދީބު މައްޗަށް ހައިކޯޓުގައި އިސްތިއުނާފް ކޮށްފައި ދައުވާތަކުގެ ޝަރީއަތްތައް ނިމެންދެން، އަދީބު ރިމާންޑް ޖަލެއްގައި ބެހެއްޓުމަށް ހައިކޯޓުން އަމުރު ކޮށްފިއެވެ.
އެމްއެމްޕީއާރުސީގެ ހިޔާނާތާއި ގުޅިގެން އަދީބުގެ މައްޗަށް ދައުލަތުން ހަތް ދައުވާއެއް އުފުލިއެވެ. ނަމަވެސް، އެދައުވާތައް މިމަހުގެ 14 ވަނަ ދުވަހު ކްރިމިނަލް ކޯޓުން ބާޠިލްކަމަށް ނިންމުމުން އަދީބު ހުންނެވީ މިނިވަން ވެފައެވެ. ނަމަވެސް އަދީބު މިނިވަން ވުމާއެކު ޕްރޮސެކިއުޓަރ ޖެނެރަލްގެ އޮފީހުގެ އެދުމުގެ މަތިން ކޯޓު އަމުރެއްގެ ދަށުން ވަނީ އަދީބަށް ރާއްޖެއިން ބޭރަށް ނުފުރޭގޮތަށް ޕާސްޕޯޓް ހިފަހައްޓާފައެވެ.
ޝަރީއަތް ނިމެންދެން އަދީބު ބަންދު ކުރުމަށް ހައިކޯޓުން އަމުރުކޮށްފައިވަނީ، އަދީބު ގޭގައި ބަންދުކޮށްފައި ހުއްޓައި ދައުލަތުގެ ސަލާމަތީ ހިދްމަތްތަކަށް ނޭނގި ފިލައިގެން ރާއްޖެއިން ބޭރަށް ދިޔަކަން ޕީޖީ އޮފީހުން ހުށަހަޅާފައިވާ ލިޔެކިޔުންތަކުންނާއި ކްރިމިނަލް ކޯޓުގެ ޤަޟިއްޔާއަކުން ވެސް އެނގޭތީއެވެ.
އެހެންކަމުން އަދީބުގެ މައްޗަށް ޖިނާއި ބޮޑެތި ދައުވާ ތަކެއް އުފުލާފައިވަނިކޮށް، އަދި އެދައުވާތައް ސާބިތު ކުރުމަށް ދައުލަތުން ހަރުދަނާ ހެކިތަކެއް ހުށަހަޅާފައިވަނިކޮށް، އަދީބުގެ ފިލައިގެން ދިއުމުގެ އިހުތިމާލް އެބައޮތް ކަމަށް ހައިކޯޓުގެ އަމުރުގައި ފާހަގަކޮށްފައި ވެއެވެ.
އަދީބުގެ ފަރާތުން، އަދީބު ބަންދުގައި ބަހައްޓަން ނުޖެހޭކަން ބަޔާންކުރުން ފިޔަވާ، އެކަށީގެންވާ ސަބަބެއް އަދީބަށް ދެއްކިފައިނުވާކަމަށާއި، އެހެންކަމުން ހައިކޯޓުގައި އިސްތިއުނާފް ކޮށްފައިވާ އަދީބުގެ ދައުވާތަކާމެދު އެކޯޓުން ގޮތެއް ކަނޑައަޅަންދެން، އަދީބު ރިމާންޑް ޖަލެއްގައި ބެހެއްޓުމަށް އަމުރު ކުރާ ކަމަށް ހައިކޯޓުގެ އަމުރުގައި ވެއެވެ.
އަދީބުގެ ފަރާތުން ފާހަގަކޮށްފައިވާ، އޭނާގެ ސިއްހީ ކަންކަން، އަދީބު ޖަލުގައި ހުންނައިރު މޯލްޑިވްސް ކަރެކްޝަނަލް ސަރވިސްގައި އޮންނަ އުސޫލްގެ ދަށުން ކުރަމުން ގެންދިއުމަށް ވެސް އަމުރުގައި ވެއެވެ.
އޭނާގެ ސިއްހީ ކަންކަމާމެދު އަޑުއެހުމުގައި ވާހަކަ ދައްކަވަމުން އަދީބު ވިދާޅުވީ، އޭނާ ނިދަން ޖެހެނީ މެޝިނެއްގެ އެހީގައި ކަމަށާއި، އޭނާގެ ލަންގްސް މައްސަލަ ހުރުމުންނާއި އަދި ނޭވާލަން އުދަނގޫވާތީ، ނިދަން ޖެހެނީ މެޝިނެއް ބޭނުންކޮށްގެން ކަމަށެވެ. އިތުރަށް ވިދާޅުވީ، އޭނާ ފިލި މައްސަލާގައި ހުކުމްކޮށް ހުކުމް ތަންފީޒުކޮށް މިނިވަންވެފައި ވާއިރު، އޭނާއަކީ "ތާއަބަދު" ފިލާނެ މީހެއްކަމަށް ދައުލަތުން ގަބޫލުކުރާތީ ހިތާމަ ކުރައްވާ ކަމަށެވެ.
އެމްއެމްޕީއާރުސީގެ ހިޔާނާތާ ގުޅިގެން ދައުލަތުގެ ފަރާތުން އަދީބުގެ މައްޗަށް އުފުލާފައިވަނީ، ޚިޔާނާތްތެރިވުމުގައި ބައިވެރިވެފައިވާ ކަމަށް ބުނާ ދެ ދައުވާއަކާއި، މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ތުހުމަތުގައި އުފުލާފައިވާ ދެ ދައުވާއަކާއި، މަނީ ލޯންޑަރ ކުރުމުގެ ކުށުގެ ދެ ދައުވާ އެވެ. އަދި ރަސްމީ ހައިސިއްޔަތު ނަހަމަ ގޮތުގައި ބޭނުންކުރިކަމުގެ ތުހުމަތުގައި އުފުލާފައިވާ ދައުވާ އެއްވެސް ހިމެނެއެވެ.
